Hukuman Dian Guru-guru Palsu ¹ Te suang jaman bayuh te botuk ulun na Allah apu sulet kawan nabi palsu. Nget iro ade te botuk kam sagar sulet kawan guru palsu te antara kam ye ali mensiok menteng ngajar ajaran ye merusak dian ulun binasa. Nelang dali sagar sa mengaku Tuhan ye apu ngebebas dali. Ali nget iro dali pedoyat kebinasaan tong mundan unuk dali gegales ye sagar lekah kune dali. ² Nget, deo ulun sagar siut bolum ngunau dali ye sa bemoral, nelang pengkoe kawan guru iro sagar ngene deo ulun sa harap alan ye bene ye nuju tong Allah. ³ Ali serakah dali ngepe keuntungan ke ko ali pander-pander ye ponu tipuan, et pengadilan dian nyanlotu hukuman mundan dali apu usang na sedia, nelang kebinasaan ye na tentu tong dali apu ngen ba dali. ⁴ Kawan malaikat ye bedosa sa ade Allah ngaret muntis ke hukuman, melainkan na obet tong suang neraka dali ne buat tong suang rantai ye dendem dian natahan te biduh empe olo pengadilan. ⁵ Nget iro ade ali denia te jaman bayuh, Allah sa ngaret muntis ke hukuman Allah. Allah ngirim bah solai tong denia kawan ulun ye jahat kede masa iro, je da Nuh sendro ali turu ke ulun lain ye na selamat. Leka da Nuh ngulek kabar nget me bolum ye pesanang ate Allah. ⁶ Sameh ade hal ye nget jaa Sodom ali Gomora. Allah pehancur kawan jaa iro ali apui dian jaji contoh nget kawan ye sagar nampelor tong kawan ulun ye jahat. ⁷ Et da Lot na selamat, leka da ngumau kehendak Allah; da deo kune sengsara leka tingkah laku sa senunuh ke kawan ulun durhaka. ⁸ Te botuk kawan ulun ye nget iro da Lot ye buen iro bolum ali ate nare, leka nungku olo da kite nelang keringa kawan pengkoe dali ye jahat. ⁹ Jaji, Tuhan ketoan nget me nyelamat kawan ulun ye ngumau kehendak Da, aka dali ngehadap kawan jahat, nelang Tuhan ketoan nget me ngonteh kawan ulun ye jahat sagar na siksa te olo pengadilan. ¹⁰ Ye membatang kawan ulun ye mulur kawan pengakan unuk da ke behirian dali ye daai nelang ye sa mengaku kuasa Allah. Nget iro ronu nelang sakah ye kawan guru palsu iro empe dali sa takut ngehina kawan ye bolum ye mulia te sorga! ¹¹ Sadang kawan malaikat ye lewi gagah nelang bekuasa ke kawan guru palsu iro, beloh pini ngelawen kawan ye bolum ye mulia iro ali engan tuduhan ye ngehujat te hadapan Tuhan. ¹² Et kawan guru iro, sa main-main! Dali nget setua ye na belolos dian nadakep nelang nabunu, dali sa bepikir, et je betindak nget pengerasa, empe dali ngelawen kawan hal ye sa dali ketaru makai engan ye tuduhan ye ngehujat. Leka iro leka kawan pengkoe dali gegales, dali sagar buinasa nget kawan unuk dali gegales. ¹³ Nget balasan kawan kenarean ye apu na ene dali, dali ade sagar kune kenarean tong dali, kawan ye dian sanang ate ye iro nampelor ala se-se kede ke olo nget mulur kebahirian unuk dali, aka dali, aka dali tuet sendro kam tesuang pesta man, tingkah laku dali maka nguta leka dali mabuk mulur hawa nafsu. ¹⁴ Dali sa lea wa ngene dosa, nelang ke ngakan dali ye iro neneng bawe ali napsu jinah . Kawan ulun ye kado percaya nelang nget kurang harap na bujuk dali, ate dali apu ta biasa ali keserakahan dali puna kawan ulun ye kune sumpah! ¹⁵ Leka dali sa kakan malupui alan ye mengkoreng, belalu dali taang dali ngepe alan ye na palupui ene Beliam anak Beor bayuh, da Bileam ihe kakan tatau mahan duit ke pengkoean ye jahat. ¹⁶ Et da mahan teguran ye tamam nget kejahatan da iro, et kede keledai da bepander makai engan meresia. Belalu nabi iro napaksa dian pekewa pengkoean da ye gila iro. ¹⁷ ulun-ulun iro mula nget mate danum ye meang nelang nget embun natampuh ene enus dolek. Allah apu nyedia tong dali erai runa ye denem malem. ¹⁸ Dali ngene kawan ngulek ye tamam et mamus, dali ngejerat ulun-ulun ye apu lapas ke dali ye bolum suang kejahatan ali pengakan daging ali percabulan. ¹⁹ Kawan guru palsu iro ngokoi kebebasan tong kawan ulun iro, et dali gales ye budak ene kawan kebiasaan ye nerusak meresia, et aka ulun na pekaleh ene ala se-se, himat da budak ke ye pekaleh da iro. ²⁰ Ulun ye sa ketaru Tuhan nelang penyelamat taka Yesus Kristus apu lapas ke kawan kuasa denia ye pedaat meresia. Et aka adi Da mulik eso empe napekaleh ene kawan kuasa daat iro, himat leka leen ulun iro maka lewi daai ke ye one ye . ²¹ Lewi buen kawan ulun ye nget iro beloh pini ketaru alan ye bene ke Allah, ke ye dali ke taru iro, et odi sa kakan ngumau kawan parentah ye na okoi Allah tong dali. ²² Se ye na ene dali membukti bene pribahasa ihe: "Koko sagar man mulik se ye apu na uta da" nelang upe ye apu na pekenus, sagar mulik tong bangan te suang lemoyok."