¹ Bhono komoka ghwa ikomi na katano ugobotangati bwa omokama Tiberia enkagha Pontio Pilato yale omonene wa Uyahudi, Herode yale omonene wo rongongo ulwa Galilaya na Filipo mura wabho yale omonene wa Iturea na Trakoniti, na Lisania yale omonene wa Abilene, ² Ne enkagha ya umusubhi omonene wa Anasi na Kayafa, eng'ana ya Waryobha yamwesheye Yohana omona wa Zakaria, kokeghahe. ³ Yakore ologendo kwinala olongongo lonswe ulwa mto Yordanani, alaleka obatiso bhwahane kokwa berwa amaghogho. ⁴ Kyabhono ghangolwe koketabo kya amang'ana Isaya omoroti, "Engamba yo monto ono alenge kwibala, 'Mokole buya enshela yo omonene, mokole amahetelo gaye amalonge. ⁵ Igha libate ndelaishokibwi na hata shinguku ebekelege mbela nyalaganibwi, emehanda geno gyaikonya engelalambolwe na shenshela shehando inshela nyikibwi. ⁶ Abhanto bhonswe mbalamahe okotoribhwa na Waryobha." ⁷ Bhono Yohana akabatebia amasikanelo amanene agha bhanto bhano bamuseheye banyore obobhatiswa na we, "Benyu uluibholo luishoka yo bosongo nagwe abatebeli obobebe bhono bukusha? ⁸ Mwebole sehago seno sikutubana na obohene mtakagamba gamba kobene hee, "Tonawe Ibrahimu thatha weitho, kobhora ndabhatebia igha, Waryobha naramhe Ibrahimu abhana kukurwa ko magena ghano. ⁹ Bhono ikisile ketorwe kumili gemete. Igho omote gono gotakotola shehago ngola geshwe no kolekelwa momoro. ¹⁰ Abhanto mbamo bori kwighambero bhakagamba igha, "Bhono yake tokole?" ¹¹ Akabhahoshola igha, "Hano ulanyore omonto anashengasho ibhe alusiemwe ahane ola atanayo na ono ana ibiakorya akole igoigho. ¹² Hohamare abhagoti baligoti bakasha kobatiswa. Na bakamotabia, "Umweghya, inke kutunwa tokole? ¹³ Akabhatebhia, "Motakoma shimbilya sheno motakotakelwa kokoma." ¹⁴ Na abhasirikale bakamobolya na baito bho? Nke tukutunwa tokole? Akabhatebia motaka gega shimbilya komonto wowonswe kwanguru na mtakahamerya omonto wowonswe keno aasari momomahe keno mokolehwa ikyo ikyenyu." ¹⁵ Bhono abhanto bale na amaigha gokoganya Kiristo ono alisha uwonde kuwonde mbaitegelanga igha koshenkolo syabho igha Yohana nawe Kiristo. ¹⁶ Yohana akabatebia bhonswe, "Igho oni nkobabatisyande ko amanshe, aho ono akusha ono ana shinguru kohetela, tena mweya ghwako tashola shenkamba siebelato biaye hee. Nale babatisya komokama omohorelu na komoro. ¹⁷ Ekebebetho kyaye nkokoboko kwaye kole igha ogi buya entahana yokobebe tela engano no okokoma engano mo ketarakyaye. Ono alesamba amakanya no omoro ghono gatakulima. ¹⁸ Ko bhegambo beno yagambile yale beri abhanto amang'ana amaholeru. ¹⁹ Yohana yamobehile Herode omonene wakorongongo okoteta moka mula wabho na komakono aghande amaru ghano wanyore Herode yakola. ²⁰ Kohayo Herode Yakore amakono agande amagogo bhokong'u. Yabhohile Yohana motono. ²¹ Hano hamare abhanto bonswe batunile kobatiswa na Yohana naye Yeesu yabhatisibwi wonswe hano yasabhanga amasalo nganyaragaini. ²² Omokama omoholelu gokaikahalewe kikirili kyarigena, hayo hayo ekegambo kekasha kulwa igoro kekogamba, "Uwe no omona wane ole ne ikohanshile ndagwe buya kuwe." ²³ Bhono Yeesu umwene hano awansile kwegya yale ni mioka melongo etato yale omona (kyabhono yaitegerwaga) wa Yusufu, omona wa Eli, ²⁴ Omona wa Mathati, omona wa Lawi, omona wa Melki, omona wa Yana, omona wa Yusufu, ²⁵ Omona uwa Matathia, omona wa Amosi, omona wa Nahumu, omona wa Esli, omona wa Nagai, ²⁶ omona wa Maati, omona wa Matathia, mona wa Semeini, mona wa Yusufu, omona wa Yuda, ²⁷ Omona wa Yoanani, omona wa Resa, omona wa Zerubabeli, omona wa Shealtieli, omona wa Neri, ²⁸ omona wa Melki, omona wa Adi, omona wa Kosamu, omona wa Elmadamu, omona wa Eri, ²⁹ omona wa Yoshua, omona wa Eliezeri, omona wa Yorimu, omona wa Matathi, omona wa Lawi, ³⁰ Omona wa Simeon, omona wa Yuda, omona wa Yusufu, omona wa Yothamu, omona wa Eliyakimu, ³¹ omona wa Melea, omona wa Mena, omona wa Matatha, omona wa Nathani, omona wa Daudi, ³² omona wa Yese, omona wa Obedi, omona wa Boazi, omona wa Salmoni, omona wa Nashoni, ³³ Omona wa Abinadabu, omona wa Aramu, omona wa Hesroni, omona wa Peresi, omona wa Yuda, ³⁴ omona wa Yakobo, omona wa Isaka, omona wa Ibrahimu, omona wa Tera, omona wa Nahori, ³⁵ omona wa Seruig, omona wa Ragau, omona wa Pelegi, omona wa Eberi, omona wa Sala, ³⁶ Omona wa Kenani, omona wa Arfaksadi, omona wa Shemu, omona wa Nuhu, omona wa Lameki, ³⁷ omona wa Methusela, omona wa Henoko, omona wa Yaredi, omona wa Mahalalei, omona wa Kenani, ³⁸ omona wa Enoshi, omona wa Sethi, omona wa Adamu, omonaa wa Waryobha.