¹ Pano abantu kabalilishanya pafya kukatasha kwabo ili ba Yawe balukukutika. Ba Yawekababomfwa abantu ne kufitwa. Umulilo ukufuma kuli ba Yawe kaokya mukachi kabo ne kokyapo amakambi amo ukupelele lukoso. ² Penka abantu kabamwita Mose, na Mose katembela kuli ba Yawe, ne mulilo alilekele. ³ Nailya nkende kabaita ati tabele, pantu umulilo waba Yawe alyakile mukachi kamo. ⁴ Ne bantu abeni balitendekele uwikala ne fikolwe ifya nkambi yaba Isilaeli. Balukufwaya ifya kulya ifiweme. penka abana ba Isilaeli batendekele ukulila ne kulabila ati,' ''mbani nani ukatupela inama iya kulya? ⁵ Twaanuka amasabi ayo twalukulya mukukakuluka mwi Injipita, Ifibimbi, baina munwa, ifitungulu, kanyese, na kali ki. ⁶ Ne kilaka kyesu kyapwa, mulandu fyonse ifi tulukumonako fye ni mana.'' ⁷ Maana ali kwati ni mbuto sha bwengo. fyalikuboneka kwati fyakulya ifitobele. ⁸ Abantu balukupitana konse konse ukulukutola. Balukufipela pa mabwe, ne kufitwa mufinwi, kufiteka munongo, ne kufipange mikate. Fyalikufwika koti mafuta abukumo a Olifi pa kufilya. ⁹ Ili ikime kyali kupona ubushiku mu nkambi, na maana naye alukupona. ¹⁰ Mose alyumfwile abantu balukulila mu fifyashi fyabo, ne muntu onse ali pa mulyango we tente lyakwe. Ba Yawe kabafitwa apakulu makosa, kabili mu menso akwa, Mose ukulilishanya kwabo kwalibele kilubo. ¹¹ Mose kalabila kuli ba Yawe ati,' ''mba nondo mwamukichila ikibipile umusha wenu? mba nindo tamubelepo ne kusekelela na nemo? Mwandenga nemo ukupinta umutembo wababa bantu bonse. ¹² Nali bemichilepo aba bonse abantu? Nalibafyelepo aba bantu bonse pakuti mulabile kuli nemo ati,' 'Bapinchile apepi ne nchibi yobe kwati fifyo Wishi apinta umwana?' Ninga bapinta ku kyalo ikyo mwachipile kufikolwe fyabo ukubapela? ^{13 14} Mba nikwepi uko ningasange nama isha kupela abantu bonse? Bali kulila ku menso angi ne kulabila ati,' 'Tupeleni nama tulye? Teti nkonshe ukupinta abantu bonse bushimwa bwangi. Bamfulila nemo. ¹⁵ Pamulandu wakunkatasha muli iyi nshila, ngipayeni lwenka Luno - nga kya kwebati nakebwa bwino mumenso enu - mwileka mone ifyakupenga kwangi.'' ¹⁶ Ba Yawe kabalabila kuli Mose ati, ''Ukalete abakulu mu Isilaeli amakumi asanu na abili. Mukamone ukwebati bakulu kabili ifilolo fya bantu. Ukabalete kwi tente lyamakumanino mukwimakana pamo na webo. ¹⁷ Nkesa panshi na mwebo kulya. Ndine ne kutolapo umupashi uli pali webo ne kumubeka pali bo. Bali ne kukupichishako ifipinto fya bantu. Tawakafintepo bushimwa bobe yowo. ¹⁸ Labila ku bantu ati,' ''Ushilikeni mwebene, pakuti ubwamailo ikino muli ne kulya nama, pantu mwalila na ba Yawe baumfwa. Mwalilabile ati,' ''Ninani uli ne kutupele nama ya Kulya? Kyalituwamine fwebo mu Injipita.'' Pakuti pali fyefyo ba Yawe bakatupele nama, na mwebo muli ne kuilya. ¹⁹ Tamwakalyefye nama pa kasuuuba kamo, inshiku shibili, inshiku shisanu, inshiku kumi, nangula ishiku amakumi abili, ²⁰ Lomba mukalya, nama umwenshi utuutulu, ukufika nefi ikafumina mu myona yenu. Kikamibipileni pantu mwabakana ba Yawe, abali mukati kenu. Mwalila ku menso akwe. ²¹ Kabili Mose kalabila ati, ''ndine ne bantu abali 600,000, kabili mwalabila ukwebati,' 'ndine kupela nama ukulya pa mwenshi umutuutulu.' ²² Kani twipaye amatanga amokoko ne ñgombe pakwebati bekute? ²³ Ba Yawe kabalabila kuli Mose ati, ''Kanshi ukuboko kwangi kwipipile? Eli mukamona kani ama shiwi angi akine nangu abufi.'' ²⁴ Mose alifumine pesonde ne kweba abantu amashiwi aba Yawe. Ali babungenye bamakumi asanu na abili abakulu babantu ne kubemika ukushinguluka tente. Ba Yawe kabesa panshi mwi kumbi ne kalabila kuli Mose. ²⁵ Ba Yawe kabatoolapo umupashi uwali pali Mose ne kumubika paba makumi asanu na abili abakulu. Ili umupasahi aikele pali bo kabasesema, Lomba pali yenka ilya mpindi lukoso ne kubula ku bweshapo libili. ²⁶ Abalalume babili kabashala mu nkambi, Abamashina Elodada na Medadaa. Nabo umupashi kaikala palibo. Amashina abo alibele pali babo abalembelwe, pakuti tabafuminepo pesonde ye tente. ²⁷ Umusankwa uwali munkambi kabutuka ne kweba Mose ati, ''Elodada na Medada bali kusesema munkambi.'' ²⁸ Yoshiwa umwana wakwa Nuni, inkonkani yakwa Mose, umo uwa pa balalume abasalilwe, kabalabila kuli Mose ati, ''Mweba Shikulu bangi ba Mose, bakanyeni.'' ²⁹ Mose kalabila kuli ye ati, ''Uli ne kika ni pali nemo? Nalanguluka kanshi abantu bonse ababa Yawe nga balibele bakushimika ne kubika umupashi pali bo bonse!'' ³⁰ Penka Mose ne bakulu ba Isilaeli kababwela kunkambi. ³¹ Penka umwela kaisa ukufuma kuli ba Yawe ne kuleta ifitentu ukufuma ku kishiba. Kafiponena apepi ne nkambi, koti lwendo lwa kasuba kamo kulubali lumo ne lwendo ulwa kasuba kamo kulubali lumbi. Ifitentu kafishinguluka nkambi koti makyubichi abili peulu ya mushili. ³² Abantu kabatabankana ukulukuwola ifitentu akasuba konse kalya, ubushiku bonse, ne bushiku bonse ubwakonkelepo. Tapalipo uwabungenye munshi ya ifitala fya kwanikapo fyi likumi limo ily fitentu. kaba bana bonse fitentu munkambi. ³³ Ili nama yali pakati ka meeno abo, ili balu kufisheta, Ba Yawe kababa ffitilwa. Ali balukukile ne bulwele ubuklu. ³⁴ Ilye nkende kaitwa ati Kibiloti - Hatafa, pantu kulya eko bashikile abantu abalukukumbwa nama. ³⁵ Ukufuma ku Kibiloti - Hatafa abantu kabaya ku Haselofi, uko baikele.