¹ Ci yí é le nɛnɛ ɔ, mí gbe vɔnɖinyinyi 'gbenɔnɔ hamɛhamɛwo pleŋ. Mí mi ŋsukankan 'daŋwo ɖeɖe nɔ amɛ yí a mí ayemɛnuwo wawa. Amɛbu nú ŋgbe cinɔ ŋmɛ nɔ mí go yí mí a mí enyɔ vɔnwo nunu dó amɛwo nú.

² Shigbe evifinwo nɛnɛ ɔ anɔshi gbɔngbɔnmɛtɔ, ci nu eɖyi ɖe de le go, ci yí nyí Mawu 'nyɔ lɔ lé dronɔ mí xaxaxa bé nɔ́ mí nuinuiɛ ɔ, á na nɔ́ mí a shinshiiɛ do ji yí a kpɔ́ hwlɛngan.

³ Ɖo ɔ, wo ŋwlɛ daɖɛ dó Mawu 'nyɔ wema ɖeka mɛ be : «Miwoŋtɔwo mí ɖɔ lehanci yí Axwetɔ lɔ wanɔ xomɛvu nɔ amɛ do kpɔ́» ⁴ Mí tegogo Axwetɔ, amɛ ci yí nyi ekpe agbeagbe lɔ Agbetɔwo gbii, vɔ ɔ, Mawu yɛ ciin yí sɔ́ɛ ɖó ekpe xɔashi.

⁵ Míwo cán ɔ, mí ci shigbe ekpe agbeagbewo nɛnɛ nɔ́ Mawu a sɔ́ mí cu gbɔngbɔnmɛ 'xɔ ci mɛ Gbɔngbɔn kɔkɔɛ a nɔnɔ. Mí a nyí avɔsatɔ ciwo yí wo cán dó akpo 'habɔbɔ ɖeka nɔ́ Mawu le exɔ hɔn lɔ mɛ yí a tonɔ Gbɔngbɔn kɔkɔɛ lɔ jí yí a sanɔ avɔ ciwo nú yí a jɔnɔ eji nɔ Mawu sɔ́ to Yesu Kliso ji. ⁶ Ɖo ɔ, wo ŋwle daɖɛ do Mawu nyɔ wema ɖeka mɛ be : «Mí kpɔ ɖa ! Ŋ can ekpe xɔashi teŋ ɖeka. É yí nyí zogojikpe. Ŋ sɔ dodoɔ egu le Siyɔn jugan lɔ mɛ. Amɛɖekpokpoi ci yi a xɔɛ ji se, d'á ɖu ŋkpɛn go.» ⁷ Ekpe vevi ɖeka yí é nyi nɔ́ míwo ciwo yí xɔ Kliso ji se; vɔ amɛ ciwo yí de xɔɛ ji se go ɔ, «Ekpe ci yí exɔcutɔwo gbé, é yí vá trɔ zogojikpe.»

⁸ Nɛnɛke yí wo gbe ŋwle do afi bú nɔ́ Mawu 'nyɔ wema lɔwo nɛ be : «Ekpe ci yí amɛwo klɛnnɔ yí é nyi; ekpegbaja ci yí a sɔnɔ amɛwo xwín yí é nyi.» Amɛ lɔwo klɛn afɔ. Ɖo ɔ, wo gbé bé yewo d'a wa do Mawu 'nyɔ lɔ jí go. Enu ci yí Mawu ŋtɔ drado daɖɛ nɔ́ wo nɛ. ⁹ Vɔ míwo yɛ ɔ, ekannu ci yí Mawu cán yí miwo nyí. Mí nyi Efiɔ gangan lɔ 'vɔsatɔwo 'habɔbɔ. Mí nyi akɔta ci yí Mawu cán dó akpo nɔ yiɖeki, jukɔ ci yí nyí yitɔ. É yɔ mí nɔ́ mí a só le vivici mɛ yí a vayi klɛnklɛn jiŋjiŋ lɔ mɛ keŋ yí a tɔ́ enu gangan ciwo yí é wa nunu.

¹⁰ Sasa ɔ, mí de nyí Mawu jukɔn go ɔ. Vɔ ecɛyɛ ɔ, mí nyi yi jukɔn. Sasa ɔ, Mawu de kunɔ ŋshishi nɔ mi go. Vɔ ecɛyɛ ɔ, é kunɔ ŋshishi nɔ mí. ¹¹ Nyaŋ 'xlɔ̀ veviwo, míwo ciwo yí nyí mɛdru kodo emɔzɔntɔwo le nyigban cɛ ji, ŋ biɔbiɔ so mí gbɔ be míwo ŋgbe lɔn nɔ́ agbetɔ jɔjɔmɛ xoxwi lɔ 'nudroamɛ ciwo yí wanɔ ahwa kodo míwo 'sewo a ɖu mí ji go.

