¹ Dan aku bala kaban, nda dapat ngumung ahung kian baka mensia ruhani, tapi sebagai mensia secaha dagin, baka anak biak alam Kristus. ² Aku nyuap nuan susu dan ukan dagin, kehena nuan napan tau makan dagin. Pitukpun nuan napan siap ³ Empadai nuan agik secaha dagin, Sebab dientaha kian agik ada ihi ati,nuan beselisih, kati nda nuan agik idup nuhut dagin, nuan pun agik bejalan nuhut ukuh mensia? ⁴ Kehena entik uhang bandai," Aku ngimbai Paulus," heti iyak nuan kan agik idup sebagai mensia? ⁵ Alu sepa meh Apolos? Dan sepa meh Paulus? Padak pelayan yang ngelalu ia nuan udah pecayak, dan ahung sepa-sepa yang udah Tuhan behik tugas. ⁶ Aku udah nanam, Apolos udah nyiham, tapi Allah yang tengah ngidup. ⁷ Jadi kedua iyak nisik heti bait yang nanam atau yang nyiham. Tapi Allah iyak meh yang ngidup tehus. ⁸ Pituk sepa yang nanam dan sepa yang nyiham jadi sutik, dan sidak dua iyak nehimak kedihik-kedihik sesuai dengan keheja ia. ⁹ Kehena kami ituk kaban sekeja Allah, nuan meh uma Allah, humah Allah. ¹⁰ Bedasah anugehah Allah yang udah dibehik ahung aku sebagai tukang humah, aku udah ngelegak dasah dan yang lain ngawai datas ia. Tapi isak meh sidak ia behati-ati ngawai bangunan datas ia. ¹¹ Kehena nisik suhangpun yang tau ngelegak dasah yang lain selain sutik yang udah dilegak, iyak meh Yesus Kristus. ¹² Jadi pituk entik adaa uhang yang ngawai dasah ia pakai emas,pihak,pemata,kayu, humput hangkai,atau jehamik, ¹³ keheja ia akan dikeliat, kehena ahi siang akan madah ia. Kehena keheja ituk jekak di nyata alam api. Api jekak nguji pemait apa yang udah dikeheja sidak. ¹⁴ Entik apa yang sidak keheja betan, ia bulih upah, ¹⁵ tapi entik yang sidak keheja iyak alak, ia bulih pehugi, tapi ia diselamat, seulah-ulah selamat ngelalu api. ¹⁶ Apa nuan nda ketau bahwa nuan iyak Humah Allah, dan Ruh Allah idup alam nuan? ¹⁷ Entik ada uhang yang ngancuh Humah Allah, Allah akan ngancuh uhang iyak. Kehena Humah Allah kudus, baka iyak ugak meh dengan nuan. ¹⁸ Anang ada uhang yang ngakal dihik kedihik. Entik ada uhang dientaha kian yang bepikih bahwa ia bijaksana dijaman ituk, isak meh ia jadi "budu" isak ia tau jadi bijaksana. ¹⁹ Kehena himat dunia ituk dadap Allah hal yang budu. Kehena bisik ditulis," Ia nangkap yang bijaksana alam kelicikan sidak." ²⁰ Tuhanpun ketau bahwa pemikih uhang yang bijaksana hanya sia-sia." ²¹ Jadi behenti meh ngemangga ke mensia! Kehena semua iyak empu nuan, ²² bait Paulus atau Apolos, atau Kefas,atau dunia,atau pengidup, atau pemati, atau utan yang bisik pituk,atau utan yang jekak datang, semua iyak empu nuan, ²³ dan nuan empu Kristus, dan Kristus empu Allah.