¹ Bathi haleghire mafarisayo umwi alechiilaghwa Nikodemo, we nile jumbe wa Ibaratha ya Vayahudi. ² Mndu tho alemivaivarie Yesu kio emvetha , "Rabi guichi ku mwalimu ifuma kwa Ruva , kwaku haghireho mndu airima ishara kwa ti toshe kole Ruva areke nawe. ³ Yesu emghaluta , "Amini amini mndu airimawe iingia hena vufumwa fwa Ruva araghiriwe kakavi . ⁴ Nikodema Emvetha ,Mndu airima kwia ighirwa nighe mghothi? Airima he iingia hena ndenyi ya mae kakavi aghirwehe kakavi?. ⁵ Yesu eghaluta , "Amini amini mndu araghirwe kwa mringa na kwa mbeho airimawe iingia hena vufumwa fwa Ruva . ⁶ Kighiriwe kwa mwiri ni mwiri na kighire ni mbeho ni mbeho. ⁷ Kunandemaka kwaku ndekuvia ku ni lathima ughirwe kakavi . ⁸ Mkuta uchibuma ughongo loloshe ufurie na irwi yakwe mwaliichwa , mira muichi handu ufumieho wala handu uaghenda . Ni fu hali mndu aghiriwe ni mbeho ikei. ⁹ Nikodemu avetha ku "findo fyo fyairimika kwia? ¹⁰ Yesu amvetha "Iwe ku mwalimu wa Israeli mira kuichipfho findofyo?. ¹¹ Amini amini niakuvia ku kia fukiichi fuchikishuhudia kwa kia fukivonire . mira muaghuhia ushuhuda lwerumwe. ¹² Kole niamuivia findo fya iha ithangenyi mira muaitikijamwe , Mwairimakwia iitikija ni kamuvia findo fya ipfho kaghu? ¹³ Kwaku haghire mndu akwerie ipfho kaghuho there mrana wa Adamu agharie ifuma kaghu . ¹⁴ Fundu Musa alevutirire njoka jangwani , ni kwio kwio mrana wa Adamu ni lathima avutirwe. ¹⁵ Kimetha ku voshe vaikija vavone ikia ya telele. ¹⁶ Kwaku ni kwii fundu Ruva alelifurie ithanga , mpaka emruma mrana wakwe nighe umwi du kimetha kila amitikija anandereka mira aghire ikia ya telele. ¹⁷ Kwaku Ruva amrumiewe mrana wakwe ithangenyi kimetha alinyanyire ithanga , mira ku ithanga likirwe hena we. ¹⁸ Amuitikijire anyanyirwawe . Aramuitikijire eninyanyirwa kwaku andeliitikijawe rina ya Mranatho wa Ruva nighe umwi du. ¹⁹ Kyaruma vanyanyirwe ni kwaku kilanga kindecha ithangenyi kwaku mira vandu vakafura mma ikile kilanga kwaku mihiro yavo nile mivichwa. ²⁰ Kila mgherira fivichwa achikidaha kilanga kangi achicha Kilangenyiwe kimetha mihiro yakwa inandevika haelie. ²¹ Mira mghehira keni achicha Kilangenyi kimetha mihiro yakwe ivonwe ku ihirirwe nicha hena Ruva. ²² Baada ya iho Yesu na vanafunthi vakwe veghenda hena ithanga ya Yudea. ipfho eikaa kamtungo navo akyabatitha. ²³ Igheriyo Yohana nawe alekyabatitha ipfho Ainea avwihi na Salim kwaku haleghire mringa mwingi . vandu vecha kwakwe vebatithwa. ²⁴ Kwaku Yohana aleko apfhungwa jelawe. ²⁵ Luvaha hefumia ibashana ya vanafunthi va Yohana na myahudi umwi ihuthu thikukuu ta vuelesho. ²⁶ Veghenda kwa Yohana vemvia , "Rabi , mndu uya aleke kimunu kya mfo wa Yordani uya kulefuvirie mburi takwe akyabatitha na vandu voshe vakyamuivaria " ²⁷ Yohana eghaluta ku mndu airimawe ighuhia kindo kyokyoshe , theremiku kole akinikiweifuma ipfho kaghu. ²⁸ Imwe mweka muarera ku nilemuvirie ku inyi thi Kristonyi , mirakyo nileghambie ku nirumiwe mothia yakwe ²⁹ Uya ake na mwali wa haruthi niwe mthoro wa harusi. Mbwiaye mthoro wa haruthi akyamkia iiramia achiidhihirwa fundu fwa irwi ya mthoro wa hatuthi. Luvaha ili niyo iidhihirwa yakwa. ³⁰ Kitarire we aongereke mira inyi niduike. ³¹ Itho afumie ipfho kaghu ake kaghu ya fyoshe . itho nighewa ithanga afumie ithangenyi kangi achirera findon fya kiithanga . itho afumie ipfo kaghu ake kaghu ya fyoshe . ³² We achirera findo afivonire na ifiichwa, mira haghire akyaghuhia kirero kyakweho. ³³ Aurikilie ushuhuda lwakwa ahakikishire ku Ruva ni wa keni. ³⁴ Kwaku mndu arumiwe ni Ruva achirera firero fya Ruva kwaku achimnika mbeho kwa kipimowe. ³⁵ Papa amfurie mrana na amnikie finfyoshe mavokonyi ghakwe . ³⁶ Mndu uya amuitikijire mrana aghire ikia ya telele . mira uya arakyamuirania mrana achevonawe ikia ya telele , mira idung'a ya Ruva lichivwarana nawe.