¹ Ngant, tika datn hampir sapai nok Yerusalem, somak Betfage ngant Betaia, nok dohik Zaitun, Yesus sanok du nabuah-Nya, ² ngant nyonok nganu datn, ''Obulah koni desa nok jowimuk, ngant copat jeh muk namoknya, muk dok depit nyik golok keledai muda dik tukisiat, dik guatn suah ningesiak nyo. Lopaslah keledai hant ngant tibatnlah. ³ Jika biatn nyo dik misiak nganumuk, 'Ngoniah muk lakukan?', sanok ngant, 'Tuhan moholukan keledai hant ngant dok copat ngirimnya monik koni te.''' ⁴ Lalu, datn obu ngant depitkan nyik golok keledai muda dik tukisiat nok mit, nok bagian luar, nok johatn, lalu datn lopaskannya. ⁵ Kudu nyo dik tekit nok nyih misiaknya nganu datn, ''Oniah dik muk lakukan samah lopaskankeledai hant?'' ⁶ Datn jawab mah dikjeh Yesus nyonok nganu datn , ngant nyo-nyo hant biarkan datn obu. ⁷ Lalu, datn matn keledai hant nganu Yesus, tanokhant jubah datn nok somu keledai hant, ⁸ ngant Yesus guhuk noksomunya. Ngant, obeh nyo bentangkan jubah datn nok johatn, ngant dik lainnya nabur ranting-ranting dik datn ngepik sok ladang. ⁹ Nyo obeh dik bujalatn nok jowi ngant dik ngajah buseru, ''Hosana! Niberkatilah Diapm dik monik wah nama Tuhan. ¹⁰ Niberkatilah kumonik haja Daud, nenek moyang yah! Hosana, nok ahok dik mahatinggi!'' ¹¹ Kumudian, Yesus namok koni Yerusalem ngant obu koni bait Punopo. Ngant, jeh honong segala susuatu nok kulilinknya, Diapm obu koni Betania busama du bolas nabuah-Nya karna onu jeh ngehup. ¹² Ngant, kumajinya, tika datn togatnkan Betania, Yesus rasa bihiak. ¹³ Setalah honong subuah koyuh ara dik budoutn sok kuojuk, Diapm obu ngadok honong jika mungkin biatn susuatu dik bisa Diapm temukan sok koyuk hant. Tika Diapm sapainok koyuh hant, Diapm kai depitkan oniah-oniah kucuali dout-doutnya sebab waktu hant bukan musim buok ara. ¹⁴ karna hant, Yesus nyonok nganu koyuh hant, ''Yiak biatn gik nyo dik suah duak buok sokmuk ngadok selama-lamanya.'' Ngant, nabuah-nabuah-Nya ngopink. ¹⁵ Kumudian, datn sapai nok Yerusalem. Ngant, Yesus namok koni Bait Punopo ngant mulai ngosar nyo-nyo dik gik bujual mihi nok Bait Punopo. Diapm balikan meja-meja punukar duet, ¹⁶ ngant Diapm kai ngizinkan nyo matn barang-barang lalu Bait Punopo. ¹⁷ Kumudian, Yesus ngajar datn nyonok, ''Bukankah tutlis, ''Homing-Kuk dok ninyonok homing doa bagi sumua bangsa'.'' ¹⁸ Ngant, imam-imam kupala ngant ahli-ahli Taurat ngopinknya ngant datn ngogau cara makiah komek-Nya. Sebab, Datn golak nganu-Nya karna nyo obeh hant kagum dok ngajar-Nya. ¹⁹ Ngant, tika onu mulai ngehupm, Yesus ngant nabuah-nabuah-Nya togatnkan kota hant. ²⁰ Lalu, maji-maji tika datn nosok, datn honong koyuh ara dik jeh hakai ngant akar-akarnya. ²¹ Petrus nyiant ngant nyonok nganu Yesus, ''Rabi, hanong! koyuh ara dik Muk kutuk jeh jodi hakai!'' ²² Ngant, Yesus jawab datn, ''Puklah iman nok wah Punopo. ²³ Kuk nyonok dik subonarnya nganu muk, osiah saja dik nyonok nganu dohik te, 'Mokatlah ngant tubatatnlah koni wah lawuat,' ngant kai biatn kuraguan nok wah otinya, tapi pucaya bahwa oniah dik diapm katakan dok jodi, maka hal hant dok jodi nganunya. ²⁴ Sebab hant, Kuk nyonok nganumuk, oniah saja dik muk doakan ngant mito, pucayalah bahwa muk jeh himonya, maka hal hant dok niminyuk nganumuk. ²⁵ Ngant, apabila muk tekit ngant budoa, ampunilah jika muk ngonok susuatu tuhadap nyo, supaya bapakmuk dik biatn nok surga gik dok ngampuni kusalah-kusalahmuk. ²⁶ Namun, jika muk kai ngampuni, bapakmuk dik biatn nok surga gik kai dok ngampuni kusalah-kusalahmuk.'' ²⁷ Kumudian, datn monik gik koni Yerusalem. Sementara Yesus bujalatn nok Bait Punopo, imiam-imam kupala, ahli-ahli Taurat, ngant mutuh-mutuh Yahudi monik nganu-Nya. ²⁸ Ngant, datn nyonok nganu-Nya, ''Samah kuasa oniah Muk lakukan hal-hal hant, atau osiah dik minyuk-Muk kuasa ngadok lakukannya?'' ²⁹ Yesus nyonoknganu datn, ''Kuk dok misiak nyik kupisiak nganumuk. Jawablah Kuk, bauh Kuk dok nyonok samah kuasa oniah Kuk lakukan hal-hal hant. ³⁰ Oniahkoh baptisan Yohanes buasal sok surga atau sok nasio? Jawablah Kuk!'' ³¹ Datn budiskusi nyik sama lain samah nyonok, ''Jika yah jawab, 'Sok surga,' Diapm dok nyonok, 'Lalu, ngoniah muk kai pucayak nganunya?' ³² Dok tapi, jika yah jawab, 'Sok nasio'?'' para pumimpin hant golak nganu nyo obeh karna datn sumua nganggap bahwa Yohanes bonar-bonar nyo nabi. ³³ Karna hant, datn jawab Yesus, ''Mik kai tahu.'' Kumudian, Yesus nyonok nganu datn, ''Bugitu gik Kuk, Kuk gik kai dok nyonokmuk samah kuasa apakah Kuk lakukan hal-hal hant.''