¹² Mí nɔ agbe nyuiɖe le amɛmanyi Yuɖatɔwo dodomɛ. Gahɔnmɛ nɔ́ wo gbe va nunuɔ míwo 'nyɔ vɔnwo yí yɔyɔ mí be enubaɖabaɖawatɔwo cán ɔ, wo a vá kpɔɛ kokoko be míwo 'dɔwawawo nyɔ́ yí á va va. ¹³ Dó Axwetɔ lɔ ŋci ɔ, mí bɔbɔ miwoɖekiwo nɔ́ ejumɛ 'ga ɖekpokpoi ci agbetɔwo dó ɖɛ́ : mí bɔbɔ míwoɖekiwo nɔ́ ejutatɔ ci shi yí acɛwo pleŋ le.

¹⁴ Mí gbe bɔbɔ míwoɖekiwo nɔ́ ekanjikpɔtɔ ciwo yí ejutatɔ dɔnɔ ɖaɖa nɔ́ wo a dɔn eto nɔ́ enubaɖabaɖawatɔwo yí a kafu enunyuiwatɔwo.

¹⁵ Ɖo ɔ, enu ci yí Mawu jijiɛ so mí gbɔ yí nyí bé mí a wanɔ enunyui yí nɛnɛ ɔ, mí a dó ekui enu nɔ enumanyatɔwo kodo exlunɔwo.

¹⁶ Mí a nɔnɔ agbe shigbe amɛ ci yí le yiɖekishinu nɛnɛ. Vɔ ɔ, mí ŋgbe sɔ amɛɖekishinunɔnɔ lɔ wa xomɛsovɔ yí a sɔ́ cɔ́n ekunyinanyina 'gbenɔnɔwo jí go. Mí nɔ agbe shigbe Mawu 'dɔwaviwo nɛnɛ.

¹⁷ Mí bunɔ amɛshamɛ. Mí ɖo lɔnlɔn nɔ nɔviwo. Mí ɖo shishi nɔ́ Mawu. Mí bunɔ ejutatɔ lɔ. ¹⁸ Edɔwaviwo ɔ, mi bɔbɔ miwoɖekiwo nɔ́ míwo 'xwetɔwo yí a ɖonɔ shishi nɔ́ wo blebu. D'é nyí kpɔ bé axwetɔ ciwo yí nyɔ́ yí fá dɔmɛ ɖekɛwo yí mí a ɖonɔ shishi. Nɔ́ go vɔ ɔ, mí ɖoi nɔ ciwo yí baɖa hɛnnɛ.

¹⁹ Ɖo ɔ, ɖagbe e nyinɔ nɔ́ amɛ so Mawu gbɔ́ bé wo a kpɔ́ dó Mawu nú yí a lɔn a kpekpeɛ efun do kunu ji.

²⁰ Ɖó kɔkɔ ci yí á nyi nɔ́ amɛ be yi wa enuvɔn yí wo xoixoiɛ vɛviɖe gankegan yí gbe edɔn kaka yí wo xoi ɖegbɔ ɔ ? Vɔ nɔ́ é wa enunyui gankegan yí wo ɖeɖeɛ efun nii dó enunyui lɔ jí yí é do eji ɔ, ɖagbe yí é nyi le Mawu ŋmɛ. ²¹ Enu hɔn taɖo yí Mawu yɔ́ mí do nɛ. Ɖo Kliso lɔ ŋtɔ kpé efun do míwo 'ta. É gbe nyi kpɔdonu ɖɛ́ nɔ́ mí nɔ́ mí a tó yi 'fɔ ji.

²² Ɖ'é wa enuvɔn kpɔ́ go yi ŋsukankan 'ɖaŋɖeɖe ɖe de tó so aglan mɛ nii kpɔ go.

²³ Hwecinu yí wo zui ɔ, d'é ɖo zuzu lɔ nú go. Hwecinu yí wo ɖedeɛ efun nii ɔ, d'é kán adan nɔ amɛɖe go. Vɔ ɔ, é tashi yiɖeki dó alɔmɛ nɔ Mawu ci yí donɔ kojo kodo amɛwo jɔjɔɛɖe. ²⁴ É dró mìwo 'nuvɔnwo 'gbanwo dó yiŋtɔ ŋcilan ji yí sɔ́ wo hɛnyi acisoga ji bé nɔ́ mì a kú nɔ́ enuvɔn yí a tɔ́ agbe jɔjɔɛ nɔnɔ. Akpa ciwo yí wo doi mɛ yí mí kpɔ edɔdadawo le.

²⁵ Ɖó sasa ɔ, mí le shigbe lɛngbɔ ciwo yí bu nɛnɛ. Vɔ eviɛ ɔ, mí trɔgbɔva amɛ ci yí nyí míwo kplɔtɔ yí kpɔnɔ mí ji gbɔ́.