¹ Dari Paulus, rasul Yesus Kristus kemaok Allah. Ke bala iyakng kudus di Efesus, iyakng beiman dalapm Yesus Kristus. ² Anugrah tamah damai sejahtera ke ikam dari Allah,Apakng kite tamah Tuhatn Yesus Kristus. Berokat Rohani Dalapm Kristus ³ Tepujilah Allah tamah apakng dari Tuhatn kite Yesus Kristus, nang udah merokat kite dalapm Kristius make berokat rohani dari surgawi. ⁴ Sebab, inyie milih kite dalapm Kristus seopatn pemulah dunia sak kite jadi Kudus adak becola di adap e. Dalam kasih, ⁵ Inyie madah kite di angkat nyadi anak e ngelalu Kristus Yesus sesuai tamah kemaok e. ⁶ Inyie mulah nyak sesusi tamah kemuliaan anugrah e, nang udah di borik ke kite dengan pecuma ngelalu anak kekasih e. ⁷ Dalapm inyie, kite mulih penobusan ngelalu darah e, yaitu pengamputn atas kesalah kite sesuai kekaya anugrah e, ⁸ nang Allah borik ke kite dalam segala hikmat tamah pengertian. ⁹ Inyie madah ke kite rahasia kehendak e sesuai maksud bait nang inyi rencana dalapm Kristus, ¹⁰ nang di jalatn waktu pemonuh e datakng ke nyatu segala macapm ke dalapm Kristus, nang ada di seruga tamah di bumi. ¹¹ Dalapm Kristus, kite udah nyadi pemagi dari warisan nang udah di tontu e dari kemaik sesuai rencana e, nang mulah segala macapm jolu ngelalu kemaok e ¹² sak kite nang petama naruh pengarap ke Kristus ngenyadi pemuji ke kemuliaan e. ¹³ Dalapm inyie, ikam, seudah ninga firman benaran, yaitu Injil keselamat ikam,lalu pecayak kiak, dengan di materai make Roh Kudus nang di janyi e. ¹⁴ Roh Kudus adalah penjamin ke warisan kite, sampe penobus tejadi ke bala nang nyadi umpuk Allah kinik -- umpuk pujian kemuliaan e. Doa Paulus ¹⁵ Bante pinyak, waktu aku ninga tentang iman kapm ke Tuhatn Yesus tamah kasih kapm ke semua iyakng kudus, ¹⁶ aku adak belopa ngucap sukor ke ikapm waktu aku ngingat ikapm di doa aku. ¹⁷ Aku bedoa sak Allah Tuhatn kite, Yesus Kristus, apakng dari kemuliaan, nang morik roh hikmat tamah pernyataan dalapm penau ke siatn e. ¹⁸ Aku badoa sak mata baten kapm terang sak kapm ulih ngeroti pengarap nang ada dalapm sapa e, kekaya nang ada dalapm warisan e, nang mulia ke bala iyakng kudus. ¹⁹ Kekuat nang bosar nang adak terukor ke kite nang pecayak, dimak ngaya nang ditunyok dalapm kebosar kekuat e. ²⁰ Kebosar kekuat e nyak Inyie padah waktu Inyie gemangkit Kristus dari sentara iyakng mati ngenudok Inyie di sepiak kanan e di seruga, ²¹ Nang jauh lobih tingik dari semua pengator, kuasa, kekuat, pemerintah, tamah lobih tingik dari semua nama nang udah ada, bukatn hanya ke masa tuk, tapi ke masa nang akan datakng. ²² Siatn ngenunok bemacapm jolu di bobah kaki e lalu morik idik e nyadi ketua atas semua jolu ke umat, ²³ nang adalah tubuh e, done jolu nyak monuh semua tamah segala e.