Yesus Sagar Sulet Eso ¹ Erai butung kawus ye na kasihi! Empe ihe surat ab ye kedue tong kam. Te suang kedue surat ihe, ab beusaha ngiluk kawan pikiran ye buen te kam. ² Ab pekingat dian kam ngingat nget kawan engan ye bayuh apu na ulek ene kawan nabi Allah, nelang nget perintah ke Tuhan, Juruselamat, ye na pekempe tong kam lalo kawan rasul. ³ Ye membatang, kam harus ketoan ye iro te kawan olo pe sunek nede, sagar sulet kawan ulun ye bolum ye na perintah ene hawa nasu dali gegales. Dli sagar nge wa warah kam. ⁴ makai engan nget ihe, "Ulek ye Tuhan bejanji sagar sulet ! nehe kame da? Kawan datu nini, taka apu mate, et ye kekawus ye masih sameh lei, nget ke bayuh denia na ene! ⁵ Dali sengaja sa kakan mengaku jaman bayuh alem Allah ngene langit ali tana makai engan Da. Tana na ene ke danum, nelang lalo danum. ⁶ Nelang makai danum ade-ye iro danum ke baah solai--denia jaman bayuh iro na binasa. ⁷ Et langit ali tana ye naan nehe, nepelihara ene engan Allah iro ade dian odi na pesoya ali apui. Nehe langit ali tana masih nepelihara empe te olo kawan ulun ye jahat na hukum nelang na binasa. ⁸ Et erai butung ap kawus, erai hal ihe ye kam sa ingat: Te suang penenengan Tuhan, erai olo beloh naan beda ye ali seribu taun -kededuae ye sameh lei tong Da. ⁹ Tuhan sa lambat ngokoi se ye apu na janji ye, bele naan ye ngulek nget iro, kebalikan ye Da sabar nengkawe kam, leka Da sa kakan sunah erai keulun binasa. Da kakan dian kawus ulun betobat ke kawan dosa ye. ¹⁰ Et olo penyulet Tuhan sagar sulet nget maling. Te olo iro langit sagar jaweh na sendro ali engan gaguruh nelang kawan benda langit sagar jaweh soya, nelang tana ade soya, pelos denia ali ke kawus ye naan te suang ye sagar jaweh. ¹¹ Leka ke kawus ye iro sagar napehancur ali cara nget iro, nget me seharus ye kam olum? Kam harus bolum suci nelang mengabdi tong Allah, ¹² Ke ngola kam ngemba ali ponu harapan penyulet olo Tuhan. Te olo iro langit sagar awus soya, nelang leka layeng ye, belalu kawan banda te langit sagar hancur. ¹³ Et taka ngemba ye apu na janji Allah, ye iro langit ye kado ali tana kado te runa naan keadilan ¹⁴ Leka iro, kam kawus ye na kasih, te desung kam ngemba olo iro, beusaha behimat dian buen nelang beloh naan benoda tehadapan Allah. Nelang pelihara hubungan ye buen ali Allah. ¹⁵ Anggap kesabaran Tuhan taka yelah kesempatan ye na okoi tong kam dian tau selamat. Da Paulus, erai butung taka ye na kasihi, apu nyurat nget iro ade tong kam, Da nyurat iro ali kerahatian kepintaran ye na okoi Allah tong da. ¹⁶ Te suang kawus surat ye, da Paulus seleur nyurat nget hal iro. Semula naan sesenu hal ye poye nepentaru te suang kawan surat ye iro nelang bagian iro na putar balik ene kawan ulun ye sa ketoan se-se nelang ye sa kuat kepercayaan ye. Hal iro sa usah kado, leka kawan bagian lain ke surat suci na pakai nget iro ade ene dali. Se ye na ene dali iro je ngene kehancur dali gegales. ¹⁷ Et kam, erai butung kawus ye na kasihi, apu ketoan nget hal iro, leka iro, hati-hati ya empe kam tamput tong suang ye taang kawan ulun daai empe kam lotu ke runa kam jakat ye segah patut. ¹⁸ Ware kam magin ke sa kasih Tuhan Yesus Kristus, Raja Penyelamat taka, nelang ware kam ade magin ketaru Da na hormat Da, nehe nelang empe ke ngola ola ye! Amin.