Nasihat Dian Kawan Anak ali Ne Ma ¹ O, kam kawan anak! nget ulun ye siut Kristus, nehe ulun tuha kam leka iro ye buen na tampelos. ² Hormat ne ma kam "Ye iro perintah ye pertama ke Allah ali janji ³ Ye iro dian kam betuah nelang panjang umur ko te denia". ⁴ Kawan erai butung ye jaji ma! Ya kam ngene nare aseng anak kam empe ngene dali bereket . Kebalikan ye, pelihara nelang ajar dali makai aturan nelang pengajaran Tuhan. ⁵ Kawan erai butung ye jaji pelayan, Tunduk perintah tuan kam ye te denia ihe, tampelos iro ali perasaan hormat ali ngunau moyo nelang ali bene- bene nget kam ngene tong Kristus gegales. ⁶ Ya ngene nget iro je kede kam na jaga, je dian mahan na hormat meresia, et kune kam ngene ye nget pelayan Kristus ye desung nampelos kehendak Allah ali se awus ate. ⁷ Pengkoe ye na ene kam nget pelayan iro, kune kam ngene ye ali ate ye ego nget kam ngelayani Tuhan, nelang sa je ngelayani meresia. ⁸ Ingat seno ulun, me pelayan me ulun bebas, sagar nerima balesan ke Tuhan nget kawan ye buen ye na ene ye. ⁹ Kawan erai butung je jaji Tuan. Bebuaen kam ali tingkah laku buen nget iro ade nengkawe kawan pelayan kam iro sameh uras naan erai puun atawa majikan, ye iro Tuhan ye te surga, Da sa neneng wae mate ulun. ¹⁰ Penampuk ye, kune kam gagah ali makai ke gagah ye ahan kam ke kuasa Tuhan leka kam sendro ali da. ¹¹ Sua kawus kelengkapan peperangan ye na okoi Allah tong ko, dian kam tetap mahan ngelawen kawan akal jahat ke iblis. ¹² Leka taka bejuang beloh ngelawen meresia melainkan ngelawen kekuatan kawan setan ye nguasa langit. ¹³ Lekairo, nehe, sua kekawus kelengkapan peperangan Allahg, dian te olo ye jahat kam sanggup ngelawen kwan serangan musuh, nelang dian uli kam bejuang empe tuntas, kam sengke gagah kuat. ¹⁴ Buen kam siap sedia tunang kesetiaan tong Allah ye lah tali pinggang , nelang ketulusan ye lah baju besi ko. ¹⁵ Buen kerelaan nget ngulek kabar buen ye ngoit kesenangan jaji sepatu ko. ¹⁶ Buen pakai kepercayaan ko tong Tuhan ye lah kelengkapan penangkis, makai kepercayaan iro kam mahan nempajem kawus anak panah beapui ke ye jahat. ¹⁷ Epe keselamatan dian topi waja, nelang engan Allah jai pedang Roh Allah. ¹⁸ Ene ke kawus ye iro ali bedoa nget kaweng awat ke Allah te tiap kesempatan, buen bedoa dian Roh Allah memimpin kam. Kune kam seleur siap sedia nelang ye menyarah seleur bedoa tong kawus ulun na Allah. ¹⁹ Nelang bedoa tong ab ade, dian te kede ab bepaner, Allah ngokoi tong ab kawan engan ye pas bene, nelang dian ab ali ronu bene tau ngulek rahasia kabar buen iro. ²⁰ Leka kabar buen iro , jaji ke erai ulun duta, nelang nehe naan te suang penjara. Bedoa dian ab ronu bepander nget Kabar Buen iro, nget me ab harus bepander. Tabe Te Suang Pengawus Ye ²¹ Da Tikhikus erai butung tak nelang pelayan ye setia te suang pegawian Tuhan, sagar ngulek tong kam kawan nget ke kawus nget ab, dian kam ketoan keadaan ab nelang pengkoe ab. ²² Iro sebab ye ab ngutus da nengkawe kam dian ngulek keadaan kain tong kam ke kawus ye, dian pe ego ate kam. ²³ Mudahan Allah ma, ali Tuhan Yesus Kristus ngokoi tau ade tong ke kawus jemaat dian sendro nelang menhasihi nelang tetap percaya tong Kristus. ²⁴ Serantang Allah ngeberkat erai butung kawus ye mwngasihi Tuhan taka Yesus Kristus ali kasih ye eloh tau pajem.