¹ Kumudian, kudu nyo Farisi ngant ahli-ahli Taurat sok Yerusalem monik nganu Yesus ngant nyonok, ² ''Ngoniah nabuah-nabuah-Muk langgar tradisi nene moyang? Sebab, datn kai ngumik tongan tika duak roti!'' ³ Ngant, Yesus jawab ngant nyonok nganu datn, ''Ngant, ngoniah muk gik langgar pihitah Punopo demi tradisimuk? ⁴ Karna Punopo bufirman, Hormatilah ma ngant nokmuk,' ⁵ Namun, muk nyonok, ''Osiah saja dik nyonok nganu ma atau noknya, 'Oniah pun puminyuk ngadokmuk jeh nipersembahkan nganu Punopo,''' ⁶ diapm kai perlu hormati ma atau noknya. Samah demikian, muk batalkan firman Punopo demi tradisimuk ⁷ Muk, nyo-nyo munafik, memang benas nubuatan Yesaya tentang muk: ⁸ 'Bangsa te hormati Kuk samah tukuak datn, tapi oti datn ojuk sok nganu-Kuk. ⁹ Ngant, sia-sia datn nyembah-Kuk samah ngajar pihitah-pihitah nasio.''' ¹⁰ Ngant, Yesus pau nyo obeh ngant nyonok, ''kapink ngant pahamilah! ¹¹ Bukan oniah dik nomok koni wah tukuak dik najis nyo, tapi oniah dik kuluar sok tukuaknya, telah dik najis nyo.'' ¹² Kumudian, nabuah-nabuah Yesus monik ngant misiak nganunya, ''Taukoh Muk matn nyo-nyo Farisi tusinggung tika ngopink pernyataan te?'' ¹³ Namun, Yesus jawab ngant nyonok, ''Sutiap tanaman dik kai nitanam oleh Ma-Kuk dik nok surga dok nicimuat sapai koni wat-watnya. ¹⁴ Adunglah datn. Datn adalah pununtun-pununtun bokap sok nyo-nyo bokap. Ngant, jika nyo bokap nuntun nyo bokap, kudunya dok ojuk koni wah huba.'' ¹⁵ Petrus nyonok nganu-Nya, ''Jelaskanlah perumpamaan hant nganu mik.'' ¹⁶ Yesus nyonok, ''Oniah muk masih guatn pahapm juga? ¹⁷ Oniah muk kai tuhiti bahwa segala susuatu dik namok koni wah tukuak dok monok koni toni ngant nimotatn koni wah jamatn? ¹⁸ Dok tapi, oniah dik kuluar sok tukuak timual sok oti, ngant hantlah dik najis nyo. ¹⁹ Karna sok oti timual pikiran -pikiran bek, pukomek, puzinaan, dosa-dosa seksual, punoku, kusaksian palsu, ngant fitnah. ²⁰ Hal-hal telah dik najis nyo, tapi duak tanpa ngumik tongant kai najis nyo.'' ²¹ Kumudian, Yesus obu sok nyih ngant nyingkir koni daerah Tirus ngant Sidon. ²² Ngant, nyo dayua Kanaan dik buasal sok daerah hant monik ngant buseru, ''Kasihanilah Kuk, Tuhan, Nak Daud! Nak dayuakuk kurasukan minu bek mangah parah.'' ²³ Dok tapi, Yesus kai jawab dayua hant, nyik kata pun. Ngant, nabuah-nabuah-Nya monik ngant desak-desak-Nya, kata datn, ''Suruhlah diapm obu karna diapm terus-menerus bumakas nok kona yah.'' ²⁴ Lalu, Diapm jawab ngant nyonok, ''Kuk hanya niutus nganu domba-domba dik moyap sok umat Israel.'' ²⁵ Kumudian, dayua hant nganu ngant sujudnok jowi Yesus, katanya, ''Tuhan, tolonglah kuk!'' ²⁶ Namun, Yesus jawab ngant nyonok, ''Kai baik monu roti puk nak-nak ngant nopuahnya ngaanu yuk-yuk.'' ²⁷ Dayua hant jawab, ''Omatn,Tuhan, tapi yuk-yuk hant duak remah-remah dik hobuk sok meja tuannya.'' ²⁸ Kumudian, Yesus nyonok nganunya, ''Hai dayua,imanmuk doeh! Tujodilah nganukuk mah kuinginanmuk.'' pada saat hant juga nak dayuanya nisembuhkan. ²⁹ Yesus obu sok nyih, nyusuri sonik sungi Galilea. Ngant, setelah simak koni somu dohik, Diapm guhuk nok nyih. ³⁰ Kumudian, kurumunan doeh nyo monik nganu-Nya, matn nyo-nyo dik makua, cacat, bokap, mawok, ngant nyo obeh lainnya. Lalu, datn ngalai nyo-nyo hant nok kojok Yesus ngant Diapm nyembuhkan datn, ³¹ hingga nyo obeh hant tuheran-heran tika datn honong dik mawok ngomong, dik cacat nipulihkan, dik makua bujalatn, ngant dik bokap kucilar.Ngant, datn muliakan Punopo Israel. ³² Lalu,Yesus pau nabuah-nabuah-Nya ngant nyonok, ''Kuk berbelas kasihan tuhadap nyo-nyo hant karna datn jeh busama-Kuk selama tihuah onu ngant kai puk koyuhnas. Ngant, Kuk kai mau nyuruh datn mohik kubihiak supaya datn kai pisant wah pujalatn.'' ³³ Kumudian, para nabuah nyonok nganu-Nya, ''Sok kiah yah dok depit roti dik obeh nok ahok sunyi te kusuah nyo dik mah obeh te.'' ³⁴ Yesus misiak nganu datn, ''Kudu obeh roti dik muk puk?'' Datn jawab, ''Juk, ngant kudu katn cink.'' ³⁵ Lalu, Yesus mihitah nyo obeh hant guhuk nok poyok. ³⁶ Kumudian, Diapm monu kujuk roti serta katn-katn hant. Ngant, samial ngucap syukur, Diapm hocak-hocaknya, ngant minyuknya nganu nabuah-nabuah-Nya minyuknya nganu nyo obeh hant. ³⁷ Datn sumua duak ngant nikubusuah.Lalu, datn monu potongan-potongan dik sisa, biatn juk keranjangpunuk. ³⁸ Datn dik duak biatn patn hibu nyo dahi-dahi, kai tumasuk dayua ngant nak-nak. ³⁹ Setelah nyuruh nyo obeh hant mohik, Yesus namok koni ohud ngant obu koni daerah Magadan.