¹ Ye ap maksud, seola ahli waris iro kea tia-tia, da sa naan beda ye ali budak bele da ye puun se segala. ² Da naan te wa kuasa pengawas ye ngurus belai empe wayah ye apu na rencana ene ma da. ³ Nget ro ade kede taka kea tia-tia, taka na budak ene roh-roh dunia ihe. ⁴ Et iro kede olo pengganapan empe, Allah ngrim Tia-Da ye na belolos nehe erai ulun bawe ali na belolos te wa Hukum Taurat ⁵ dian taka mahan nerima na angkat jaji tia-tia Da. ⁶ Leka ko ye iro tia-tia Da, Allah apu ngirim Roh Tia Da tong suang ate taka, ye no'ok , "Abba, Ma." ⁷ Jaji, ko sa li budak, et tia. Aka ko ye iro tia, Allah pejaji ko ahli waris nyelalo Kristus. Iya Na Budak Li Ene Roh-roh Denia ⁸ One, ke ko sa ketaru Allah, ko ye iro budak neke hal-hal ye na dasar sa ka Allah. ⁹ Et, nehe, apu ko ketaru Allah atawa pengekune ye na kentaru ene Allah, nget me ko tau mulik li ntong rohroh denia ye lome ali sa be di? Se ko kakan na perbudak li? ¹⁰ Ko ngene perayaan te olo-olo, bulan-bulan, musim-musim ali taun-taun! ¹¹ Ap sa ronu ya-ya pitek laha ap ye apu ap ene dian ko jaji beloh bedi. ¹² Ap kaweng tong ko, erai butung, jajilah nget ap leka ap ade apu jaji nget ko. Ko sa besala nrong ap. ¹³ Ko ketoan, kede tela ye ap nengkabar Injil tong ko leka nare unuk ye ap inam. ¹⁴ Bele kondisi unuk ap ke ujian dian ko, ko sa ngehina atawa menolak ap. Se mulik ye, ko nyamut ap nget ap ihe malaikat Allah, nget seakan-akan ap ihe Yesus Kristus iro gales! ¹⁵ Nget me ali berkat ye ko inam iro nehe? Leka, ap tau besaksi leen ko one, amun tau, ngelogot mate ko ali ngokoi ye ntong ap ade ko hakun. ¹⁶ Se nehe ap jaji musuh ko ,leka mundru kebenean tong ko? ¹⁷ Ulun-ulun iro beusaha dian mahan ko, et sa ali aga ye buen. Dali kakan pekoro ko ali aga ko sagar ngeto dali. ¹⁸ Bene buaen aka seleur besemangat ngene hal-hal ye beaga buen, ali sa je kede ap sendro ko. ¹⁹ Tia-tia ap, dian ko, ap rela sinai li nanggung nare ye belolos empe Kristus na nyata kan suang ko. ²⁰ Ap beharap, ap tau sendro ko neke ali ngerubah nada enga ap leka ap awus akal nengkawe ko. Hagar Ali Sara Jaji Sontoh ²¹ Ulek tong ap, hei ko ye kakan bolum te wa Hukum Taurat, se ko sa ngeringa Hukum Taurat? ²² Leka naan tesurat, Abraham naan due tia upo: erai na belolos ke erai ulun pelayan bawe, ali ye erai li ke erai ulun bawe merdeka. ²³ Et iro, tia ke pelayan iro na belolos menurut isi, ali tia ye ke bawe merdeka na belolos nyelalo perjanyian. ²⁴ Teneng lak kesah ihe dian lambang leka due bawe ihe melambangkan due perjanyian. Erai ye iro perjanyian ke gunung Sinai empe ngebelolos tia-tia perbudakan. Da ye iro Hagar. ²⁵ Nehe, Hagar melambangkan Gunung Sinai te tana Arab, sameh nget Yerusalem kede nehe leka da bolum suang perbdakan sendro tia-tia da. ²⁶ Et iro, Yerusalem te mo kawan bawe merdeka, ali da ye iro ne taka. ²⁷ Leka naan te suratg, "Be ego aa, hai bawe ye tamanang, ye sa tau belolos. Berseru ali besurak aa, hey ko ye sa ke inam nare belolos. Leka, deo lewi tia ke bawe ye gales ke bawe ye naan bane." Yesaya 54:1 ²⁸ Kawan erai butung ko ye iro tia-tia perjanyian nget Ishak. ²⁹ Kede iro, tia ye na belolos nget isi menganiaya tia ye na belolos nyelalo Roh, nget ye apu jaji nehe ihe. ³⁰ Et iro, se ye Kitab Suci ulek? "Siu tulak pelayan bawe iro ali kawan tia da leka tia pelayan iro sa sagar jaji waris sendro ali tia bawe ye merdeka." ³¹ Leka iro, kawus erai butung, taka sa ye tia-tia ke pelayan bawe, et ke bawe merdeka.