¹ Ho bhayo bhonswe igho bhaimokire bhakahira Yeesu ku-Pilato. ² Bhakamushongera igha, "Ntunyoore omonto ono arasarya ikyaro kyeetu, ko okobha ngokaniare abhanto bhatakaghoota righooti irya Kaisaari, kora akaibherekera igha we Kiristo, omokama." ³ Hayo ho Pilato yaamobhori igha, "Nu-uwe omokama uwa Abhayahudi?" Umwene wonswe akamohonshora igha, "Nu-uwe oghambire ghayo". ⁴ Pilato yateebheri abhasengeri senkonaare bhayo hamwe na esango iya abhanto igha, "Omonto ono te-morooshe na obhosarya bhobhonswe igho he." ⁵ Kasi bhakakang'aserrya igha, "Ukweghya ukwaye nkaseegherrya kore abhanto, akweeghya Obhoyahudi yonswe, Galilaya ne nkagha eno hano ali." ⁶ Hano Pilato yaighure ghayo, akabhatoorya nyoore Yeesu M-Maghariraaya. ⁷ Na hano yaamanyire igha m-maghariraaya uwa ko-bhotongi ubhwa Herode, akabhatoma bhamuhire ko-Herode ko okobha Herode Yerusalemu hayo yaare ko-nkaagha iyo. ⁸ Hano Herode yaamorooshe Yeesu, akashomerwa bhokong'u ko okobha waanyoore amane ukwighwa amang'ana aghaaye. Na kurw kare yaiteng'eranga ajmohaahe, okore yimaahere umwene amakono ghano aghokora. ⁹ Herode akamobhoorerrya amang'ana amaaru, kasi Yeesu umwene ti-yaamumurri eng'ana he. ¹⁰ Abhasengeri senkonaare na agheeghya abha amaragherryo hobhaare bhakaghenderrya ukumushongera bhokong'u. ^{11 12} Herode na abhasirikare abhaaye, bhonswe bhaksimya ukumushabhwa kora bhakamotoorya singibho isya ekekama. Ho ghwiki bhaamukyori ku-Piraato. Na urusiko ruyo ndo Herode na Piraato bhaaghootaini obhosaani, nokaanyoora m-bhabhisa bhaase kurwa kare. ¹³ Pilato akabherekera abhasengeri senkonaare na abhatongi abha Ikiyahudi hamwe na abhanto abha mu-mughi. ¹⁴ Akabhateebhya igha, "Omonto ono mondeeteeye moramushomgera igha nkosegherrya are abhanto, momanyeri bhuuya igha nemobhoori na bheenyu moraighwa. Na ku ibhiina ibhyeenyu bhyonswe igho, te-moroshe na obhosarya bhobhonswe he. ¹⁵ Kora, Herode wonswe ta-morooshe na obhosary abhobhonswe he, nkyo keghere amukyori. Bhoono momanye igha omonto ono ta-korre eng'ana engogho eno eraaghere aitwe he. ¹⁶ Kubhuyo nendamatandeke namare mohaatere. ¹⁷ (Pilato uyo yaabhatashorranga omobhohe omwe urusiko urwa epasaka). ¹⁸ Abhanto bhayo bhonswe igho bhakashaghana bharaghamba igha, "Toheeneri ho omonto ono, muruusi ho Baraba!" ¹⁹ Na Baraba uyo yaabhohirwe ku jukwita abhanto na okoreeta ikisiiyemba mu-mughi. ²⁰ Pilato yaatunanga ghwiki ahaatere Yeesu, ekaghera akore ikiina na abhanto bhayo. ²¹ Kasi bhakongerya okokora ikituri igha, "Uwe otamohaneka ko mosarabha, mohaneke ko mosarabha. ²² Akashumasha nabho ghwiki urwa katato akabhabhoorya igha, "Mbhoghogho ke akorre? Ndara tendooshe eng'ana eno eraaghere aitwe he! Bhoono tigha motandeke imishariti mare mohaatere." ²³ Kasi abhanto bhayo bhakengerya okokora ikituri bhokong'u igha, nigha ahanekwe ko mosarabha. ²⁴ Na ekahekera ikituri ikyabho kekakera. ²⁵ Ho Pilato yaabhotooye ikiina ikya Abhayahudi bhayo bhakore kya bhoora bhaatunanga. ²⁶ Hano abhasirikare bhaaghyanga ukwita Yeesu, bhakasikana na omonto uwonde yaabherekerwanga igha Simoni uwa Ukirene, uyo yaarwanga mu-bhishishi. Bhoono mbe hayo ho bhaamoghootire bhakamwiteekya omasarabha na eno ararwa nyuma Yeesu. ²⁷ Abhanto m-bhaaru bhaamuruure nyuma. Mobhayo bhaare ho abhakari bhano bhamokoranga bhaana amaashishi. ²⁸ Yeesu akabhaisyerrya akabhateebhya igha, "Bheenyu bhare abhaiseke abha