¹ Pado waktu yok, baapai ikuk uangk dient bebantoh ke Nyo tentangk uangk Galilea yang daoh e di campo dongan koobant sidok kedeik lago Pilatus. ² Yesus nyawab dan bebantoh ke sidok, "apai kah ikent bepike bahwo uangk Galilea nyok lobih bedoso daii pado yang laent kaano aos mendeito biok? ³ Gabont, Aku modoh ikent, tetapi kalau ikent abont betobat mako ikent akant binasa macam sidok. ⁴ Atau macam delapant bolas uangk di Siloam yang mati tebunuh kaano tetimpuk atap menao, apai kah ikent bepike sidok iyok lobih bedoso daii pado uangk di Yerusalem? ⁵ Aku modoh, samo sekali bont biok. tapi kalau ikent bon betobat, ,ako ikent semuo pe akant binaso. ⁶ Yesus modoh peumpamo ituk, "Ado sikuk mensio nanam puhont ara di kobont ango e, dan nyo datangk untok mantau buoh puhont ara nyok tapi bont mantau buoh e sigik pun. ⁷ Mako uangk nyok bejantuh ke tukangk kobont, 'pantau am, udoh tigo tahont aku datangk nyubo ngogok buoh puhont ara tuk, tapi abont sutik pe yang tepantau. Tobangk am puhont tuk. Ngapai di bia nguusak tanoh?' ⁸ Tukangk kobontnyo modoh biok, 'bia am puhont kayu iyok setahont ituk aku kali di topi e, untok nauh pupok. ⁹ Kalau puhont iyok bebuoh tahont depan, nyok am baek; tapi kalau gabont, tobangk am. ¹⁰ Bituk e Yesus ngaja di saloh sutik langkau semayangk pado aii sabat. ¹¹ Pantau am, ado sikuk betinok yang udoh lapant bolas tahont kerasok roh jahat, inyo bungkok bont panai bedii ¹² Waktu Yesus mantau e, Yesus nimpai dan modoh biok, "Oi ibu, ikau udoh tebebas daii lomoh lotih." ¹³ Inyo ngelotak jaii di atas kepalo ibu yok, ibu yok pun langsongk bedii dan muji Tuhan. ¹⁴ Tapi pemimpent langkau semayangk jadi luat kaano Yesus nyomuh waktu aii sabat. kata pemimpent langkau semayangk bejantuh ke sidok banyak, ado onam aii yang diguno untok keejo, guno am waktu inyok untuk nyentomo, bon panai si aii sabat." ¹⁵ Tuhan nyingol kata e, "munafek! abont kah semuo daii ikent a ngelopas keledai dangan sapi daii kandangk dan ken baik ke oongk aai waktu aii sabat? ¹⁶ Biok am anak betinok Abraham tuk, yang udoh di belonggu ibles selamo lapant bolas tahont, abont pantas ba inyo di lopas waktu aii sabat?" ¹⁷ Waktu Yesus bejantuh biok, sidok yang ngelawant Nyo jadi malu, tapi sidok banyak yang mantau hal hebat yang dipuloh Yesus jadi senang dan besukocito. ¹⁸ Doh yok Yesus bejantuh, "macam apai bah kerajaan Allah, dan dongan apai aku dapat manengk e? ¹⁹ Kerajaan Allah nyok macam igik sesawi yang di amik mensio doh yok di ciai ke kobont, tumuh jadi puhont yang besa, dan buongk-buongk dilanget muloh saangk di batangk-batangk e ²⁰ Sekali lagi Inyo bejantuh, "dongan apaibah aku ngumpamo Kerajaan Allah? ²¹ Kerajaan Allah nyok macam ragi yang di amik sikuk betinok yang di campo ke alam adonan oote e sampai komangk." ²² Yesus datangk ke setiap kota dan deso samel dalam pejalant ke Yesusalem Inyo ngaja sidok. ²³ Ado sikuk bejantuh biok, "Tuhan, apaikah cumo baapai ikuk jak yang di selamat?" Mako jawabNyo kesidok, ²⁴ Bejuangk am untuk masok daii pintu yang elos, kaano banyak yang ngiso tapi bont panai masok. ²⁵ Kalau yang umpuk langkau udoh kojat dan ngunci pintu, mako ikent bedii di lua samel ngedo ikent nimpai, Tuant tuant, kami onak masok.'dan inyo nyohot lalu modoh biok, Aku abont ngenal ikent atau abont panai ke ikent daii monai.' ²⁶ Doh yok ikent modoh,'kami udoh makant atau minom depant muho Tuant waktu tuant ngaja kami di jalant.' ²⁷ Tapi Inyo nyawab,' Aku modoh ikent, aku bont panai ke ikent daii monai, pulangk am, ikent uangk jahat. ²⁸ Mako ado tanges dan kertak gigi waktu ikent mantau Abraham, Isak, dan Yakub dan semuo nabi-nabi di dalamp kerajaan Allah, tapi ikent-ikent nyok di lonset kelua. ²⁹ Sidok datang daii timo, baat, utao, dan selatant, untok tamoh makant malamp di dalamp kerajaan Allah. ³⁰ Dikeponai am tuk, bahwo uangk yang penudi akant jadi yang petamo, yang petamo akant jadi yang penudi." ³¹ ikuk uangk Farisi datangk dan bejantuh, "Ingkas am, dudi oongk tuk, kaano Herodes nak munuh Duant." ³² Yesus nyohot biok,ikent yang ingkas dan podoh ke serigala nyok, 'pantau am Aku nguse setant, dan muloh uangk lopok daii pemodih e, aii tuk dan obuk, dan di aii ketigo Aku udoh nyapai tujuanKu.' ³³ Bia bekati pe, Pentengk bagi Ku untok ngelanyot aii ituk, obuk, dan aii yang akant datangk, kaano abon sehaos e munuh nabi yang jauh dai Yerusalem. ³⁴ Yerusalem, Yerusalem, yang udoh munuh sidok nabi-nabi dan ngelempa e dengan batu sampai mati sidok yang dikiemp ke ikent. Baapai kali Aku onak ngumpol ikent macam inuk manok yang ngumpol anak e untuk di linongk di baboh kapai, tapi ikent ongai. ³⁵ Pantau am langkau ikent didudi. Aku modoh ikent, abon panai gik mantau Aku sampai ikent modoh,'Dibookat am Inyo yang datangk dalam namo Tuhan."