¹ Bala mianak, ikapm tau kalau kami magak ikapm adak sia-sia. ² Walaupun kami sakit seopatn e, upa nang ikapm tau, di peraka di hina di Filipi, kami milih berani dalapm Allah ke nyerita Injil* Allah ke ikapm di tongah banyak pelawatn. ³ Sebab, nashat kami adak berasal dari kesosat, adak bonar, atau pemulak, ⁴ tapi dimak ngaya kami udah setuju ka Allah pake di pecayak ke Injil, pinyak am kami ngomong, bukatn pake ngenyenang insia, tapi ke nyenang Allah nang nguji ati kami. ⁵ Kami adak datakng ngerayu, upa nang ikapm ketau, atau make damai pemulak -- Allah saksi kami. ⁶ Kami adak mintak puji ka ensia, bait dari iko atau yakng laitn, walaupun bala rasul Kristus, kami ulih nuntut dari ko. ⁷ Sebalit e, kami bait ke ikapm, upa soyakng ine nang ngasuh ngerawat bala anak e kinik. ⁸ jadi, kasih sayang nang bose ke ikapm, kami nak morik ke ikapm bukatn hanya Injil* Allah, melainkan idup ikapm kinik bante ikapm nang palin kami kasihi. ⁹ Sebab, kapm ingat, bala miyanak, usaha tamah kereja koras kami, dimakngaya kami kereja siakng malapm sak kami adak nyadi beban kapm sementara kami morik Injil* Allah ke ikapm. ¹⁰ Kapm adalah bala saksi, tamah Allah, suci, bonar, adis cela kami idup di sentara kapm nang pecayak. ¹¹ Upa nang ketau, kami nasehat, ngibor, nyuruh ikapm masi-masitn, upa apakng ke bala anak e kinik, ¹² sak kapm idup sesuai kehendak Allah, nang nyapa ke dalapm kerajaan tamah kemuliaan e kinik. ¹³ Kami gak ngucap sukor ke Allah bante hal tuk, waktu ko nerimak firman Allah, nang ko dinga dari kami, ikapm nerimak bukatn kata insia,nang searus e, dari Allah, nang kereja sentara kapm, bala iyakng pecayak. ¹⁴ Bala mianak, ikapm dah nunak bala umat Allah dalapm Yesus Kristus nang ada di Yudea bante kapm udah ngosa penyakit nang sama, nang berasal dari ayokng kapm kinik, upa nang kapm osa dari bala Yahudi ¹⁵ nang udah ngemunuh Tuhatn Yesus tamah bala nabi,* lalu nguser kami. Sidak adak ngenyenang Allah tamah ngemusuh semua iyakng. ¹⁶ Sidak ngangkakng kami ngomong ke iyakng bukatn Yahudi sak sidak ulih di selamatkan. Pinyak am sidak teros ngemonuh dosa sidak, tapi murka udah turutn ke sidak. Keingin Paulus Beronse Agik ke Umat Tesalonika ¹⁷ Bala mianak, sedakng lamak waktu kami di pisah dari ikapm -- secara fisik, bukatn secara roh -- kami makin kemangu ingin betonsit muka tamah kapm. ¹⁸ Kami ingin magak kapm, aku, Paulus, udah berope kali, tapi Iblis ngalakng kami. ¹⁹ Sebab, sope kah pengarap, sukacita, atau mahkota, kebanga kami di adap Tuhatn Yesus waktu kedatakng e? Bukatnkah ikapm? ²⁰ Ikolah kemuliaan tamah sukacita kami.