¹ Kumudian, Yesus tongatnkan ahok hant ngant obu koni wilayah Yudea ngant koni suborank sungi Yordan. Ngant, nyo obeh bupulua ngerumini Diapm gik. Ngant, mah biasa-Nya, Diapm ngajar datn gik. Kumudian, ² nyo-nyo Farisi monik-Nya, ngant ngadok nyoba Diapm datn nyonok, ''Oniahkoh dik odunk nyo benih nyahak saunya?'' ³ Yesus jawab datn, ''Oniah dik Musa pihitah nganumuk?'' ⁴ Datn nyonok. ''Musa ngizinkan nyo benih moki surat cahak ngant nyahakkannya.'' ⁵ Dok tapi, Yesus nyonok nganu datn, ''Karna kukohas otimulah, Musa nuliskan pihitah te nganumuk. ⁶ Dok tapi, sejak mulaan ciptaan, 'Punopo ciptakan datn dahi-dahi ngant dayua. ⁷ Karna hantla, nyo dahi-dahi dok tetiakkan ma. ngant noknya. ⁸ Ngant, kudunya dok jodi nyik dagink.' samah demikia, datn kai gik du, lainkan nyik dagink. ⁹ Jadi, oniah dik jeh Punopo persatukan, yiak biatn nasio dik misahkan.'' ¹⁰ Kumudian, nok wah homing, nabuah-nabuah-Nya nyonok gik nganu-Nya tentang hal hant. ¹¹ Maka, Diapm nyonok nganu datn, ''Osiah saja dik nyahakkan saunya ngant nikahi dik lain, bubuat zina tuhadap saunya. ¹² Ngant, jika sau nyahak benihnya, ngant nikahi dik lain, diapm bubuat zina.'' ¹³ Ngant, datn matn nak-nak cink nganu Yesus supaya Diapm nyentuh nak-nak hant, tapi nabuah-nabuah negur datn. ¹⁴ Namun, tika Yesus honongnya, Diapm jodi nohuk ngant datn nganu nabuah-nabuah-Nya, ''Adunglah nak-nak cink hant monik nganu-Kuk ngant yiak halang-halangi datn karna Kerajaan Punopo hantlah puk nyo-nyo mah datn. ¹⁵ Kuk nyonok dik subonarnya nganumuk, osiah saja dik kai nyambut Haja Punopo mah nyo nak, kai dok namok koni wahnya .'' ¹⁶ Kumudian, Yesus makap nak-nak hant, Diapm berkati datn ngant tongan-Nya samu datn. ¹⁷ Lalu, tika Yesus gik busiapkan jalatn-Nya, nyo bukoduh nganu-Nya ngant misiak, ''Guru dik baik, oniah dik harus kuk lakukan ngadok depit warisan midiapm dik kekal?'' ¹⁸ Ngant, Yesus nyonok nganunya, ''Ngoniak muk nyonok kuk baik? Kai biatn nyo pun dik baik, kucuali Punopo maih. ¹⁹ Muk tau pihitah-pihitah: 'Yiak komek, yiak buzina, yiak noku, yiak minyuk kesaksian palsu, yiak nipu, hormatilah ma ngant nokmuk.''' ²⁰ Lalu, nyo hant nyonok nganu-Nya, ''Guru, kuk jeh mematuhi sumua hant jeh kuk masih muda.'' ²¹ Namun, Yesus mandang nganu pumuda hant ngant ngonok kasih nganunya, '' Nyik hal dik kuha sokmuk. Obu ngant juallah sumua dik muk puk, ngant minyuk nganu nyo miskin, maka muk dok puk harta nok surga. Lalu, kotulah ngant ngajah kuk.'' ²² Namun, punyonok hant buat-Nya susah oti ngant diapm obu samah sedih karna diapm puk obeh harta. ²³ Kumudian, Yesus mandang koni kulilink ngant nyonok nganu nabuah-nabuah-Nya, ''Betapa sulitnya bagi datn dik kaya ngadok namok Haja Punopo'' ²⁴ Nabuah-nabuah tukojuat pada nyonok-Nya. Namun, Yesus nyonok gik nganu datn, ''Hi nak-nak, betapa sulitnya ngadok namok Haja Punopo! ²⁵ Lobiah mudah nyik golok unta namok lalu huba jahip daripada nyo kaya namok Haja Punopo.'' ²⁶ Nabuah-nabuah makin tukojuat ngant nyonok nyik sama lain, ''Lalu, osiah dik bisa diselamatkan?'' ²⁷ Yesus mandang nganu datn ngant nyonok, ''Bagi nasio hal hant kai mungkin, tapi kai bagi Punopo.Sebab, segala susuatu mungkin bagi Punopo.'' ²⁸ Petrus mulai nyonok nganu Yesus, ''Hanong, mik jeh togatnkan segala susuatu ngant ngajah Muk!'' ²⁹ Yesus nyonok, ''Kuk nyonokkan dik subonarnya nganumuk, kai biatn nyo pun dik jeh togatnkan homing, atau posik-posik dahi-dahi, atau