¹ Nyɔnuwo, nɛnɛhan ké yí míwo cán mí a bɔbɔnɔ míwoɖekiwo nɔ́ míwo 'suwo dó nɛ. Gahɔnmɛ nɔ́ amɛɖewo le wo mɛ yi gbé bé yewo d'a xɔ Mawu 'nyɔ lɔ o sasa ɔ, míwo 'gbenɔnɔ a dɔn wo vá yí wo a xɔ Mawu jí se yí d'a nyí nuxu buɖe yí wo vá xo nɔ wo go.

² Ɖó nɔ́ mí nɔ agbe mɛmi yí bunɔ míwoɖekiwo ɔ, á wa edɔ le lanmɛ nɔ miwo 'suwo. ³ Mí ŋgbe va jinɔ bé yewo gbaza 'cɔwawa yí a zenɔ go : eɖawawa ganganwo, shika gavi kodo kɔmɛjenuwo alo ehovevi 'wuwo dodo.

⁴ Vɔ ɔ, mí jínɔ ejimɛ 'cɔwawa le xomɛ agé; ehɔn yí nyí acɔwawa magblemagble nɔ́ gbɔngbɔn ci yí fá xomɛ yí de wanɔ cukaɖa go nɛ. Acɔwawa hɔn xɔ ashi gangan le Mawu ŋmɛ. ⁵ Nɛnɛ yí nyɔnu xɔsetɔ ciwo yí kpɔnɔ emɔ nɔ́ Mawu ɖonɔ acɔ dó sasa nɛ. Wo bɔbɔnɔ wowoɖekiwo nɔ́ wowo 'suwo,

⁶ shigbe lehanci yí Sala bunɔ asɔ Ablahamu yí yɔɛni bé ye 'xwetɔ do nɛnɛ. Eviɛ ɔ, nɔ́ mí wawa enunyui vɔnvɔn manɔ mɛ ɔ, mí nyi Sala eviɛ nyɔnuviwo. ⁷ Ŋsuwo, nɛnɛ lɔ ké miwo cán, mí a nyá bé yéwo 'shiwo nyí Mawu 'nuwawa ɖeka ciwo yí fla yí a nɔnɔ agbe kodo wo dó nɛnɛ jí. Mí a donɔ vivi wo nú ɖó míwo kodo wowo yí a bɔ a xɔ agbe adoduitɔ lɔ ɖagbe. Mí wanɔ nɛnɛ nɔ́ enuɖe ŋgbe va xé emɔ nɔ́ míwo gbedodoɖawo go. ⁸ A sɔ́ cú egui nɔ nyaŋ 'nyɔ ɔ, egbe lé nɔ eju nɔ mí. Amɛ 'nu lé wanɔ ŋshishi nɔ́ mí. Mi lɔn Míwonɔnɔwo shigbe nɔvi nɔviwo nɛnɛ. Mí a nyí xomɛvunɔwo yí a sɔnɔ míwoɖekiwo hwenɔ.

⁹ Mí ŋgbe ɖo evɔn, evɔn tɔxu go yí mí ŋgbe ɖo zuzu, zuzu nu go. Vɔ ɔ, mí cu eshi nɔ amɛwo. Ɖó yɔ wo yɔ́ mí nɔ́ mí a kpɔ́ akpa ci yí nyí míwotɔ a xɔ le shicu mɛ. ¹⁰ Nyɔnɔnui ɔ, wo ŋwle daɖɛ dó Mawu 'nyɔ wema ɖeka mɛ be : «Amɛ ci yí jí bé ye a lɔn agbe yí jí bé xexemɛ lé nyɔ́ nɔ́ eye ɔ, ɖó a ze nɔ amɛnyɔnunu yí a gbe ze nɔ ŋsukankan.

¹¹ É dó a mí enuvɔn wawa, a tɔ́ enunyui wawa, a jijiɛ fafa yí a kplɔɛdo a jijiɛ.

¹² Ɖó ɔ, Yehowa ŋkuviwo le amɛjɔjɔɛwo jí, yí é le egbesɔsɔ a se wowo gbedodoɖaɖawo. ¹³ Nɔ é nyí kpɔ́ bé kpakpa sɔnɔ mí do enunyuiwawa nu ɖee, mi yí a wa enu vevi kodo mí ɔ ?

