¹ Bante, aku ingin iko tau borate pejuankng nang aku pulah ke iko, tamah ke sidak nang di Laodikia ke semua iyankng nang opantn kolak betomu muka tamah aku. ² Penuju aku supaya ati sidak teribur disatu dalapm kasih sidak ada semua kekayae nang berasal dari jaminan pengertiane tamah pengetahue dari rahasia Allah, nyak Kristus soyankng. ³ Dalapm Inyie, di tapok semua harta dari hikmat tamah pengetahue ⁴ Aku ngomong hal tuk supaya adis iyankng nang nipu ko tamah perdebatan nang ke dinga masok akal. ⁵ Bante, tubuh jasmani ku adis tamah ko, tapi aku tamah ko dalapm roh, aku besukacita ngelomatn ke disiplinan ko nang bait tamah teguh iman ko dalapm Kristus. Teruslah Mupuh Kristus Yesus ⁶ Jadi, bante iko udah nerimak Yesus Kristus sebagai Tuhan, idup dalapm Inyie, ⁷ beakar lalu bangkit ko dalapm Inyie, kuat iman ko upa ne udah diajare ke iko, melimpah tamah ucapane sukur. ⁸ Beati-ati supaya usah ada sikonkng pun nang menjorat iko tamah filsapat nang puankng lalu menyosate, nang berasal dari tradisi mensia lalu asas roh dunia, ukantn prinsip Kristus. ⁹ Bante, dalapm Inyie diapm seluruh ke ponuhe keilahian nang idup dalapm upa jasmani. ¹⁰ Iko udah ponuh jadi Inyie, nang Ke atas semua pemerintah tamah penguasa. ¹¹ Dalapm Inyie, iko pun di sunatn gak, ukatn tamah sunatn nang dimpulah tamah jari mensia, tapi tamah sunatn nang di pulah Kristus, tamah nukonkng tubuh dagitne nang bedosa. ¹² Dalapm baptise, iko di kubur tamah Kristus, tamah gak dibangkit tamah Inyie ngelalu iman ko dalapm kuasa Allah nang di bangkit Inyie dari antara iyankng mati. ¹³ Kalau iko doluk mati dalapm pelangaran iko tamah dalapm dagitn ko nang adak besunatn, Allah mulah ko idup tamah Inyie udah Inyie ngamputne semua halankng kite. ¹⁴ Inyie udah balankng surat utankng tamah ature nuntut halanknge hubungane antara Allah kite, Inyie udah ngamike tamah memakue di atas kayu salib. ¹⁵ Inyie udah ngelopas pemerintah tamah penguasa, lalu nyuruh sidak jadi tontontnan nang nyuruhe malu bante kemonankng e di atas kayu salib. Usah Nunak Atur nang Di pulah Mensia ¹⁶ Bante nyak, usah nojuk soyankng pun ngakipm iko tamah masalah makatn tamah minume ari raya agamae, rayae bulantn baru atau ari Sabat. ¹⁷ Semua nyak anya bayakng tentankng hal nang datankng, tapi wujud nang sebonare nyak Kristus. ¹⁸ Usah nojuk iyankng nang senang tamah ronah ati nang palsu lalu nyembah ke malaikat ngakipm iko. Sidak iyankng nang suka ngelomatn hal detail nyuruh piker sidak somonkng bante gagasan duniawi. ¹⁹ Iyankng nang adak bepigonkng toguh kepala. kepala nang nopankng semua tubuh, tamah seluruh tubuh di satu tamah sendi otot, semuae tumuh beasal dari Allah. ²⁰ Kalau tamah Kristus iko udah mati teadap asas dunia, ngompe dunia masih umpuk ko, tunok ature upa: ²¹ "Usah jamah, usah ngosa, usah niguk"? ²² Atur tuk binasa udah dipupuh bante atur nyak di pulah bedasar pemerintah tamah pengajar mensia. ²³ Atur upa nyak memang kelala bijaksana tamah menonjol ibadah nang bepusat ronah ati nang palsu lalu nyiksa tubuh. Lalu, semuae nyak adis nilaie puas dagitne.