¹ Mengenai kedatakng Tuhatn kite,Yesus Kristus, waktu ngenyatu kite tamah Siatn e, kami mintak kapm, bala mianak, ² sak kapm inang copat ngolu bepiker atau susah waktu ninga ari Tuhatn udah datakng, bait dari roh* atau posatn surat nang seolah-olah dari kami. ³ Inang nyojuk soyakng pun ngenyosat ikapm pake cara ope pun. Sebab, ari nyak adis datakng seopatn merutat tamah insia ja't datakng, yaitu si anak kebinasaan, ⁴ nang ngelawatn tamah ningik idik e kesemua nang di sobut Allah atau nang di semah iyakng; nang ngamik bongkah dudok di bait Allah, lalu madah idik e Allah. ⁵ Adak ingat kah ikapm waktu aku masih tamah kapm, aku madah jolu tuk ke ikapm? ⁶ Pintuk, kapm tau ope nang nahan inyie sampe waktu e nanak, inyie akan di padah. ⁷ Sebab, misteri deraka udah kereja, hanya siatn nang nahan e sampe pituk sampe siatn kalah. ⁸ Abis nyak, insia ja't nyak di padah. Tapi, Tuhatn akan munuh e make napas mulut e ngelosi e make ke datakngan e. ⁹ Kedatakng insia ja't nyak serotak tamah kereja Iblis*, di serotak gak tamah segala macapm, tana ajaip, tamah mujizat pemulak; ¹⁰ make semua pemulak ja't ke sidak nang binasa bante nolak nulak ngasih kebonar sak sidak selamat. ¹¹ Bante nyak, Allah ngiripm kesosat nang bemaa kesidak sak sidak pecayak ke pemulak, ¹² sampe sidak semua ulih di ukupm, yaitu sidak nang adak pecayak ke kebonar tapi senang ke keja't. Kapm Dipilih ke Disalamat ¹³ Bala mianak nang di kasih Tuhatn, kami arus besukor ke Allah pake ikapm. Allah udah milih ikapm pake di selamat ngelalu pengudusan oleh Roh tamah iman kebonar. ¹⁴ Ke nyak Allah nyapa ikapm ngelalu Injil* nang kami padah sak kapm mulih kemuliaan Tuhatn kite, Yesus Kristus. ¹⁵ Bala mianak, bediri kuat pijapm bala pengajar nang udah di ajar ke ikapm, bait ngelalu omong atau ngelalu surat kami. ¹⁶ Pintuk, kirae Tuhatn kite, Yesus Kristus,Sinik tamah Allah Apakng kite, nang udah ngasih kite morik kite pengibor kokal pengarap nang bagos ngelalu anugrah, ¹⁷ ngibor nguat ati ko di setiap kereja tamah omong nang bait.