¹ Tetimpose impindi mukulembeleni ifya kyebo kyakofwako abantu aba ba Lesa aba mukyalo kya Yudiya. ² Pakuti ndishi ati mwasumina kale ukofwako, kabili namutoteni naku bantu aba kyalo kya Masendonya. Nalibabulile ati, ''Abakwasu aba mukyalo kya Akaya bali talikile iyi, milimo yakofwako muli uyu mwaka uwashilile.'' Lomba kusantuka kwenu kwali bushishe mitima yababo abengi. ³ Pano natuma aba abakwasu, ukwebati ukulitota kwesu ukwakuli mwebo pali kiki kyesbo kwingeso kuba mashiwi alukoso. ⁴ Sombi, eli Masondonya akesa na nemo elo kasange mwebo tamuli pekenye, pakuti twi nga abansoni - koti nifyopele fyo ifi nalabile pali mwebo- mwashike bwino ukofwako kwenu. ⁵ Penka efyefyo nali langulukile ati kiweme ukubatuma aba abakwasu ti bantangilile ukwisa ne kwashikila limo ifya bupe ifi mulayene ukupela. Lomba ili nkesa kasangane epo fili, kabili kikalangisha ati mulapela pakuti muli kufwaya lukoso ukupela, tepakuti paku pangilishiwa yowo. ⁶ Mulangulukefi ati: Uminsha tunini akatebula tunini, sombi uminshe fingi ne kutebula alatebule ifingi. ⁷ Abantu bonse balyelelwe ukupela koti nifyefyo ifi alukufwaya umwine, tekupela uwakubula ukutemwa, neli kupangilishiwa koku, pakuti ba Lesa balatemwa upela ne kusangalala ⁸ Kabili ba Lesa bali ne makosa akumupeleni nafimbi ifingi ukukila napakupenga kwenu, epa kwebati impindi shonse mulikwete fintu fyonse ifi mulukupengela, nafimbi ifyakupela ku milimo iweme. ⁹ Amashiwi aba Lesa alalabila ati, alapela ifingi kubapengele, inkumbu shakwe shamuyayaya.'' ¹⁰ Kabili ba Lesa abapela mbuti isha kuminsa nashinkwa wakulya bakamupeleni mbuto shonse ishi mulukupengela ebakalukufimesho ne kufifumisha, nekumipeleni fya kulya fingi ukufuma kunkumbu shenu. ¹¹ Ba Lesa bakamwaluleni babile ukwebati na mwebo mukabe ne fyakupela impindi shonse, ati abengi bakalukutota ba Lesa pakuti pakupela kwenu, uko bapoka kuli fwebo. ¹² Pakuti iyi milimo iyi mulukukita taili yakofwako lukoso abantu ba ba Lesa yoo, Sombi kabili ilukulengesha abantu abengi baluku batota ba Lesa. ¹³ Iyi miimo ilukulangesha ukupyunga kwenu ukuweme, Lomba abengi balukulemya ba Lesa pakuti pakumfwisha kwenu ukwa kyebo ikiweme kya ba Kilishitu iki musuminemo, napa bupe bwenu ubwa bana babo nabambi bonse. ¹⁴ Lomba bakaluku mutembeleleniko amatembelo ne butemwe ubukulu, pakuti pankumbu ishingi ishi bamupeleni ba Lesa. ¹⁵ Nga tubatote ba Lesa pakuti pampese yabo iya makwebo apatali akubulo kupendeka.