¹ Dari Paulus, Silwanus, tamah Timotius ke umat di Tesalonika, nang ada dalapm Allah Apakng tamah Tuhatn Yesus Kristus. Anugrah tamah damai nyerota ikapm. ² Kami ngucap sukor ke Allah pake ikapm semua, nyobut kapm dalapm doa kami, ³ selalu ngingat pekereja iman, usaha kasih, tamah pengarap kapm ke Tuhatn kite, Yesus Kristus, di adap Allah tamah Apakng kite. ⁴ Bala mianak nang di kasih Allah, ketau ndak Inyie udah milih ikapm. ⁵ Sebab, Injil* kami adak datakng make omong, tapi dalapm kuasa, dalapm Roh Kudus*, make keyaketn ponuh; upa nang ikapm ketau upa ope kami di sentara ikapm, demi kepentetn kapm. ⁶ Ikapm udah ngenal kami tamah Tuhatn bante ikapm nerimak firman dalapm penyakit tamah kesenang dari Roh Kudus, ⁷ sak kapm nyadi teladatn ke bala nang pecayak di Makedonia tamah Akhaya. ⁸ Sebab, dari ikapm firman Tuhatn kedinga bukatn di Makedonia tamah Akhaya jak, di setiap bongkah, iman ko ke Allah udah di sebar sampe kami adak perolu ngomong ope-ope agik. ⁹ Sebab, sidak udah nyerita kami, dimak ikapm nyamut kami, dimak ikapm bebalit ke Allah dari nang merutat* ke ngelayatn Allah nang idup dan bonar, ¹⁰ pake nunguk kedatakng anak e di seruga, nang udah Inyie bangkit dari sentara iyakng mati,yaitu Yesus, nang nyelamat kite dari murka nang nak datakng.