¹⁴ Nɔ é gbe va le hɛnnɛ bé mí ɖo a kpé efun nɔ́ ci yí mí wawa enujɔjɔɛ taɖo cán ɔ, enu yí nyɔ́ nɔ́ mí. Mí ŋgbe vɔn nɔ́ agbetɔwo go yí mí ŋgbe na nɔ́ wo a caka mí le susu mɛ go. ¹⁵ Vɔ ɔ, mí nya le míwo 'jiwo mɛ be Kliso, Axwetɔ lɔ le kɔkɔɛɖe. Mí nɔ egbesɔsɔ hweɖekpokpoinu be nɔ́ amɛɖekpokpoinu be nɔ́ amɛɖekpokpoi vá biɔ́ so mí gbɔ bé míwo lé ɖe enu gɔnmɛ nɔ eye so enu ci mí kpɔkpɔ emɔ nɔ́ lɔ nú ɔ, mí a sɛ́n eŋ dré mɛ nii.

¹⁶ Mí a ná ɖoŋci lɔ wo fafɛɛɖe kodo bubu. Ayexamɛ le vo nɔ mí. Nɛnɛ amɛ ciwo yí dodoɔ ehwɛ mí so agbe nyui cìwo yí mí nɔnɔ le Kliso mɛ nu a ɖu ŋkpɛn.

¹⁷ Ɖó nɔ́ é nyí kpɔ́ bé Mawu 'dró yí é nyi bé wo a kpé efun yí wo kpekpeɛ efun lɔ yí sɔ́ wawa enunyui ɔ, á nyɔ́ sɔwu nɔ́ wo kpikpiɛ yí sɔ́ wawa enuvɔn. ¹⁸ Nyɔnɔnui ɔ, Kliso lɔ ŋtɔ kpé efun zeɖeka yí é vɔ do agbetɔwo 'nuvɔnwo 'ta. Amɛjɔjɔɛ yí é nyi gankegan yí kú do amɛmajɔmajɔɛwo 'ta keŋ yí a sɔ́ kplɔ mí va Mawu gbɔ́. Wo wui le agbetɔ jɔjɔmɛ ci yí le shi mɛ. Vɔ ɔ, é gbe ƒɔn dó agbe le Gbɔngbɔn kɔkɔɛ ŋsɛn mɛ.

¹⁹ Gbɔngbɔn kɔkɔɛ hɔn lɔ ŋsɛn mɛ yí é le yí vayi nu Mawu 'nyɔ lɔ kodo axwa nɔ́ gbɔngbɔn ciwo yí le gakpa mɛ.

²⁰ Amɛ hɔn lɔwo yí nyí amɛ cìwo yí gbé eto nɔ́ Mawu sasa hwecinu yí é gbɔn eji ɖɛ yí nɔ ete kaka yí Nɔwe kpa ɖakahun lɔ ɖegbɔ. Amɛ kankin ɖewo kpoŋ, agbetɔ amɛnyi kpáŋ yí ɖó ɖakahun lɔ mɛ yí kpɔ́ hwlɛngan sɔto eshixɔju lɔ mɛ. ²¹ Enu hɔn lɔ ci yí jɔ hwehɔnnu nɛnɛ nyí kpɔdonu nɔ́ ʒinʒindotɔmɛ Mawu tɔ ci ci mɛ yí mí totoɔ yɛ́ yí kpɔkpɔ hwlɛngan. Ɖ'é nyí kpɔ́ bé ʒinzindotɔmɛ Mawu tɔ cɛ a klɔ́ eɖyi ɖaɖa le ŋcilan nu nɔ́ mí yɔ go. Vɔ ɔ, á nyí kukuɖeɖe nɔ Mawu nɔ́ á klɔ eɖyiwo so míwo 'yexa nu nɔ́ á trɔ ayexa nyuí. É hwlɛn mí gan sɔ́ to Yesu Kliso fɔnfɔnsokuwodi mɛ.

²² Yesu Kliso lɔ yí yi jiŋkushi yí vayi nɔ ɖushimɛ nɔ Mawu, fini ci yí é le efiɔ ɖuɔ le do dɔla, egawo kodo acɛkpatɔwo jí.