posik-posik dayua, atau nok, atau ma, atau nak-nak, atau ladang-ladangnya karna Kuk ngant karna Injil, ³⁰ dik pada masa te kai dok himok sahatus kali lipat--homing-homing, ngant posik-posik dayua, ngant nok-nok, ngant nak-nak, ngant ladang-ladang, samah penganiayaan; ngant pada masa dik dok monik, midiapm dik kekal. ³¹ Dok tapi, obeh nyo dik putama dok jodi dik terakhir, ngant dik terakhir jodi dikputama.'' ³² Datn gik wah johatn sima koni Yerusalem ngant, Yesus monik matn serta kudu bolas nabuah-Nya, Diapm mulai nyonok datn oniah dik dok jodi pada-Nya, ³³ kata-Nya, ''Honong, yah gik sima koni Yerusalem ngant Nak nasio dok nyerahkan nganu imam-imam ngant ahli-ahli Taurat. Datn dok ngukupm -Nya hinga kobek ngant dok nyerahkan-Nya nganu nyo-nyo kai Yahudi. ³⁴ Datn dok hina-Nya, ngant hucuah-Nya, ngant ngajar-Nya, ngant komek-Nya dok tapi, jeh tohuah onu, Diapm dok bangkit.'' ³⁵ Kumudian, Yakobus ngant Yohanes, nak-nak Zebedeus, monik nganu Yesus ngant nyonok, ''Guru, mik ingin muk lakukan bagi mik oniah saja dik mik mito.'' ³⁶ Ngant, Yesus nyonok nganu datn, ''Oniah dik muk inginkan ngadok Kuk lakukan bagimuk?'' ³⁷ Datn nyonok nganu-Nya, ''Izinkan nyo sok mik guhuk nok subolah touh-Muk, ngant dik nyiknya nok subolah moyiat-Muk, wah kemuliaan-Muk.'' ³⁸ Dok tapi, Yesus nyonok nganu datn, ''Muk kai tahu oniah dik muk mito. Sangiapkoh muk nyiniap sok cawan dik harus Kuknyiniap dik babtiskan nganuKuk?'' ³⁹ Datn nyonok nganu-Nya, ''Muk sangiap!'' Lalu, Yesus nyonok nganu datn, ''Cawan dik Kuk nyiniap memang kuk nyiniap, ngant muk dok nibabtis samah babtisan dik nibabtiskan nganu-Kuk. ⁴⁰ Dok tapi, ngadok guhuk nok sublah tauh-Kuk atau nok subolah moyiat-Kuk, bukan hak-Kuk ngadok minyuknya, tapi ahok hant adalah ngadok datn dik jeh nisiapkan.'' ⁴¹ Ngopink hant, simua nabuah dik lain jodi nohuk nganu Yakobus ngant Yohanes. ⁴² Lalu, Yesus pau datn ngant nyonok nganu datn, ''Muk tahu bahwa datn dik nianggap subagai pihitah nyo-nyo bukan Yahudi bubuat seolah-olah bukuasa atas datn. Ngant, putinggi-tinggi datn ngunokukuasaan atas datn. ⁴³ Namun, kai seharusnya nok antara muk. Subaliknya, osiah saja dik ingin jodi doi nok antara muk, harus jodi pulayanmuk, ⁴⁴ ngant osiah saja dik ingin jodi dik putama nok antara muk, harus jodi pulayan sok sumuanya. ⁴⁵ Sebab, Nak nasio pun monik bukan ngadok nilayan, tapi ngadok melayani, ngant ngadok minyuk nyawa- Nya subagai tebusan bagi obeh nyo.'' ⁴⁶ Kumudian, datn sapai nok Yerikho. Tika Yesus togatn Yerikho busama samah nabuah-nabuah-Nya ngant nyo obeh, nyo pungemis bokap bunama Bartimeus, nak Timeus, gik guhuk nok sonik johatn. ⁴⁷ Tika diapm ngopink bahwa biatn Yesus sok Nasaret, diapm pun mulai buseru ngant nyonok, ''Yesus, Nak Daut, kasihanilah kuk!'' ⁴⁸ Ngant, obeh nyo negurnya ngant sanoknya motink. Namun, diamp semakin makas, ''Nak Daut, kasihanilah kuk!'' ⁴⁹ Lalu, Yesus togak ngant nyonok, ''pau diapm.'' Ngant, datn pun pau nyo bokap hant ngant nyonok nganunya, ''Kuatkan otimuk! Mokatlah, Diapm paumuk.'' ⁵⁰ Samial lopas jubahnya, nyo bokap hant tekit ngant monik nganu Yesus. ⁵¹ Ngant, Yesus nyonok nganunya, ''Oniah dik muk inginkan ngadok Kuk lakukan bagimuk?'' Nyo bokap hant jawab, ''Rabi, adung guatn kuk honong.'' ⁵² Lalu, Yesus nyonok nganunya, ''Obulah. Imanmuk jeh maikmuk.'' Tika hant gik, diapm depitkan monik kutuhongnya, ngant diapm ngajah Yesus supanjang jalan.