¹ Kwa enjira hinu bhanu mri abhakari mrenderwa mwirushe kubhasaja bhenyu abhene kwo okubha bhatarikirirya ering'ana rya Waryubha kuhitira entemo gya abhakari bhabho bharatura okuikirirya ering'ana. ² Kwa okubha abhene bharora entemo yenyu enjomu ³ Rinu rikoreke siku mang'ana ga kibhara okusuka egitukya egijahabu na egigibho eginjomu. ⁴ Nawe riyo rikoreke munsi mmtima okurwa kwa obhujomu bhwa okuisuiya na obhuteremu bhwa emitima gyenyu. ⁵ Kwa okubha abhakari abharabhu bharejomiya abhene okuitira obhurabhu bhwabho abhene. ⁶ Kwa orusumo Sara yamwigwa Ibrahimu na okumubhirikira omkuru waye. Bhenyu bhono mribhana bhaye mkore amajomu mtobhoha mkore amabhibhi. ⁷ Kwa orusumo ruyo ruyo bhenyu abhasaja mrenderwa okuikara na abhakari bhenyu mmanye ege abhakari bhenyu bhatana nguru mbhamanye bheki mbhagegi bhari kyetu bhe jawadi gya obhuhoru mkore ego kwa okubha amasabho genyu getegererwe. ⁸ Kubhutura bhenyu bhonsego mbhe na omgambo yumwi ogwa ekibhebhe, obhuhanje kya abhahiri abhesuiya na abhanyohu. ⁹ Mtige okunhana kwa obhubhibhi kwa obhubhibhi kora mtatuka na kwo amatuki kasi mgendererye okunonkya kwa okubho mwabhirikirwa okubha mbhe abhagabhi bha ennonkwe. ¹⁰ Unu araribhirire orurimi rwaye rwa amabhibhi na eminwa gya eking'era. ¹¹ Ukiyoke atige okukora amabhibhi ukore amajomu otume obhwikari obhujomu. ¹² Ameso ganu gararora obhuhene na amatwi, ganu garegwa amasabho gaye. Nawe obhusubhwa omukuru atari nawe hamwi. ¹³ Niwi arabhajera bhenyu hanu mrabhe no enamba ya okukora amajomu. ¹⁴ Nawe hanu mranyake kwo obhuhene ononkererwe mtobhohe ganu bheki bharaobhoha. ¹⁵ Mmture omukuru wetu Yesu Kristu muntinu gwenyu kwa okubha mrabha omuntu wose wose yeseremye okuhunjura bhanu bharabhurya bhenyu mna obhuisige ku Waryubha. Mmbhe ego kwa obhujomu na entemo enjomu. ¹⁶ Mbhe na obhwendi obhujomu kubhantu na bhanu bharatukuka kugisiku eginjomu ku Kristu Yesu bhasuke kwa okubha bharahaira ganu bhenyu bhatakwenda mna mwaringa mrakora amabhibhi. ¹⁷ Mbhujomu bhukongu hanu Waryubha mwegombanga kwa okubha mwakora amajomu mtakora amabhibhi. ¹⁸ Omkuru Yesu yakwa rumwi kwa obhusarya weki hanu yaringa omuhene yatuikirirya bhetu hanu tutanga abhahene kyego otuire ku Waryubha kumubhiri yakwa nawe yakorawa omuhoru mmtima. ¹⁹ Mmtima yagya okuihigikya emtima ginu giringi mkibhoe. ²⁰ Gitanga nyitegereru na mteremku Waryubha hanu bhaganyirira nga eribhaga rya Nuru. Eribhaga yo obhuhagaji bhwa Eryato. Waryubha yaturya abhantu bhake nkoro mnane okureka mmanji. ²¹ Runu ndubhaso rwa obhubhatijo runu rurabhaturya bhono bhenyu. Kutari okogya obhukotu kumubhiri Nawe kwa obhwendi obhujomu ku Waryubha. Kuitira obhuyuki bhwa Yesu Kristu. ²² Weki aringi okubhoko kwo okuryo kwa Waryubha yagwa mruire malaika obhituro eginguru bhyonsego bhya musigwa.