¹ Dari Paulus, nang jadi rasul Yesus Kristus bante kehendak Allah, tamah dari Timotius meyedik seiman kite. ² Ke iyankng kudus meyedik seiman nang setia dalapm Kristus di Kolose. Anugerah bagi ko damai sejahtera dari Allah Bapa kite. Doa tamah Ucapan Syukur Paulus ³ Bedoa ke iko, kami selalu ngucap sukur ke Allah, Bapa dari Tuhan kite Kristus Yesus, ⁴ bante kami ninga tentankng iman ko dalapm Yesus Kristus kasih nang iko umpuke ke semua iyankng Kudus, ⁵ Iman tamah kasih nyak muncul bante arape nang di borik ke iko di surga, nang udah iko dinga dalapm firman nang bonar, nyak Injil. ⁶ Injil nyak udah sampe ke iko ke seluruh dunia tamah Injil tuk lalu asile buah jadi bejaya, sama upa nang tejadi di antara iko, sape ari iko ningae lalu pahapm anugerah Allah dalapm sebonare. ⁷ Iko udah belajar hal tuk dari Epafras, rekan sepelayatn kami nang terkasih, nang udah jadi pelayatn Kristus nang setia ke iko. ⁸ Inyie nang udah madah ke kami tentankng kasih ko dalapm Roh. ⁹ Bante nyak, kami ningae ari, kami adak kolak beronti bedoa iko mintak supaya Tuhan monuhe iko pengetahuan ke hendak e dalapm semua hikmat pengertian rohani. ¹⁰ Lalu nyak, iko dapat idup tamah cara nang layak di adap Tuhan, senang e dalapm semua hal, mengasil buah dalapm setiap bekerja bait, betumuh dalapm pengetahuan Allah. ¹¹ Semoga iko dikuat tamah semua kekuate sesuai tamah kemuliaan kuasa e supaya iko dapat semua ketekunan tamah kesabaran sukacita. ¹² Besukur ke Bapa nang udah mulah iko monuhe sarat ke nerimak pembagie dari warisan iyankng kudus dalapm terankng. ¹³ Inyie udah ngelopas kite dari kuasa kegelapan minah kite ke kerajaan Anak e nang terkasih. ¹⁴ Dalapm Inyie, kite ada penebus, pengampune atas dosa kite. Kristus nang Petama dalapm Semua Hal ¹⁵ Inyie gamar dari Allah nang adak kelala, nang okak tua atas semua ciptae. ¹⁶ Sebab, bante Inyie, segala nang ada di surga tamah di bumi di ciptae, nang kelala tamah nang adak kelala, bait takhta, kuasae, pemerintah, penguasa. Semua udah di ciptae ngelalu Inyie ke Inyie. ¹⁷ Inyi udah ada seopatn semua sesuatu, semua sesuatu ditopankng tamah Inyie. ¹⁸ Inyie ke pala dari tubuh, nyak umat. Inyie gak nang petama, okak tua dari antara iyankng mati supaya Inyie jadi nang petama dari semua sesuatu. ¹⁹ Bante, Allah berkenan seluruh perolu e tingal di dalapm Inyie. ²⁰ Ngelalu Inyie, semua di damai tamah inyi e, bait nang ada di bumi tamah di surga, nyak pedamaie ngelalu darah e nang tecurah di atas kayu salib. ²¹ Iko boik nyaruh, ngemusuh Allah dalapm piker ko, mpulah tindake nang jaat, ²² tuk iko udah di damai tamah tubuh jasmani Kristus ngelalu kemati e mempesembah iko sebagai pesembahe nang kudus, adak cacat, adak becela di adap Allah. ²³ Jadi, tetap iko diapm dalapm iman, kokoh, teguh, adak di goyah dari pengarap Injil nang iko dinga, nang udah ada beritae ke seluruh cipta dibawah langitn, nang bante aku, Paulus jadi pelayatn. Pelayatn Paulus ke Umat ²⁴ Tuk, aku besukacita dalapm sensara ku demi iko bante di dalapm dagitn ko aku nang ngelengkape ope nang kurankng dalapm penderita Kristus, demi tubuh e, nyak umat. ²⁵ Aku jadi pelayatn umat sesuai tamah tugas penatalayanan dari Allah nang di borik ke aku bagi iko supaya aku dapat beritae firman Allah tamah seponuhe. ²⁶ Tuk am rahasia nang di tapok dari zaman ke zaman tamah generasi ke generasi, tetap nang tuk udah nyata ke iyankng Kudus e. ²⁷ Allah ingin menyatae ke sidak betapa kaya rahasia nang mulia tuk di antara bangsa laitn, kalau Kristus ada di dalapm iko, nyak arape dari kemuliaane. ²⁸ Kami madah tentankng Inyie nogur tamah mengajare setiap iyankng tamah segala hikmat lalu kami dapat maik tiap iyankng jadi dewasa dalapm Kristus. ²⁹ Ke nyak am, aku beusaha payah, bejuankng sesuai tamah kuasa e nang bekerja kuat di dalapm aku.