¹ Inyangi iya emekate gheno gheno ghetaana ehamiira yarenga ihikire hang'e inyangi iyo yabherekerwanga Pasaka. ² Abhasengeri abhanene hamwe na bhandeki bhakashumasha kukwita Yeesu kobhono mbobhohanga abhanto. ³ Risambwa rekasoha monse ya Yuda Isakariote, omwe wabheghibhwa ikomi nabhahere. ⁴ Yuda akaya kushumasha nabhanene bhabhasengeri kobhono arabhahane Yeesu. ⁵ Bhakashomerwa, nabhakaikereranhya komohane setongoro. ⁶ Umwene akaikerya, akasimya ukutuna umweya ughwa ukunyeera Yeesu iniko abhanto bhataho. ⁷ Urusiko rwemekate gheno ghetana ahamira rokahika, ruyo nero urusiko rukurusya omona waring'ondi. ⁸ Yeesu akatoma Petero na Yohana, akabhateebhya, " Moghende motosemeri ibhyakory a ibhya Pasaka hano torashe tore." ⁹ Bhakamobhoorya, "Hayi ukutuna tosemeri ?" ¹⁰ Akabhahonshora igha munyitegheere, hano morahike mu-mughi musikane numushesha agheghire ensengo yamanshe, muhinane nawe igho okohekera munyumba eno arashe. ¹¹ Moteebhi umwene inyumba igha, umweghya araghambaigha, hayi kekrenge ikyumba kyabhagheni. Ndatuna kunyeera muyo enyangi ya Pasaka hamwe nabheegha bhane?" ¹² Narabhoroki ikyumba kyeghorofa keno kesemibhwi, motoseemeri muyo. ¹³ Kuigho bhakaya bhakanyoora kya bhono bhatebhiihwi. Kubhuyo bhakaseemerya muyo ibhyakorya bhya Pasaka ¹⁴ Hano enkagha yahikire, Yeesu akaikara hamwe nabhatomwa bhaye. ¹⁵ Akabhateebhya igha, "narekutuna okorya inyangi iya Pasaka eno hamwe nabheenyu, ntaranyankibhwa. ¹⁶ Kuigho ndabheteebhya tenderya gwikihe okohekera kobhokama bhwa Waryobha." ¹⁷ Yeesu akaghegha ekekombe ikya amarwa, akakumya Waryobha, na hano yamare kukumya akabhateebya, mogheghe keno mutwenane. ¹⁸ Kobhuyo nkobhateebhyande igha tindinywa gwiki amarwa ghomozabibu he, okohekera obhokama bhwawaryobha hano bhurisha." ¹⁹ Gwiko akaghegha omokate na hano yamare kukumya, akabhotora, na akabhahaana akaghamba, "Ghono nomobhere ghwane ghono ghurusibhwi kobhenyu, mokoren kukuhita oni." ²⁰ Akaghegha gwki ekekombe igho igho kubhyakorya bhyubhutiko akaghamba, ekekombe keno niriraghano rihya komanyinga ghane, eno yetekire kukwimereera bheenyu. ²¹ Kasi momahere, ora akunyeera iniko hamwe tore nawe komeza. ²² Kobhono omona womonto naraitwe, kasi ono aramunyeere iniko hako!" ²³ Bhakasimya kobhoranya abhene kobhene, kobheto nang'we arakore eng'ana iyo. ²⁴ Gwiki bhakawanza kohakana abhene ko bhene igha nang'we arabhe omonene kokera abhande. ²⁵ Akabheteebhya, "Abhakama bhahanto bhibhyaro mbana obhonene kighoro yabho, nabhara bhana obhotonge nkwikeribhwa bhore nabhanene ²⁶ Kasi motakatubhana nabho, kasi omotangati wenyu abhe nkyomoke nomotongi wenyu abhe nkyumutighi nkani. ²⁷ Bhoonambe nawe omonene, ora akwikara komeza, nabha noora akoreete ibhyakorya? Te oora ikaaye komeza? Nooni ndenge hamwe na bhenu ko moremo ghono. ²⁸ Bheenyu mbo mwatighaye hamwe naoni munyanko yane. ²⁹ Ndabhahana bhenyu obhokama kyabhono tata ang'aye oni obhokama. ³⁰ Moreenga nukunywa komeza yaane kobhokama bhwane na murikare kubhitumbe bhyekekama bwane. morabhotora amakabhira ikomi nabhere agha Israeli. ³¹ Simoni, Simoni, manya igha, Resambwa ryasabhire rebhateeme kyahano wirura engano. ³² Kasi nakosabheye okore umukumo ughwaho ghotakasuha, na hano urikyoora oseghe bharikyaho." ³³ Petero akamoteebhya, "Omonene, oni ndatora ukughya okobhohwa hamwe nauwe kora nenkaakwa teng'anahe." ³⁴ Yeesu akamohonshora, "ndakoteebhya, Petero, esarighoko teraghore rerohe, kora hano wakanyange mara katato kobha tomanyire he." ³⁵ Gwiki Yeesu akabhateebhya, hano nabhahire motana ekeghonera, ekekapo kibhyakorya, ebherato, kuigho mwasoheywe nekento?" Bhakamohonshora a-a tutwasuhirwe he. ³⁶ Gwiki akabhateebhya, "Kera ono yana ekeghonera, na agheghe hamwe nekekapo kibhyakorya, na