¹ Yesu ndayomba nao hangi mkati ni mifano, ayomba, ² ''Utemi wa mwilunde ukwigelanizya ni utemi ngookandaa eshelehe ya winga ya mwane. ³ Avatuma vayza vakwe livakalibisha awondi valishwe liza muwinga, ila ndivakafikile. ⁴ Mtemi ndavatuma hangi vazya vangi, ayomba. ''Vavaleli wose awovalikwe, Lingi, na ndaga chailya. Cha ufahali ni ndama vane vaginile vanisenzagwa, ni mambo gose galitiali, izi kushelehe ya winga.'' ⁵ Ila vantu awo ndivakazingatie kuthati umwaliko gwakwe. Baadhi ndivasuva mkati ni migundazyao, no vangi ndivasuva mkati ni sehemu zyao zya isuluzya. ⁶ Vangi ndivavaukila vazya vaku mtemi ni livazalilisha ni livaulaga. ⁷ Ila mtemi ndagaya. Agatuma emajeshi gakwe, avaulaga awo vaulagi nilivatekekezya kaya yao kumoto. ⁸ Na avavalila vazya vakwe, ''Wingi ulitayali, ila awo ndivalikwe ndivakafuaya. ⁹ Kwa hiyo yagi kumasangizyo ga nzila hanya, valiki vantu vingi evyo ekawezekana vize kushelehe ya winga.'' ¹⁰ Vazya ndivaya kunzila hanya nilivakalibisha vantu wosewose awo ndivavaona, vasogani vavi. Evyo iholi lya winga ndilyaokola wageni. ¹¹ Ila mtemi ahondaingila livalinga vageni, ndamuona mntu yumo uyo ndiaka zwalile mienda lasmi zya winga! ¹² Mtemi ndamuuzya, 'Mnwani, ndiwapata viheifika aha makati bila mienda lasmi zya winga?' Ni mntu uyo ndakanyibie chonsechonse. ¹³ Ndio mtemi ahondavavalila vazya vakwe, ''Mtungi mntu uyu mioko ni migulu na mumsumbe hibala kugiza, uko kukava ni kililo ni kusha mino. ¹⁴ Kwiva vantu vingi vakwitanwa, ila vasogolilwe ni vadoo.'' ¹⁵ Ndio Emafalisayo ndivauka nipanga enamna ya limdima Yesu mkati ya mpola zyakwe msava. ¹⁶ Ndio ahondivavatuma vanahemba vao hakimoni Mhelode. Na ndivamvalila Yesu, ''Muhembeki, kumanyile eve uli mntu wa hana, ni kuva ukuhembeka makoviwagaku Seva mkati ni hana.Ukakulinga mpola zya mntu yunyi na ukakulangisha ipendelea ku mntu. ¹⁷ Kwa hiyo kuvalile, kwiganika kii? Je, ulisawa (ekisheria) kimiko ilipo ekodi kukasali au kuduhu?'' ¹⁸ Yesu ndiamanyile mavigao ni iyomba, ''Ku kii mkungema, inyu vanafiki? ¹⁹ Ndangishi hela eyoe kutumika kwilipila kodi.'' Ndio vamletela dinali. ²⁰ Yesu avauzya, ''Esula ni lina ili zyakunani?'' ²¹ Vamjibu , ''Gakukaisali.'' Ndio Yesu avavalila, ''Mpii kaisali vintu vilii vyakuwakwe ni vyaku Seva mpii Seva.'' ²² Aho ndivigwa evyo ndivakamalwa. Na ndivamleka vayaa zyao. ²³ Lusiku ulo ebadhi ya Masadukayo ndivaiza kwa Yesu, nawo vakuyomba iva kuduhu izyukululwa lya vafwile. Vamuuzya, ²⁴ vayomba, ''Muhembeki, Musa ayomba, mbeyava mntu afwa bila iuuta vana, mduguye ni usazi uwo mkima na ampe mwana kunguno ya mduguye. ²⁵ Ndiviho vaudugu mkaga. Wakwanza ndiatola na afwa bila iwuta mwana. Amlekela mke mduguye. ²⁶ Ni mduguye wa uvili namwe avezya vinevyo, nuyo wa utatu, yava vinevyo hadi kuyo wa mkaga. ²⁷ Baaada ya ivezya evyo wose, nuyo mkima namwe ndafwa. ²⁸ Igisi mkati ni zyukululwa uwo mkima mkee lyaku nani mkati ya vaduguye mkaga? Kunguno wose ndivamtola.'' ²⁹ Ila Yesu ndiavajibu ni livavalila, ''Mkukosela, kunguno mkamanya utonwe wala nguzu zyaku Seva. ³⁰ Kwiva mkati ni uzyukululwe, vantu vakakutola ninga kutolwa. Ebadala yakwe vantu vakuva kate vamalaika va kwilunde. ³¹ Ila ihusu uzyukululwe lya vafwile, vakali vasomage icho Seva akuyomba kuwinyu, mbeoyomba, ³² Ene ndi Seva waku Iblahimu, Seva lyaku Isaka, ni Seva waku Yakobo? Seva akali Seva wa vafwile, bali Seva wa awo vali ni upanga.'' ³³ Itungo isangizyo ahondivigwa ili, ndivakamalwa mahembeko gakwe. ³⁴ Ila Masadukayo ahondivigwa iva Yesu avapumbuzya Masadukayo, ndivikusanya vasava kuu hakimo. ³⁵ Uyo wao, mbeava mntu wa miiko, ndamuuzya iswali kulingema. ³⁶ ''Muhembeki, amli kii yili hanya kukila zyose mkati ni miiko?'' ³⁷ Yesu amjibu, ''Lazima umlogwe mgosha kumwego gosa, ku mwego kwako gose, niku msala gako gose. ³⁸ Ila ndio isemzya ihanya ni ya kwanza. ³⁹ Ni ya uvili yikolile nayo - lazima limtogwa mzengano wako kate ivyo wilogilwe eve msava. ⁴⁰ Miko zyose ni valaguzi vakutegemeaga isemzya ezi ivili.'' ⁴¹ Ni Mafalisayo ahondivali vakali vikusinye hakimo, Yesu ndavauzya iswali. ⁴² Ayomba, ''Je!, Mkwiganika kii kwigulya ya Kristo? Msava mwana lyaku nani?'' Nao vamjibu, ''Mwana lyaku Daudi.'' ⁴³ Yesu avajibu, ''Kunamna kii Daudi mkati ni mwego akumwitana Mgosha, ayomba, ⁴⁴ ''Mgosha ndiamvalila mgosha wane, ''Ikalamuoko gwane gwa mgosha, hadi ahonkava vezya vavi wako vatulwe msilili ni migulu zyako.'''?'' ⁴⁵ Kati Daudi akumwitana Kristo ''Mgosha, ''Namna kii akava mwana wakwe?'' ⁴⁶ Kuduhu uyondakola linjibu igambo hangi, na kuduhu uyondasubutu hangi limuzya emaswali kukila kufuma lusiku lunulo nilyendelea.