Yerusalemu motakankora, kasi mwikore bheenyu abheene na abhaana bheenyu. ²⁹ Ko obhoora momanye bhuuya igha, "Ku sinsiko siyo sikuusha, abhanto mbareghamba igha nyakara abhaghamba na bhano bhataaghonkeri. ³⁰ Ho bhareteebhya singuku igha mutughwere na ibhighuku igha, 'Mutundikiri.' ³¹ Kubhuyo ghakokorwa ko monto ono atasari eng'ana, kasi iyake erekorwa ko bhasarya?" ³² Ko-nkaagha iyo abhasirikare bhakamuhira hamwe na abhasarya abhabhere okore bhaitwe hamwe. ³³ Bhakahika ahase hano haabherekerwanga igha ekehoore ikya omotwe, bhakamohaneka ko mosarabha abhasarya abhabhere bhaara bhonswe bhakahanekwa ko mesarabha uwonde bhoryo na uwonde bhomosi. ³⁴ Yeesu akaghamba igha, "Taa, otaabhabhera ko okobha tebhamanyire keno bhakokora he. "Bhayo bhakakora ekekoobhwe ikya ukutwena singibho isya Yeesu. ³⁵ Abhanto mbaimeereeye hayo bharamaahera abhatongi bhakasimya okomosekera bhaghamba igha, "Ndarra yatoorya abhande, bhono mbe ataitoorya umwene, igha omwene no Kiristo uwa Waryobha, Omuhoorwa". ³⁶ Bhasirikare bhayo bhonswe bhakamosera, bhakamoretera idivai endoro anywe. ³⁷ Bhakamoteebya igha, "Nyoore nu uwe omokama uwa Abhayahudi witori mbe umwene" ³⁸ Ghatoorwe ko amandeko komosarabha kighoro ghaamamekirwe igha "ONO WE OMOKAMA UWA ABHAYAHUDI." ³⁹ Omwe uwa abhasarya abhabhere bhaara akashabhura Yeesu igha, "Ntikwighwa igha nu-uwe Kiristo? Utitoorya mbe ototoori na bheeto" ⁴⁰ Kasi murikyaye oora akamokaania aramoteebhya igha, "Kana uwe tokoobhoha Waryobha he? Ubhushibhu bhono anabho, mbwo uwe wonswe ushibhiibhwi? ⁴¹ Kasi bheeto m-bhwa heene tokengeeywe ikiina ko okoreng'aana na amang'ana agheeto. Kasi ono ta-ana obhosarya bhobhonswe igho he." ⁴² Hano akaghamba igha, "Uwe Yeesu uushe kuuhita hano uriisha ko bhokama ubhwaho." ⁴³ Yeesu akamohonshora igha, "Nobhoheene nkoghoteebya, reero ntoraabhe hamwe ku-ryobha." ⁴⁴ Enkaagha eno eryobha ryaahikire komotwe bhoronge bhokabha ubhira kabhere na kekabha ikisunte ku kayaro kohekera saa kenda. ⁴⁵ Ripazia erya erisengero rekatandoka mbaara ibhere kamwe igho kuwansera ighoro. ⁴⁶ Ho akakuura bhokong'u, Yeesu akaghamba, "Tata ndatoora obhohoru bhwane kuuwe," na hano yaamarre okoghamba ghayo akakuura. ⁴⁷ Ko nkaagha iyo Akida yarooshe ghayo ghatokere akatonia Waryobha na eno akaghamba igha, "Obhoheene omonto ono yarenge omonto omoheene." ⁴⁸ Hano abhanto bharoshe amang'ana ghayo, bhakakyoora yeeka wabho bharitematema ku bhikubha ibhyabho na eno bhabha yeeye. ⁴⁹ Kasi abahasani bhaye na bhakari bhano bhamuruure nyuma kurwa Galilaya, bhakaitashera ahare, bharamaahera amang'aana ghayo. ⁵⁰ Maha, yareho omonto yabherekerwa Yusufu, omotangati uwa ikyaro, omonto umuya na omoheene. ⁵¹ (Tiyaikereraini na bharikyaye ku ikiina kiyo ikya ukwita Yeesu), kurwa Armathaya, nguyo yaaghanyerraanga ukuusha ukwa Obhokama ubhwa Waryobha. ⁵² Omonto ono, akahika hang'i na Pilato, akasabha omobhere ugwa Yeesu. ⁵³ Akagya kwikya akatoora mosanda, akakerarya mo-mbeheera eno yaarenga ebhaashirwe ku-ritare, moora ataaho omonto arabhekwa mo he. ^{54 56} Urusiko ruyo, nu-urwa okoseemya obhotooro rwaare roratuna kuhika. Abhakari, bhara bhaishire hamwe kurwa Galilaya, bhakaasha, bhakamaaha embeehera iyo na kya igho ikihundughu kyaaraariibhwi mo. ⁵⁵ Bhakakyora yeka, bhakaseemya amaghuta na marashi agha oghohaka. Kasi urusiko urwa obhotooro, bhamuunyire kya igho amaragheryo gharagheraga.