MENSAH-ajg-x-dogbogbe_2co_text

ETA 1

¹ Enye Pɔlu, amɛ ci yí nyi Yesu Kliso 'mɛdɔdɔ sɔto Mawu 'dró mɛ kodo nɔvi Timɔte yí ŋwlɛŋwlɛ wema cɛ ɖaɖa Mawu 'há ci yí le Kolɛnti jugan mɛ. Mì ŋwliŋwliɛ ɖaɖa amɛ ciwo yí Mawu cán dó akpo nɔ yiɖeki le Akayi 'kan lɔ mɛ hɛnnɛ. ² Mawu, mìwo 'da kodo Axwetɔ Yesu Kliso lé wa xomɛvunu nɔ́ mí yí a ná fafa mí! ³ Kafukafu nɔ́ Mawu, mìwo 'xwetɔ Yesu Kliso 'dalɔ. E nyí Eda ci yí ɖɔ kodo xomɛvu yí nyí Mawu ci yí fanɔ akɔn nɔ́ amɛ le nɔnɔmɛ dekpokpoi mɛ. ⁴ É fanɔ akɔn nɔ́ mì le mìwo vevesesewo pleŋ mɛ keŋ nɔ́ sɔ́to akɔfanɔamɛ ciwo yí mìwoŋtɔwo xɔ so Eda gbɔ me ɔ, mì a sɛ́n eŋ vá donɔ eji exo nɔ ame ciwo yí le vevesese hata ɖekpokpoi mɛ. ⁵ Hɛnnɛ cán ɔ, shigbe lehanci yí Kliso lɔ 'funkpekpe sugbɔ vava mì jí dó nɛnɛ ɔ, ahan lɔ ke yí akɔnfanɔamɛ gbe susuɔ egbɔ nɔ mì haan sɔto Kliso lɔ jí do nɛ. ⁶ Nɔ́ é nyí kpɔ́ bé mì le vevesese mɛ ɔ, nɔ́ wo a sɔ́ donɔ eji exo nɔ mí yí a hwlɛn mí gan ŋci yɔ́. Nɔ́ enyí kpɔ́ be wo fá akɔn nɔ́ mì ɔ, nɔ́ mí a sɔ́ xɔ akɔnfanɔamɛ yí a kpɔ́ ŋsɛn yí a vá sɔto mìwo 'funkpekpe hanwo mɛ ŋci yɔ. ⁷ Mìwo 'mɔkpɔkpɔ dó mí nu kpɔtɔ le góŋgóŋ. Do ɔ, mí nyá bé ci yí míwo cán mí kpɔ akpa ci yí nyí míwotɔ yí xɔxɔ le efunkpekpe lɔwɔ mɛ shigbe mìwo nɛnɛ ɔ, akɔfanɔamɛ lɔ cán a gbe va nɔ́ mí shigbe mìwo nɛnɛ. ⁸ Nyɔnɔnui ɖee, nɔvinyɛwo, mì de jí be mí a dán efunkpekpe ciwo mɛ yí mì to le Azi 'kan mɛ go: wo dó aya nɔ mì vɔntɔ kaka e va wu egan mì. Mì de gbe nya be mì a ci agbe hɛnnɛ kpetii go. ⁹ Mì xɔ egbe do ekuhwe ci yí wo so nɔ mì jí le mìwoɖekiwo mɛ. É le nɛnɛ nɔ́ mì ŋgbe kankaan do mìwodekiwo ji go. Vɔ ɔ, nɔ́ mì a kando Mawu, ci yí fɔnnɔ amɛkukuwo dó agbe ji. ¹⁰ É yi hwlɛn mì gán yi a gbe hwlɛn mì gán le eku nɛnɛtɔ shi. Ɛɛ, é yí jí mì sɔ́ mìwo 'mɔkpɔkpɔ dado yi mì kpɔkpɔ emɔ bé yi a gbe hwlen mì gán ké. ¹¹ Mìwo cán mí dodoɔ alɔ i mɛ kodo mì sɔ́ to egbedodoɖaɖa ci yí mí wawa do eta nɔ mì mɛ. Nɛnɛ ɔ, amɛ sugbɔ a xɔ xomɛvu 'nunana lɔ nɔ́ mì le Mawu gbɔ́ yí ame sugbɔ a dó apke nɔ́ Mawu nɔ́ mi dó xomɛvu lɔ ŋci. ¹² Dó mìwo yɛyi ɔ, é yi nyí kpɔ́ be mìwo 'yexa