¹ Kigheri kya shindo sho, Paulo elekure Athene dambuka Korintho. ² Ipo kamwacha Myahudi e chedikirwa Akwila mndu kabila ja Ponto, icho na mkake, echedikirwa Prisila velecha ifuma ipo italya, ko kitevi klaudia elededa Wayahudi vose vakure Roma; Paulo kacha kwavo; ³ Paulo kadamiya neuta uya navo ifananiye navo. Ivo veleva vetobira numba. ⁴ Paulo kadediana navo katika sinagogi kila furi ya sabato. Elevaghalwa Wayahudi kimu na Wagiriki. ⁵ Kake Sila na Timotheo vecha ifuma ipo Makedonia, Paulo eletindikwa na Ngoo ivalambwa ke Yesu ncho Kristo. ⁶ Kigheri Wayahudi vemkava ne mwinyala, Paulo kakutakuta kidamia kyake ushangunyi lwavo ne vavia, ''Ndakame yanu ive uye ya mido yanu mvenyi; Inyi ngalaode unyamari. Ifuma lwaha na furi singi na vadambuka orikenyi.'' ⁷ Kakure ifuma aja kadambuka numba ya Tito Yusto, Mndu enemtereva Makilunga. Numba yake ikeri kufui na sinagogi. ⁸ Krispo, mdue o sinsgogi kimu na vandu va kanyi kwake vakamkunda Mndumi. Vandu va foje va Korintho velemwicha Paulo ekededa velemwidikija ne vikywa mrinywa mringa. ⁹ Mndumi kambia Paulo kiyo ko njia ye loswa, ''Ulaogwe, kake deda na ulove sau. ¹⁰ Kwani inyi ngakeri kimu aigwe, na kodepo apereghesha kunyamara, mana ngaode vandu vafoje katika mri chu.'' ¹¹ Paulo kadamiye ipo ko kigheri kya mwaka umu na mieri sita elosha kidedo kya Makilunga miongonyi mwavo. ¹² Kake Galio eleutwa mdue o Akaya, Wayahudi velemkana kimu kinume na Paulo ne mdamada ushaghunyi lo kitiri kye hukumu, ¹³ Wakadeda, ''Mndu chu hughalusa vandu va mtereve Makilunga kinuma na sheria.'' ¹⁴ Kigheri Paulo aurideda, Galio kavavia Wayahudi, ''Inywe Wayahudi chakoja ivekeri nyi unyamari, ivekeri loi ivautiya. ¹⁵ Kake nyi kitevi nyi vesera shehusu shidedo na marina, na sheria sanu asi mpungenyi inywe mvenyi. Inyi ngape idikijapo iva mdue ko habari ya shindo sho.'' ¹⁶ Galio kavaongoja vakure ushangunyi lo kitiri kya kipungo, ¹⁷ Kokyo, vakamwada Sosthene, mdue o sinagogi vakamkava ushangunyi lo kipungo. Kake Galio elemanya namapo kode kindo vautapo. ¹⁸ Kigheri Paulo, eledamiya aja ko kigheri kile hye elevatija vandu nedambuka ko meli Siria kimu na Prisila na Akwila. Kabila ye kure bandarinyi eleuta mbii sake evekeri amelegha iva mnadhiri. ¹⁹ Veshika Efeso, Paulo elemtija Prisila na Akwila na aja, kake icho amonyi eleighya sinagogi nededa na Wayahudi. ²⁰ Vembia Paulo na damiye navo ko kigheri lkilehye, icho elelegha. ²¹ Kake kakura kwavo, kavavia, ''Ngapeuya kwanyi, ikava ukundo o Makilunga.'' Kigheri kyo, kakure na meli ifuma Efeso. ²² Paulo eshika Kaisaria, eledoja nedambuka idikira ikanisa ja Yerusalem, alafu kasoka ghwanda ikaniseni ja Antiokia. ²³ Baada ye damiya ko kigheri aja, Paulo alekure iidya maeneo va Galilaya na Frigia ne vaningya ngoo valosho vose. ²⁴ Myahudi umu echedikirwa Apolo, eleonikya ipo Alexandria, elecha Efeso. Evekere ndughuchane deda katika maregho. ²⁵ Apolo evekeri amelorwa katika malosho va Mndumi. Chakundu eveode na bidii katika ngoo, elededa nelodhwa shindo, shinakwinyari Yesu, kake nyelemanya ubatizo wa Yohana. ²⁶ Apolo kaivoka ideda akarije katika hekalu. Kake Prisila na Akwila veleichwa, veleadaumbuya nacho na vakamwongoja uye ya njia sa Makilunga ko necha. ²⁷ Efuda ikure idambuka Akaya, vandu velemningya ngoo ne veireghya barua valosho vekeri Akaya vaningwa umwadija. Eshika ko mbora elevatarama mnu vaja veleidikija. ²⁸ Ko pinya sake na urango, Apolo elevafoja Wayahudi hasarani elora iidya maregho va Yesu ncho Kristo.