¹ Pado waktu aii sabat, waktu Inyo datangk kelangkau pemimpent uangk-uang farisi untok makant diok, Semuo yang datangk kiok nempalok Inyo. ² Tibo-tibo datangk sikuk mensio yang konok busongk aii bedii di adap Yesus. ³ Kata Yesus ke ahli-ahli taurat dongan uangk farisi yang diok, "Panai bont nyentomo uangk waktu aii sabat?" ⁴ Tapi semuo sidok diok diam, doh yok Inyo noeng jaii uangk saket nyok sampai lopok doh yok langsungk di suuh e pulangk. ⁵ Jokuk e ke sidok: "sapai di antao ikent yang ongai narek kelua anak atau peidop yang jatuk ngelobos ke alam sumo, walaupun aii sabat?" ⁶ sidok bont sik yang sangop nyingol e ⁷ Waktu Yesus mantau, bahwo tamu-tamu beusaho onak dudok di oongk yang dioomat, Inyo modoh perumpamo ke sidok: ⁸ "Waktu ikent di unangk ke pegowai uangk nikoh, onang am dudok palengk depan, sebab mungkent uangk nyok ado ngunangk uangk yang dioomat daii ikent. ⁹ kaano golak uangk yang ngunangk ikent nyok nopat kent modoh biok: kedudok ituk di sedio untok uangk nyok yang kami oomat," lalu ikent angkat ngogok oongk yang eenoh dongan muho malu. ¹⁰ Tapi waktu ikent di unangk, ingkas dan dudok am di belakangk mungkent waktu uangk yang ngunangk datangk ke ikent modoh, "Kabant jaahant, dudok am di depant tuk." lalu ikent pe dudok di oongk yang teomat inyok. ¹¹ Sapai pun yang suko ningik deik mako pasti dieenoh, dan sapai yang meenoh deik akant ditingikkan. ¹² Yesus pun bejantuh ke uangk yang ngunangk Inyo, "waktu ikau moik makant tongoh aii atau makant malam aii, onang am ngundang kabant jaahan yang kayo, kaano sidok mungkent akant ngunangk ikau lagik, untok malas undangan ikau. ¹³ Tapi kalau ikent muloh pegowai, unangk am sidok yang miskent, timpangk, tungkot, dan butok, ¹⁴ dan ikent akant di boik bookat, kaano sidok yok bont mampu malas kebaek ikent, dan ikent akan neimo balasan daii Tuhan waktu kebangkitan uangk-uangk bena ¹⁵ Ketiko sidok yang dudok semejo dongan Yesus ningo nyok, inyo bejantuh dongan Yesus, Dibookat am sidok yang makant oote alam kerajaant Allah!" ¹⁶ Tapi Yesus modoh ke nyo, "ado uangk yang besuman banyak untok acao dan ngunangk banyak mensio, ¹⁷ waktu pemakant udoh siap inyo nyuuh pelayant modoh sidok yang di unangk, 'kituk am semuo udoh siap.' ¹⁸ Tapi sidok semuo mulai muloh alasan, yang sikuk modoh, 'Aku udoh moli sebidangk tanoh, dan aku onak angkat mantau e. ¹⁹ yang laent lagi bejantuh, 'Aku udoh moli limo pasang lembu, aku minto maaf kaano aku aos angkat nyubo e tuk.' ²⁰ Dan ado lagi yang laent bejantuh, 'Aku bauk nikoh tuk, jadi aku bont panai datangk.' ²¹ Pelayant inyok pun pulangk lalu modoh ke Tuant e tentangk alasan sidok, Tuant nyok pe luat mat dan modoh ke pelayant inyok, 'tik biok ingkas agik kejalant jalant, loongk-loongk kota baik semuo uangk miskent, yang timpangk, yang tungkot, dan butok.' ²² Jokuk pelayant nyok ke Tuant e,"apai yang udoh duant peintoh udoh tomuk aku keejo, tapi dituk lagi ado oongk yang puangk.' ²³ lalu tuant inyok modoh ke pelayant e, ingkas agik am ke jalant-jalant, loongk-loongk baik obes am sidok, sampai langkau ituk ponuh. ²⁴ Kaano bonsik sikuk pun yang di unangk petamo deh yang onak datangk makant kituk ²⁵ Ketiko iyok banyak mensio yang datangk dan beduyont duyont nunok Yesus samel bejalant. samel nyinek Inyo modoh ke sidok, ²⁶ "Kalau sikuk onak tamoh Aku tapi inyo lagi mike apok e, umok e, bini e, anak-anak e, mpalo betinok mpalo lelaki e, bahkant nyao deik, iyo abon panai jadi mued Ku. ²⁷ Sapai pun yang abont mampu nangongk deito mikol saleb dan abon tamoh ajaran Ku, iyo bon dapat jadi mued aku ²⁸ Sebab sapai di antao ikent, yang kalau onak muloh menara tapi gabont muloh anggaran biayo e, cukop bont biayo untuk kepoolu nyelesai menara iyok? ²⁹ Bia kalau inyo udoh muloh sentukont e tapi abont mampu nyelesai, onang-onang uangk yang mantau lalu ngencotot inyo, ³⁰ modoh biok: uangk ituk mulai ngeejo tapi abont mampu ngejodi e ³¹ Atau rajo monai am, kalau iyo angkat nyoangk rajo laent untok bepoangk, abon dudok olu e untok minto penapat apaikah inyo mampu dengan sepuluh ribu lelaki untok ngoloh rajo laent yang datangk nyoaangk inyo dengan duo puluh ribu lelaki? ³² Dan kalau gabont, selamo tentao yang laent lagi jauh, inyo udoh ngiemp utusan untok nanyok syaat-syaat untok damai. ³³ Biok am, sapai pum diantao ikent yang abont nyooh segalo pengidop, inyo abont panai jadi mued ku ³⁴ Gaam tuk beguno, tapi kalau gaam udoh losi masent e, kati am cao ngatuh masent lagi? ³⁵ Inyok abont beguno lagi untok umo atau pupok. Gaam nyok pasti di buangk. Sapai yang ado ponengk untuk ningo, bia am inyo ningo