¹ Lomba ba Yesu ili ba lukupita,bali bwene umuntu uwafyelwe bumpofu. ² Penka abasambile babo bali bepwishe ati,'' mwe ba Labi, mba ninani uwabifishe, niuyu umuntu umwine kani aba mufyele pakutiafyalwe bumpofu?'' ³ Nabo ba Yesu ne kwasuka ati, ''Taali umwine kwabifishe, neli aba mufyele, sombi ati imilimo ya ba Lesa ikabonekele muli ye. ⁴ Natupyunge imilimo iya babo abantumine ili pakiswetele, pakuti ubushiku bulukwisa ili neli umo muntu akapyunga imilimo. ⁵ Ili nkili mu kyalo, nine ukutuba kwa muyalo.'' ⁶ Pauma ba Yesu balabile ifi fintu, bali shipile amate panshi, ne kukitaamatipa na mate, ne kuya shinga mumenso yakwe, ⁷ Nokulabila kuli ye ati,'' koya, usambe mushiba lya Shiloami'' (Ishiwi ilyo pa kwalika ati lili tuminwe). Lomba alilile, ne kusamba, ne kubwela ili alaba bwino. ⁸ Penka abo alukwikala nabo nababo abalu kumubona ili alukulomba lomba lukoso, balukulabila ati, ''kanshi uyu teuyu ulukwikala ne kulukulomba lomba lukoso? '' ⁹ Bamba balilabile ati, ''Niye, ''bambi nabo ati'', koku, sombi balipalene koti niye, ''Lomba alilabile umwine ati, ''enemo opele.'' ¹⁰ Penka balilabile kuli ye ati, ''Lomba kanshi amenso yobe ya shibilwa shani? ¹¹ Naye ne kwasuka ati, ''Niuyo umuntu kwitilwe ni Yesu akilenga amatipa ne kushinga pa menso yangi ne kulabila kuli nemo ati, 'Koya ku Siloami usambe, 'Eli nakiya ne kusamba, Elina napokelela ukulaba.'' ¹² Nabo ne kulabila kuli ye ati, mbo yo ali kulipi? naye ne kubasuka ati, ''Nshi shi po.'' ¹³ lomba yo uwali nimpofu akale balimutwele kuba Falisi. ¹⁴ Lomba kali kasuba ka Sabata ili ba Yesu balikitilepo amatipa ne kumu shibula amenso. ¹⁵ pakuti pali fyefyo aba Falisi bali mwipwishe libili ati mba webo walaba shani. Naye ne kulabila kuli bo ati, ''matipa anshingile mu menso, eli na sambile, eli pano ninga laba.'' ¹⁶ Sombi bambi aba Falisi balilabile ati, '' Uyu muntu taatulile kuli ba Lesa pakuti talama isabata.'' Na bambi balilabile ati, mbo muntu uwakubifya koti aishiba shani ukukito twishibilo utwakube fi ?'' Penka pali bene kwanika pakuti kabo. ¹⁷ Sombi bali mwipwishe libili uyo wali nimpofu ati mba webo ulu kumweba shani uyo, pakuti akushibula amenso obe?'' Naye uwali mpofu ati, wakushimika. '' ¹⁸ Sombi aba Yuda kabili alaba ili tabanga beta aba mufyele uyu uwa shibwile amenso yakwe. ¹⁹ Nekubepusha aba mufyele ati kani uyu mwana wene uyo mulukwabila ati alifyele nimpofu? Mba fyo alaba shani bukumo? ²⁰ Penka aba mufyele bali baswike ati, ''Tulishi ati uyu mwana wesu kabili ati alifyelwe impofu. ²¹ Lomba ifi ako laba bukumo, tatwishibilepo, neli ni uyo uwa mushibwile amenso yakwe, tatwishibilepo yowo. Nga mumwipushe, umwine mukulu, nga alilabile umwine.'' ²² Aba mufyele balilabile ifi fintu, napakuti pakutima aba Yuda. Nipakuti aba yuda kale basuminanshenye ati kani umbi akasuminishe ati uyo ni Kilishitu, uyo baka mutamya ukufuma mu Shinagonga. ²³ Nipali fye, aba mufyele balilabile ati,'' Mukulu, mwipusheni umwine.'' ²⁴ Penka bali mwitile libili uyo uwali ni mpofu ne kulabila kuli ye ati, ''Kopela ba Lesa ubuleme. Pakuti tulishi ati uyo muntu nimbifi.'' ²⁵ Naye nekubasuka ati, nshishipo kani nimbifi. Ikintu kimo euyo njishi: Ati nali ndimpofu, bukumo ndukubona.'' ²⁶ Nabo balilabile kuli ye ati, Lomba ali kukitile shani? Mba alikushibwile shani amenso obe?'' ²⁷ Naye ali basukile ati, ''Namyebeni bukumo, tamumfwilepo! mba nindo mulikufwaya mwebo ukuba abasambile bakwe, mulukufwaya? ²⁸ Penka bali mutukile nekumweba ati, ''We ewe musambile wakwe, sombi fwebo tuli basambile bakwe Mose. ²⁹ Tulishi ati ba Lesa balukulabilila muli Mose, sombi uyo muntu tatu mwishi ukwafumine.'' ³⁰ Naye uyu muntu alyaswike ne kulabila kuli bo ati, ''Iki kyakukankamana, ati mwebo tamwishipo mwafumie uyo, pakuti ye ali nshbwile nemo amenso. ³¹ Tulishi ati ba Lesa tabomfwa kubakubifya, sombi kani umuntu alipelesha ne kukita ukufwayabo, uyo bala mumfwa. ³² Ukufuma kulengwe kwa kyalo takwaumfwanikilepo ati pali uwashibwile umuntu uwafyelwe ukumpofu. ³³ Kani uyo muntu tatulile kuli ba Lesa, nga taalukitapo neli kintu. ³⁴ ''Nabo nekwasuka ne kulabila kuliye ati, ''webo wali fyelwe lukoso mufyakubifya, lomba ulukutusambilisha fwebo?'' Penkapo balimuposele pesonde. ³⁵ Ba Yesu baliumfwile ati bamuposa pesonde lyo amaShinagonga. Lomba bo kabamusanga ne kulabila ati, '' Kanshi webo ulukutekela mu mwana wamuntunshi?'' ³⁶ Naye ne kwasuka ati, mboyo ninani,Shikulu, ati ngishibe ukuketekela muli ye?'' ³⁷ Ba Yesu nekumwasuka ati,'' ulimubwene, kabili eye ulukwambala na webo.'' ³⁸ Naye umuntu alilabile ati, ''Shikulu, Naketekela, ''Lomba ye ne kubalambila bo. ³⁹ Ba Yesu balilabile ati, ''Mu kusololola ngishile muno mu kyalo kya panshi ati bao aba tabalukulaba ba kalabe ati kabili naba bo abalukulaba ati bakabe nimpofu. ⁴⁰ Penka aba Falisi abo ali nabo baliumfwile ifi fintu ne kumwipusha ye ati, kani nafwebo tuli mpofu?'' ⁴¹ Ba Yesu balilabile kuli bo ati, Kani mwali nimpofu, nga mukwete ukubifya, sombi mulukulabila ati, tulukulaba,' penka ukubifya kwenu lomba kukiile.