¹ Baka ituk meh caha kati baka uhang tau ngehega kita, jadi hamba-hamba Kristus dan pelayan-pelayan kebenahan Allah yang nda di keliat. ² Alam hubungan ituk meh, ada sutik tuntutan untuk padak pelayan yang tau ditemu setia. ³ Tapi bagi aku, hal ituk adalah hal yang senik, bahwa aku ituk ahus diadil nuan atau ulih pengadil mensia menapun. Empadai aku nda ngehakim dihik aku kedihik. ⁴ Aku nda nyadah apapun yang dituduh ahung aku pakai ngelawan aku, ukan beheti aku nda besalah. Tuhan meh yang ngadil aku. ⁵ Kehena iyak, anang madah penghakiman tentang apapun senapan waktu ia, senapan Tuhan datang. Ia jekak nehang padak utan yang nda dikeliat dahi pengangap dan madah apa yang bisik alam ati. Maka tiap uhang akan nehimak puji dahi Allah. ⁶ Abis iyak bala kaban, aku makai pehinsip-pehinsip ituk ahung dihik aku dan Apolos demi kepentingan nuan, hingga dahi kita, nuan setalah ia belajah heti ungkapan," Anang ngelalu apa yang udah ditulis." Hal ituk sepaya nisik di entaha nuan alu jadi sumbung, udah iyak alu saling betentang. ⁷ Kehena sepa meh yang mantau kian bebida dengan uhang-uhang lain? Ukan meh apa yang udah nuan empu nuan tehima secaha piak magang? Entik nuan udah nehimak iyak secaha cuma-cuma, ngapa dik nuan bebangga baka nuan nda bekeheja? ⁸ Nuan udah bulih apa yang udah nuan kemauk! Nuan udah jadi kaya! Nuan udah mulai mehintah - alam hal ituk tepisah sikit dahi kami! Tentu magang aku ngahap nuan udah mehintah hingga kami tau mehintah besama dengan nuan. ⁹ Kehena aku pikih Allah udah nahuh kami padak hasul ahung pajangan tedudi alam bahis phusis dan baka uhang yang udah dukum mati. Kami jadi utan yang dituntun dunia, padak malaikat dan padak umat mensia. ¹⁰ Kami meh yang budu alam Kristus, tapi nuan meh yang bijaksana alam Kristus. Kami meh yang lemah, tapi nuan meh yang kuat. Nuan meh yang dihemat uhang, tapi kami meh yang hina. ¹¹ sampai pituk kami lapah dan aus, kami makai utan apa ada ia, kami dikelila, dan kami nisik humah. ¹² Kami bekeheja kehas, bekeheja makai tangan kami kedihik. Waktu kami digawai nisik susun, kami mehik behekat. Empak kami disiksa, kami betahan. ¹³ Empak kami difitnah kami bandai dengan hamah. Kami udah jadi, dan tetap danggap jadi amuh alam dunia dan yang palin kutuh alam semua utan. ¹⁴ Aku ukan nulis ituk pakai ngemalu nuan, tapi pakai nyemait nuan sebagai padak anak aku yang aku kegauk. ¹⁵ Walaupun nuan bisik sepuluh hibu pengawal alam Kristus, nuan nisik tau ada banyak bapak. Kehena aku udah jadi bapak nuan alam Kristus Yesus ngelalu Injil. ¹⁶ Jadi aku nyuhuh nuan becehemin ke aku. ¹⁷ Iyak meh sebab aku ngihin Timotius ahung nuan, anak aku yang aku kegauk yang setia alam Tuhan. Ia madah kian caha-caha aku alam Kristus baka aku ngajah sidak dimena magang dan ahung jemat. ¹⁸ Pituk ada yang dientaha kian alu jadi sumbung, betindak seulah- ulah aku nda kalak datang ahung kian. ¹⁹ Tapi aku jekak ligas datang ahung kian, entik Tuhan nyuhuh. Maka akupun ketau ukan hanya ngumung kesidak yang abis penyumbung, tapi aku jekak mantau penguat sidak. ²⁰ Kehena kehajaan Allah nda behisik le umung magang tapi kuasa. ²¹ Apa yang dikemauk nuan? Akankah aku datang ahung nuan dengan ngemaik cambuk atau dengan kasih alam ruh kelembutan?