kunuɖeɖe so mì nú. mì nɔ agbe le xexe lɔ mɛ, veviɖe ɔ, ɖaɖa míwo gbɔ́ le cukaɖamawa kodo nyɔnɔnuitoto ciwo yí só Mawu gbɔ́ mɛ. D'é nyí kpɔ be agbetɔ ŋununyanya yí mì sɔ kplɔ mìwoɖekiwo le mí gbɔ go, vɔ ɔ, sɔ́ to Mawu xomɛvunu mɛ yɔ. ¹³ Mì de ŋwlɛnɔ enu bú ɖé ɖaɖa mí sɔ zeto enu ci yí mí hlɛnnɔ yí mɔnɔŋje mɛ nu go. Ŋ kpɔkpɔ emɔ bé mí a vá se enugɔnmɛ vɛ. ¹⁴ Le mɛ ɔ, mí se enu gɔnmɛ akpa ɖé viɛ be gbecigbe yí mìwo 'xwetɔ yesu a trɔgbɔ ɔ, mìwo yí a vá nyí enu ci yí a ná kafukafu míwo. Nɛnɛke ɔ, míwo yí a vá nyí enu ci yí a ná kafukafu mìwo cán nɛ. ¹⁵ Kankandoji hɔn yí le ŋ shi yí ŋ sɔ gbeta sa doŋkɔ be na vá jí mí kpɔ, nɔ́ mí a gbe kpɔ xomɛvunu zevetɔ lɔ. ¹⁶ Nɔ́ ŋ va mí gbɔ sasa ɔ, na vá só le mí gbɔ yí a yi Maseduwanu 'kanmɛ yí nɔ́ ŋ gbe trɔgbɔgbɔ ɔ, ma gbe va tó mí gbɔ. Gahɔnmɛ ɔ, ma xɔenu ciwo yiă a ɖó ezan nɔ ŋ le nyaŋ 'mɔzɔnzɔn yi Zude 'kanmɛ le mí shi. ¹⁷ Ci yi ŋ wa totomɛ hɔn ɔ, ŋ wɛɛ mabuikpɔ nyuiɖe téŋ yɔ́ a? Alo ŋ sɔnɔ nyaŋ 'gbetawo le gbazamɛ yí é gbe nɔnɔ lanmɛ nɔ ŋ be ma xɔ egbe a bé «Ɛɛ». Gankegan yí a gbe gbegbeɛ le enyɛɖeki me be «Oo» do eju yɔ a? ¹⁸ Mawu ŋtɔ le egbeji; é nya kodo ŋ be enyɔ ci yí mí nú nɔ́ mí d'é nyi «Ɛɛ» yi gbe nyi «Oo» go. ¹⁹ Dó ɔ, Yesu Kliso, Mawu Eviɛ lɔ ci 'nyɔ yi enyɛ Silasi kodo Timɔte doaxwa yí nú nɔ́ mí ɔ, d'é nyi «Ɛɛ» yí gbe nyi «Oo» go. Vɔ ɔ, «Ɛɛ» ɖekɛ yí le eye mɛ! ²⁰ Yesu Kliso lɔ mɛ yi Mawu 'gbeɖu sugbɔsugbɔ lɔwo nyí «Ɛɛ» le. É yí ná taɖo yí é nyi sɔto eyɛ lɔ ji yí mì nunɔ nɔ́ Mawu bé:«xoaɖyi» yi sɔ́ kannɔfui. ²¹ Mawu ŋtɔ yí ná yi mìwo kodo míwo ló edo góŋgóŋ le Kliso lɔ mɛ. É yi lɔ yi shi ami nɔ mì yí sɔ́ cán mì dó akpo nɔ yideki. ²² É sɔ́ yi nyikɔjejeshi biɔ dó mì nú yí sɔ gbɔngbɔn lɔ 'kpeɖojinu cinɔnuwo dado mìwo 'jiwo mɛ. ²³ Enyɛ yɛ ɔ, ŋ sɔ nyaŋ 'gbe ke eku yí sɔ́ Mawu ɖoɖoɔ kunuɖetɔ nɔ́ enyɛɖeki bé cukaɖa ŋ be ŋ deɖeɛ so ekɔ nɔ mí taɖo yí ŋ de gbe trɔva Kolɛnti jugan mɛ go. ²⁴ Mì de jijiɛ be mì a tɛ́ dó mí ji be enu leli jí yí mí a xɔse ge go. Vɔ ɔ, edɔɖekɛwatɔwo yí mì bɔ nyi kodo mí nɔ́ á nyi jijɔ nɔ mí. Dó le xɔse 'nyɔ mɛ ɔ, mí lo edo góŋgóŋ.