¹ Lalu, Agripa ngomong ke Paulus, "Iko diizin ngomong ke maan diri." Lalu, Paulus ngerontankng jarie dan nyata maan. ² "Sehubungan tamah semua hal nang di tuduh aku bante iyankng Yahudi, aku ngagap aku sikokng beruntokng, Raja Agripa, bante aku nak maan di adap ko ari tuk, ³ bante iko iyankng nang bonar tau semua kebiasaan di antara iyankng Yahudi. Bante nyak, aku mohon ke iko ninga aku tamah sabar. ⁴ Semua iyankng Yahudi tau cara idup aku waktu kala nyak masa mudak aku, nang waktu kala nyak petama ngabis idup aku di tongah bangsaku soyankng tamah di Yerusalem. ⁵ Bante udah lamak sidak tau tentakng aku, kalau sidak maokng, sidak bulih saksi kalau aku idup sesuai tamah pengajare kelompok nang paling koras dari agama kite, aku idup upa iyankng Farisi. ⁶ Lalu tuk, aku bediri dituk supaya diadil bante arap aku janji nang dijadi Allah ke inik moyang kite. ⁷ Janji tuk nang di arap bante keduak belas suku bangsa dapat tecapai, sementara sidak nyembah Allah bonar siankng tamah malapm. Lalu, bante pengarap tuk aku di tuduh iyankng Yahudi, ya Raja. ⁸ Ngompe iko ngangap mustahil kalau Allah mangkit iyankng mati? ⁹ Bante nyak, aku soyankng ngira kalau aku arus ngelaku banyak hal nang nantankng nama Yesus dari Nazaret. ¹⁰ Lalu, nyak am nang aku kereja di Yerusalem. Aku ukantn anya ngemasok iyankng kudus ke dalapm penjara, udah nerimak wewenang dari imam ke pala, tapi sidak di ukupm mati, aku setuju. ¹¹ Lalu, aku korap ngukupm sidak di sinagoge lalu usaha maksa sidak menghujat. Lalu tamah godik bosar ke sidak, aku nyuruh sidak, sampe ke kota nyaruh." Paulus Ngisah Inyie Betomu Tamah Yesus ¹² "Maksud nyak, aku sedankng dalapm pejalatn ke Damsyik, tamah wewenang lalu tugas dari imam ke pala. ¹³ Tongah ari, ya Raja, di tongah jalatn, aku ngelomatn cahaya dari langitn, lobih terankng dari mata ari, nang besinar di sisi aku tamah iyankng nang bejalatn tamah aku. ¹⁴ Lalu, kami semua tesingker di atas tanah, aku ninga suara ngomong ke aku dalapm bahasa Ibrani, "Saulus, Saulus, ngompe iko nyiksa Aku? Susah nenankng galah rangsang.' ¹⁵ Aku betanyak, 'Sope Iko, Tuhan?' Lalu, Tuhan nyautn, 'Aku Yesus, nang di siksa iko. ¹⁶ Lalu, bangkit bediri pake kaki ko. Bante, Aku udah menampak baka aku ke iko tuk, netap ko jadi iyankng pelayan saksi, adak anya nang udah iko ponto, tapi ke hal nang Aku tunyok ke iko. ¹⁷ Aku nak nyelamat ko dari bangsa ko tuk tamah dari bangsa laitn, ke sidak aku mengutus ko, ¹⁸ mukak mata sidak lalu sidak bebalit dari kegelapan ke terang tamah dari kuasa Iblis ke Allah supaya sidak nerimak pengampunan atas dosa lalu nerimak sebagi dari iyankng nang udah di kudus oleh iman di dalapm Aku."' Paulus Nyelas Soap Kereja e ¹⁹ "Maka, Raja Agripa, aku adak kolak adak taat ke penglihatan surgawi nyak, ²⁰ tapi, petama, aku madah beritae ke sidak nang ada di Damsyik, Lalu di Yerusalem semua wilayah Yudea, ke bangsa laitn, kalau sidak arus betobat lalu bebalit ke Allah, nang sesuai tamah petobatan sidak. ²¹ Nyak sebabe, iyankng Yahudi nangkap aku di Bait Allah lalu usaha munuh aku. ²² Sampe ari tuk, aku udah nerimak petolongan dari Allah lalu aku bediri di tuk bante besaksi, bait ke iyankng kocit atau iyankng bosar lalu adak ngatae hal laitn, kecuali ope nang di kata para nabi tamah Musa tentankng nang tejadi, ²³ kalau Kristus arus menderita kalau, tamah alasan nang petama bangkit dari antara iyankg mati, Inyie madah berita terankng, bait ke iyankng Yahudi atau bangsa laitn." Paulus Beusaha Ngeyaketn Agripa ²⁴ Sementara Paulus masih madah hal dalapm ngemelae, Festus ngomong tamah suara encaitn, "Paulus, iko udah gila! pengetau ko nang banyak nyak mulah iko adak waras." ²⁵ Lalu, Paulus nyawab, "Yang mulia Festus, aku adak gila, tapi aku madah kata nang masok akal. ²⁶ Sebab, Raja ngentau hal tuk aku berani ngomong. Sebab, aku yakitn kalau usah ada satu pun dari hal tuk nang lolos dari ngelomatn bante tuk adak tejadi di bongkah nang tepencil. ²⁷ Raja Agripa, ope iko pecayak ke nabi? Aku tau iko pecayak." ²⁸ Raja Agripa ngomong ke Paulus, "Dalapm waktu nang singkat, iko udah meyakin aku jadi iyankng Kristen," ²⁹ Lalu, Paulus nyautn, "A ku mohon ke Allah copat atau lambat, adak anya iko, tapi semua iyankng nang ninga aku ari tuk, tau jadi upa aku, kecuali rante tuk." ³⁰ Lalu, raja bediri. Lalu gubernur, Bernike, semua iyankng nang dudok tamah sidak. ³¹ Lalu, sementara sidak ningal ruankng nyak, sidak ngomong satu sama laintn, "Iyankng tuk adak mpulah ope nang pantas di sama tamah ukupm mati atau penjara," ³² Maka, Agripa ngomong ke Festus, " Iyankng tuk udah di lopas kalau inyie adak naitn sama ke Kaisar."