¹ Yesu akaingia na akaiva maghari ya Yeriko. ² Na iho haghire mndu umwi alilaghwa Zakayo. Nile mrwe wa vaghethanga kodi kangi ni mndu mthuri. ³ Alekyaghera imvona Yesu ku ni mudu wa mbarenjiki, mira akaherwa aimbona vvandu vwaa ifio ya vandu , kwaku nilemghwihi. ⁴ Hena kwio akathongoa akyavicha mothia ya vandu , akuvea kaghu ya mkuyu kimetha airime ivona, kwaku Yesu alekehaghwihi iira hena njiayo. ⁵ Igheri yo Yesu akina fike handu ho akalolea kaghu akambia,"Zakayo gharafia , ang'u ithanya nimthari ni finde kenyi kwapfo. ⁶ Akakatha fiafia, akaghara na akamghuia kwa inuliwa. ⁷ Vandu voshe wakinavone kwio vakadughunyika, wakirera, "Andeghenda ighemkusha mndu aghire thambi'. ⁸ Zakayo akamka akambia Mdumi, Lolea Mndumi nutghu ya mari yakwa nichivanika vakiva , na kole nimthokie mndu wowoshe kindo , namvwighiria kando kana. ⁹ Yesu akambia, "Ithanga ikivwa lindefika hena nyumba ii, kwaku nawe ni mwana wa Ibrahimu. ¹⁰ Kwaku Mwana wa mndu achie igheshigha na ikira wandu warekie. ¹¹ Vakinaichwe kwio , akaendelea igaya na ifunya fwanyanyi, kwaku aleke haghwihi na Yerusalemu, navo vave kyavirikana ku vumangi vya Ruva vukehaghwihi ivoniwa kamwi na kamwi . ¹² Henakwio akavavia, Ofitha umwi aleghendie ithanga ya kua kimetha aghenikwa kifumwa niho anavwie. ¹³ Akavailagha vahirindima vakwe ikumi , akavanika mafungu ikumi, akavia , "hirenyi biashara mpaka nivwie. ¹⁴ Mira vandu vakwe valemfurie vo. hena wakaruma vanjama vaghende vamviivarie na rarere, "Mfwashighafwa mduu ave mangi weru. ¹⁵ Iho ahinavwie kenyi ahinagimbikwe iva mangi, akamuru wahirindima vaya alevareghirie petha vailaghire kwakwe, kimetha airime imanya ku ni faida njiki vachembie hena ndima ya biashara. ¹⁶ Wevoka akacha, akarera Mangi , Ifunga yapfwo lindechemba mafungu mengi ikumi . ¹⁷ Ofisa wia akambia , Nikicha ,mhirindima mcha .Kwaku kunderia mma hena kindo kidu, kwara mrwe kaghu ya miri ikumi. ¹⁸ Wia wakati akacha , akarera,Mangi ,ifungu yapfwo lindechamba , mafungu mengi atanu . ¹⁹ Afitha uu akambia, 'Ondoa vurwe kaghu ya miri itanu. ²⁰ Na ungi akacha , akarera, "Mangi petha yapfwa hayo ii, nileithughene nigha hena kitambaa, ²¹ Ang'u nileovohie kwaku iwe ku mndu mkai.Kuchivata kia kurakivikie na kuchikova kia kurakiviee ²² Afitha wia akambia ,"Kwa firero fyapfwo kweka nakunyanyiria, iwe mhirindima mbichwa .Kuleichi ku inyi ni mndu mkai, nichiondoa kindo thirakivikie, na ikova kindo thiraki viee. ²³ Luvaha haniiki kuravevika petha yakwa hena benki, kimetha nikivawia niiondue hamwi na faida. ²⁴ Ofitha akavavia vandu walemki ho, "Mtokenyi ifungu yo mumnike wia aure mafungu ikumi. ²⁵ Vakambia "Mangi we aure mafungu ikumi. ²⁶ "Nnamuvia kila mndu aghire kindo anikwa na kingi, mira wia araure, hata kia aure kyaondowa. ²⁷ Mira vantho vayavakwa, varavekyashigha nive mangi wavo vaendenyi ha ra muvavwaghe mothia yakwa. ²⁸ Akinamalie ivera kwio, akadunga ndambo ye kwea ighenda Yerusalemu. ²⁹ Akinave andefika haghwihi na Bethfage na Bethania , haghwihi na ifumbu ya miri ya mafwa Mizaituni, akavaruma vathoro vakwe vavi, ³⁰ akarera ,"Ghendenyi hena kamvi iho mothia. Igheri mwaingia ,mwavona punda ivanakavwa. Irughuenyi , munjiendie. ³¹ Kole hakaghira mndu andemwetha "Haniiki mwairughulia? "Rerenyi, "Mndumi akyaishigha. ³² Vaya varumiwe vahaghenda vakaivona punda thafundu Yesu avevavirie. ³³ Igheri mvwa irunjua veni punda vaha vavia ''Nikwia mmwairunjua punda yo?" ³⁴ Vakarera, "Mudumi ahiyaishigha". ³⁵ Niho, vakamtikia Yesu, vakaala thori tatho kaghu ya punda na vahamkwera Yesu kaghu yakwe. ³⁶ Akinadunye ndambo vandu vakaala thori tavo hena njia. ³⁷ Igheri akyaghara hena ifumba ya miri ya mafuia,ihundi yoshe ya vathoro vakadunya ikawa ngululu na imtumbisha Ruva kwa irwi irwe, Kwaku vande vuna kimako. ³⁸ Vakarera," Niwe mghetumbishwa Mangi akya cha kwa irina ya Mndumi! Vumboa kaghu na vurwe khagu!" ⁴⁰ Mafarisayo mata hena mathomano vakambia, Mloshi, vavie wathoro vapfwo vatie. ³⁹ Yesu akaghaluta, akarera, 'Nnamuvia,kole iva vakatia, maghwe ghaghona.' ⁴¹ Yesu akinafike haghwihi na mri, akaufughia, ⁴² Akarera, nanga kuvemanya na iwe, hena mfiri nu findu ngefyo mfyakuedia mborere! Mira luvaha fithughenwe mithonyi kwapfwo. ⁴³ Kwa ku mifiri ichie nngeho vavichwa vapfwo waagha iboma ghaghwihi na iwe, na ikujungulika na ikufweterea ifumia kila ughongo. Vakughuta mbai iwe na vana vapfwo. ⁴⁴ Vakakulekelevo nanga ighwe himwi kaghu ya lingi kwakuta kundemanya pfwo igheri Ruva alekyaghera ikukira. ⁴⁵ Yesu akaingia kanithenyiahadunga ivaritisha wanndu vawekya kumba findo. ⁴⁶ akavavia ," Kiandikwe," Nyumba yakwa nigelomba " mira imwe mndeighuta ikawa mbanga ya vavango. ⁴⁷ Hena kwio ,Yesu alechilosha kila mfiri mthonyi . Makuhani varwe na valoshi vasheria na varwe va vandu vakashigha imvwagha, ⁴⁸ mira vakaherwa ivona njia ye hira kwio , kwaku vandu voshe valekya muirania nicha.