ora atana umuhyo aratakerwa aghori engasho yaye aghore emwe. ³⁷ Kuigho ndabhateebhya, ghano ghonswe ghandekwa, kokobha oni ngarabhe, "Na yagheghirwe kyomonto ono akosarya amandeko.' kobhono kera keno kyaghambirwe kokobha oni nkerabhe." ³⁸ Gwiki bhakakghamba, Omonene, tamaha! ghehano imihyo ebhere," Akabhateebhya" ngiisire." ³⁹ Hano bhamare korya ibhyakorya bhyubhutiko, Yeesu akatanora, kyabhono yakoranga, akaghya munguku ya Mzeituni, nabheghiibhwa bhaye bhakahinana. ⁴⁰ Hano bhahikire akabhateebhya mosasame Waryobha motakateemwa." ⁴¹ Akasughutara mbere hake igho, akahighama hanse ibhiru akasabha Waryobha, ⁴² akaghamba, "Tata, hano oratune, undusiriho ekekombe keno. Kasi tikyabhono nkutuna oni he, kobhono uwe ukutuna." ⁴³ Hayo ho Malaika kukurwa kighoro akamweshera akamohana singuru. ⁴⁴ Hano yarenga omoroye, akasabha Waryobha nebhegheri bhyaye bhekabha kyamatonyokera amanene ghamanyinga ghakatonya hanse. ⁴⁵ Enkagha eno yamare kosabha Waryobha, yaishire kobheghibhwa akabhanyoora mbaraye. ⁴⁶ Akabhabhoorya, "Nkwake moraaye? Mobhoke mosabhe, motakashe mosohe kokotemwa." ⁴⁷ Enkagha eno yarenga akishumasha, maha, omosya umwaru ghwabhanto ghokamwenshera, na Yuda omwe wahatomwa ikomi nabhabhere arabhorokya. Akasha hang'i na Yeesu amwibhaare. ⁴⁸ Kasi Yeesu akamoteebhya, "Yuda, uramwibhara omona womonto kukumwisyorya?" ⁴⁹ Enkagha iyo bhara bhaare hang'i na Yeesu hano bharoshe ghano ghabhaye bhakaghamba, "Omonene, tobhateme nimihyo?' ⁵⁰ Gwiki omwe wabho akagheesha ooghorwa uwa omosengeri,enkonare numuhyo akamobhotora okotwe kwaye ukobhoryo. ⁵¹ Yeesu akaghamba, "Iyo yisire na akaghota okotwe kwaye akakuhwenhya. ⁵² Yeesu akaghamba komosengeri omonene, nakobhanene bamasengeero na kobhaghaka bhano bhaishire kumwigharanshora, mwishire kyabhano mukusha kwitana numwibhi mwishire na marungu nemihyo? ⁵³ Hano narenga hamwe na bhenyu sinsiko syonswe murisengeero, timwatoore amabhoko ghenyu kighoro yane he. Kasi eno nenkagha yeho, nobhotongebhwikisunte." ⁵⁴ Bhakamoghota, bhakamotangatya bhakamoteta munyumba yomosengeri omonene, kasi Petero akamosorana kwa hare. ⁵⁵ Hano bhamre kuhuta omoro, na hano bhamare kwikara hanse, Petero akaikara ghateghate yabho. ⁵⁶ Omoghorwa omwe uwekekari akamaha Petero yikaye kobhorabhu bhomooro, akamoteebhya, "Omonto ono wonse hamwe yare nawe." ⁵⁷ Kasi Petero akanga, akaghamba, "oremokari oni temomanyire he." ⁵⁸ Enkagha nkiigho omonto wonde akamomaha akaghamba, "Uwe wonse murikyaye ore". Kasi Petero akamohonshora urimwishesho, oni tewe he." ⁵⁹ Hano esa emwe yahetire, umushasha omwe akaghamba, "Kobhohene omonto ono wonse hamwe barenga nawe kobhono Mogalilaya. ⁶⁰ Kasi Petero akaghamba, "Urimushasha temanyire keno okoghamba he." Na hayo hayo esarighoko ekaraghora. ⁶¹ Akaisorya, omonene akamaha Petero. Na Petero akahita ling'ana ryomonene bhora yamoteebheri esarighoko etararaghora mara katato nora nyange." ⁶² Akaya kebhara akakura kwabhoro. ⁶³ Kuigho abahshasha bhara bharendnga Yeesu bhakamotoka nokomotema. ⁶⁴ Hano bhamukundikiyi amaiso, bhakamobhoorya, totebhi, "Tarota! neng'we akotemire?" ⁶⁵ Bhakashumasha amang'ana amaru nokotoka Yeesu. ⁶⁶ Hano yahikire nyinkyo, abhaghaka nabhanto bhakaikomanhya, abhanene bhabhasengeri nabhandeki bhakamuhira kobharasa, ⁶⁷ Bhakaghamba, "Nyore uwe nuwe Kiristo totebhi, kasi we akaghamba, hata nenkabhateebhya timwikeeri he. ⁶⁸ Na hano ndabhabhori temohonshore he." ⁶⁹ Kasi kurwa bhonigho nokoghenderya omona womonto narikare okobhoko kobhoryo ukwa Waryobha." ⁷⁰ Bhonse bhakaghamb, "Kuigho uwe nomona wa Waryobha?" Na Yeesu akabhateebhya, "Bhenyu mbomokoghamba oni newe." ⁷¹ Bhakaghamba, nkwake tukutuna ekemanyeeryo? Kokobha bheto abheno ntwighure kukurwa mumunywa ghwaye umwene."