¹ ‘Di a vuga anjeli ile ee’dete mani golo iyi lidi dii, iyi ni mi na pelere kususu mandara ani. Iyi ile kelu enga komi keri di Rubanga di pi Bilo angwa di to ² Kulu leti ‘ba ile di ni aga si. Golo ile ni baraga rilerile kwe lidi di aa, ku’a a’a mgbi mgbi mudi limbi ri imgba si. Kwe ile ni ibibi erua’ba suru vu dige ri ni zwazo lajwa lajwa aga si. ³ Ceni kumu kolu iyo. Komi keri di Rubanga di pi Bilo angwa di to kumu kolu ‘ba ile ni aga, pi andaa opi vo kede i’bu andaa ni laka. ⁴ Vo kundekii andaa anda ra, pi andaa ru kumu kolu a’ia andati ge. ⁵ Vu ini kumu kolu iyo, ‘ba vo le vu ingwe lamba diku kusa itu dii a’dusiku opi Rubanga ni mu ku’ji vu a’i ni ni. Vo kuzwakii vu tadu. ⁶ Anjeli ile ‘jo mani, “le’jo ‘dipi egenile wa pa gba. Opi, andaa ni Rubanga endi nebia di di’i, ezwe Andaa anjeli dudu ke’dete Andaa opi ai nga mure redere ire ri ra. ⁷ Nde! Memu ezeze! Mo’di le’jo nebi di buku ‘di ni agar i a vu ni erire pi okore ri anda losoto.” ⁸ Ma gba yoani ni maa nga si meri le’jo di pima pi meri nga ‘dipi ma. De meri pi mande nga ‘dipi, ma’de vuru anjeli mani nga ‘dipi ni e’detere ile a paga laru kerega andaa ni. ⁹ Andaa ‘jo mani, “Ede ileni ku! Masa ma opigo nyaa rezi’i, kare aluga nyaa adiinjini nebia rito, pi a’i le’jo buku ‘di ni agar i eri’ba pi vu nan i oko’ba rito. ¹⁰ Andaa jo mani,"Akalabu lejo buku nebi 'di ni agari ku, adusi sa'a esa wo ire ¹¹ Mo’di anda ku ri, kenjaru nga andaku ri ni edeka to. Mo’di lidi ni ovi na andi ri kenjaru ovi lidi ni andi di ile to. Mo’di anda ri, kenjaru nga anda ri ni edeka to. Mo’di ole ri kulee kenjaru oluka ole to.” ¹² “Nde! Mamu eze ze. Dide madi aa mato, mo’di alu alu lokwere ga kuviru nga andaa edele ri to. ¹³ Ma le’jo nit i a re’doka pi lokoka na to’i, mo’di ati rii pi vule gar ii, re’doka pi lokoka. ¹⁴ A’i a’ia bongu ni jwe’ba ra anda loso to, duudu kuvo kolukii anda to kwe ni o’a lidi di ni nyare ga pi kwizo koti si ‘ba ileni aga. ¹⁵ ‘Ba loguge laongwe ri oke, ule, bate, ‘ba ‘ba lu’di’ba, ‘ba eno luruka ayo rii, pi ‘ba enjo leba pi lu’jo’ba ayo ripi’i. ¹⁶ Ma gba yesu, mazwe maa anjeli le’jo ‘di ni ngere ga nyini pi eklezia ni. Makwe ni zu pi otilele Daudi di’i, lelego kirijobi’i. ¹⁷ Endi ole ri lomuruzi to ku’jokii, “Emu!” mo’di le’jo ‘di ni erire ri kulee ku’jo, “Emu!” mo’di iyibi akole ra ri kulee kemu, pi mo’di lere ri kulee kesu iyi lidi di. ¹⁸ Ma’joo mo’di le’jo nebi ‘di ni aga ri ni erire ri ni; “de mo’di kenja ke’jo zi laka, Rubanga kumu kenja diaru juwe cwile buku ‘di ni aga ri pi. ¹⁹ De mo’di zi ku’du pi le’jo zi’ba nebia di cwile buku di ni aga ri pi, Rubanga saa kumu ku’du andaa ewo kwe lidi di ni ga ripi, pi andaa ewo’ba ole ile ni aga ri to, cwile buku ‘di ni aga rii. ²⁰ Mo’di le’jo ngere nga ‘di pi ruge ku’jo, Eyoo! Memu ezeze.” Amen! Emu, opi yesu!” ²¹ Tutu ama opi yesu kristu di kolu ba tuwadu to! Amen.