¹ Sekarang, jeh Yesus eduah nok Betlehem, nok Yudea, pada zaman Haja Herodes, hanonglah, nyo-nyo Majus sok timur monik koni Yerusalem. ² Datn misiak, ''Nok kiah Diapm, dik niediah, Haja nyo Yahudi hant? Sebab, mik jeh honong bintang-Nya nok timur ngant mik monik ngadok nyembah-Nya.'' ³ Tika Haja Herodes ngopink hal te, gulisahlah diapm ngant suluruh Yerusalem busamanya. ⁴ Lalu, diapm ngumpulkan sumua imam kupala ngant ahli-ahli Taurat bangsa hant. Diapm ngorek keterangan sok datn, ahok Kristus nikediahkan. ⁵ Datn nyonok nganunya, ''Nok Betlehem, wilayah Yudea, karna matialah dik ninulis oleh nabi: ⁶ Ngant, muk Betlehem, nok poyok Yudea, sama sukali bukanlah dik paling cink nok antara para punguasa Yudea, karna sokmuk dok timual nyo pimih, dik dok ngembalakan umat-Kuk, Israel.''' ⁷ Kumudian, Herodes diam-diam pau nyo-nyo Majus hant, mito kupastian sok datn tentang waktu businarnya bintang hant. ⁸ Lalu, diapm ngadok datn koni Betlehem ngant nyonok, ''obu ngant silidikilah samah tuliti tentang Nak hant. Ngant, kalau muk jeh depit-Nya, laporkanlah nganukuk supaya kuk gik bisa monik ngant nyembah-Nya.'' ⁹ Setelah ngopink haja, datn obu. Ngant, hanonglah, bintang dik datn honong nok timur hant nuntun datn sapai tiba ngant togak nok somu ahok Nak hant ponai. ¹⁰ Tika honong bintang hant, datn busukacita samah sukacita dik mangah doeh. ¹¹ Jeh namok koni wah homing, datn depit Nak hant busama Maria, nok-Nya. Lalu, datn tusungkur ngant nyembah-Nya. Kumudian, datn muka ahok-ahok hartanya ngant persembahkan hadiah-hadiah nganu-Nya, yaitu mas, kemenyan, ngant mur. ¹² Karna ninyiatn wah pimih agar yiak boliaknganu Herodes, datn boliak koni negerinya lalui johatn lain. ¹³ Jeh nyo-nyo Majus hant obu, hanonglah, malaikat Tuhan napak nganu Yusuf wah pimih ngant nyonok, ''Mokatlah, matn Nak hant busama nok-Nya ngant obulah koni Mesir. Togatlah nok nyih sapai Kuk nyonok nganumuk karna Herodes ingin ngogau Nak hant ngadok binasakan-Nya.'' ¹⁴ Kumudian, Yusuf mokat ngant matn Nak hant samah nok-Nya pada waktu ngehipm ngadok obu ojuk koni Mesir, ¹⁵ ngant togatn nok nyih sapai Herodes kobek supaya nigenapilah dik nifirman Tuhan lalui nabi: ''Sok Mesir Kukpau Nak-Kuk.'' ¹⁶ Kumudian, tika Herodes honong bahwa diapm jeh niperdaya oleh nyo-nyo Majus, diapm sangat murka ngant pihitah ngadok komek sumua nak dahi-dahi nok Betlehem ngant suluruh wilayah nok sukitarnya, dik buumur du sowok koni bawah, susuai samah waktu dik jeh diapm pastikan sok nyo-nyo Majus ¹⁷ Maka, genaplah dik ninyonok oleh Nabi Yeremia: ¹⁸ ''Suatu caho tukapink nok Rama, nongis nak-naknya, ngant kai mau nihibur karna datn jeh kadiah.'' ¹⁹ Namun, tika Herodes kobek, hanonglah, malaikat Tuhan nampakkan diri wah pimih nganu Yusuf nok Mesir, ²⁰ ngant nyonok, ''Mokatlah, matn Nak hant samah nok-Nya koni poyok Israel karna nyo-nyo dik buusaha komek nyawa Nak hant jeh kobek.'' ²¹ Lalu, diapm mokat ngant matn Nak hant buserta nok-Nya boliak koni poyok I srael. ²² Dok tapi, tika diapm ngopink bahwa Arkhelaus mihitah nok Yudea nyilikkan Herodes, manya, Yusuf golak obu koni nyih. Setelah ninyiatn wah pimih, diapm obu koni wilayah Galilea. ²³ Yusuf tiba ngant togatn nok subuah kota dikodatn Nazaret supaya genaplah dik nisampaikan para nabi, ''Diapm dok ninyonok 'Nyo Nazaret'.''