¹ Kemaik, ikapm mati dalapm kesalah tamah dosa kapm, ² nang one waktu nyak kapm bejalatn nunak jalatn dunia, nunak penguasa keraja angin, roh nang pituk kereja di sentara bala kembiak nang adak taat. ³ Di sentara sidak, kite idup dalapm nafsu dagitn kite gak, ngemuas dagitn tamah piker kite. Kite awal e adalah anak deraka, sama upa insia laitn e. ⁴ Tapi, Allah, nang kaya ke belas kasih bante kasih e nang bosar nyak Siatn e ngasih kite, ⁵ bahkan waktu kite mati pade kesalah kite, Siatn e ngidup kite tamah Kristus -- oleh anugrah iko di selamat --, ⁶ Inyie ngemangkit kite tamah siatn e, lalu nudok kite tamah siatn e di seruga dalapm Yesus Kristus, ⁷ sak di masa nang akan datakng, Inyie tau nunyok kekaya anugrah e nang adak teukor kebait e ke kite dalam Yesus Kristus. ⁸ Sebab, oleh anugrah iko di selamatkan ngelalu iman tuk bukatn dari iko soyakng, tapi berokat Allah, ⁹ bukatn asel usahako, sak adih iyakng nang nyomokng kinik. ¹⁰ Kite tuk dipulah Allah, di cipta dalapm Yesus Kristus ke ngelaku kereja bait nang di siap Allah seopatne sak kite idup dalapm nyak. Dipetomu Dalapm Kristus ¹¹ Bante nyak, ingat kam kemaik laher sebagai iyakng kafir, nang di sobut, "Iyakng adak besunat", kata sidak nang nyobut idik e, "Iyakng besunat", sunat nang di borik ke tubuh oleh insia. ¹² Ingat kala nyak kapm idup tampa Kristus, tepisah dari iyakng Israel tamah bala yakng nyaruh dari ikatan pejanyi nang di janyi, adih pengarap tampa Allah di dunia tuk. ¹³ Namun, pituk, dalapm Yesus Kristus, kapm nang kemaik jauh di baik somak oleh darah Kristus. ¹⁴ Sebab, siatn soyakng adalah damai sejahtera kite nang udah mulah duak bolah pihak nyadi sutik nang udah ngerubuh kanakng permusuhan nang ngelaitn, ¹⁵ ngapus permusuhan make dagitn, yaitu Ukupm Taurat nang isik e perintah tamah ketetapan sampe di dalapm idik e Siatn mulahkeduak e nyadi sikokng insia baru, sampe nyadi perdamaian, ¹⁶ ngenamai keduak e tamah Allah dalapm sikokng tubuh ngelalu salib, sak ulih ngemati permusuhan. ¹⁷ Inyie datakmg lalu morik berita damai sejahtera ke ikapm nang jauh tamah damai sejahtera ke sidak nang somak. ¹⁸ Sebab, ngelalu Inyie, kite duak mulih jalatn tamak ke apakng ngelalu sutik Roh. ¹⁹ Jadi, ikapm bukatn agik iyakng nyaruh tamah penatakng, tapi sama mianak iyakng kudus mianak keluarga Allah, ²⁰ nang di pulah di atas dasar bala rasul tamah bala nabi, nang Yesus Kristus kinik sebagai Batu Penjuru e. ²¹ Dalapm Kristus, semua bangunan agik disatukan tumuh besama nyadi Bait Suci dalapm Tuhatn. ²² Dalapm Siatn, ikapm gak agik di pulah ngenyadi bongkah Allah dalapm Roh.