¹ Pada onu hant, Yesus kuluar sok homing ngant guhuk nok tobink sungi. ² Ngant, nyo obeh tupulua nganu-Nya. Karna hant, Diapm simak koni ohud ngant guhuk, ngant sumua nyo obeh hant tekit nok tobink sungi. ³ Ngant, Diapm nyonok obeh hal nganu datn wah perumpamaan, kata-Nya, Biatn nyo punabur obu ngadok nabur, ⁴ ngant waktu diapm nabur,kudu binik hobuk nok sonik johatn, monuak-monuak monik ngant duaknya sapai mosik. ⁵ Binik dik laink hobuk nok ahok bubotuh, dik kai ngandung obeh poyok, ngant copat timuk karna kai puk kuwah poyok. ⁶ Dok tapi, setelah metihonu timual, tanaman hant tupitat letiap. Ngant karna kai puk wat, tanaman hant jodi hakai. ⁷ Binik dik laink hobuk nok antara hiap hojok, ngant hiap hojok hant butimuk, ngant nyekiatnya. ⁸ Namun, binik dik laink hobuk nok poyok dik baik ngant ngasilkan buok, biatn dik sahatus kali lipat, biatn dik nump puhuk kali lipat, ngant biatn dik tohuah puhuk kali lipat. ⁹ Osiah dik bukopink, adunglah diapm ngopink.'' ¹⁰ Ngant, nabuah-nabuah Yesus monik ngant misiak nganu-Nya, ''ngoniah Muk ngomong nganu datn wah perumpamaan?'' ¹¹ Yesus jawab datn, ''nganumuk jeh nikarunia ngadok kutau rahasia kuhajaan Surga, tapi nganu datn kai nikarunia. ¹² Sebab, nyo dik puk, nganunya dok niminyuk ngant diapm dok bukelimpahan. Namun, osiah dik kai puk, bahkan oniah dik diapm puk dok nimonu sok ¹³ Karna hantlah, kuk ngomong nganu datn wah perumpamaan karna tika honong, datn kai honong, ngant tika ngopink, datn kai ngopink, gik kai tuhiti. ¹⁴ Mengenai datn, nigenapilah nubuat Yesaya dik nyonok, Samah ngopink, muk dok ngopink, tapi kai dok suah tuhiti. Ngant, samah honong, tapi kai dok tupahapm.' ¹⁵ Karna oti bangsate jeh tobal, kopink datn malas ngadok ngopink, ngant datn. nitiap metih datn.Jika kai, tentu datn depit honong samah metih, ngopink samah kopink datn, ngant depit tuhiti samah oti datn, lalu buboliak nganu-Kuk ngant ninyembuhkan.' ¹⁶ Dok tapi, niberkatilah metihmuk karna honong ngant kopinkmuk karna ngopink. ¹⁷ Kuk nyonok dik subonarnya nganumuk bahwa obeh nabi ngant nyo-nyo bonar dik ingin honong oniah dik muk honong, tapi kai honongnya, ngant ingin ngopink oniah dik muk ngopink, tapi kai ngopinknya.'' ¹⁸ ''Oleh karna hant, kapnklah arti perumpamaan tentang punabur. ¹⁹ Tika nyo ngopink firman Kuhajaan ngant kai mahaminya, si bek monik ngant rampas oniah dik jeh tutabur wah oti nyo hant. Telah nyo dik biniknya tutabur nok sonik johatn. ²⁰ Adapun dik tutabur nok ahok-ahok dik bubotuh, telah nyo dik ngopink firman ngant lansung himonya samah sukacita, ²¹ tapi diapm kai puk wat wah dirinya ngant butahatn sutogal. Ngant, tika punindasan atau punganiayaan tujodi karna firman hant, diapm lansong hobuk. ²² Binik dik hobuk nok tudok hiapm-hiapm hojok adalah nyo dik ngopink firman hant, kumudian kuhawatir dunia ngant tipu daya kukayaan desak firmanhant hingga kai bubuok. ²³ Namun, nyo dik biniknya tutaburnok poyok dik baik, telah nyo dik ngopink firman hant mahaminya. Diapmlah dik bonar-bonar bubuok ngant ngaselkan, biatn dik 100 kali lipat, bukudu 60, ngant bukudu 30.'' ²⁴ Yesus nyampaikan perumpamaan dik lainnya nganu datn, kata-Nya, ''Kuhajaan Surga hant depit niumpamakan mah nyo dik nabur binik dik baik nok mihnya. ²⁵ Dok tapi, sementara nyo-nyo bis, musuhnya monik ngant nabur binik siduhpoda nok antara binik gandum, ngant obu. ²⁶ Tika tanaman butunas ngant bubulir, kumudian siduhpoda hant tuhonong gik. ²⁷ Maka, hamba-hamba sok puk mih hant monik ngant misiak koninya, 'tuan, kaikoh muk nabur binik dik baik nok mihmuk? Lalu, sok kiah moniknya siduhpoda hant?' ²⁸ Diapm nyonok nganu datn, 'Nyo musuh jeh lakukannya .' Lalu, hamba-hamba hant nyonok nganunya, Oniahkoh muk lua mik obu ngant muluanya?' ²⁹ Dok tapi, tuan hant nyonok, Yiak! Sebab, tika muk mulua siduhpoda-siduhpoda hant, bisa-bisa muk gik muat gandum hant busamanya. ³⁰ Adunglah kudunya timuk busama sapai musim panen. Ngant, pada waktu panen, kuk dok nyonok nganu para punabur, ''Putama-tama, pulualah siduhpoda-siduhpoda hant ngant kisiatlah wah bokas-bokas ngadok ninicual. Namun, pulualah gandumnya koni wah jihuakuk.'''' ³¹ Kumudian Yesus bucihito perumpamaan dik laink nganu datn, kata-Nya, ''Kuhajaan Surga hant mah biji sawi dik nimonu nyo ngant nitabur nok mihnya. ³² Biji hant adalah dik tucink sok sumua jenis binik, tapi tika timuk, diapm lobiah doeh sok sumua jenis ponas, bahkan jodi koyuh hingga monuak-monuak nok honyiatn monik ngant bucohi nok cabak-cabaknya.'' ³³ Kumudian Yesus bucihito subuah perumpamaan dik laink nganu datn, ''Kuhajaan Surga hant mah hagi, dik oleh nyo dayua nimonu ngant ninamok koni wah adonan topua terigu obeh tohuah sukat sapai sumua adonan hant tucampur hagi. ³⁴ Sumua hal te Yesus nyonok nganu nyo obeh wah perumpamaan -perumpamaan, ngant Diapm kai ngomong nganu datn tampa perupamaan. ³⁵ Samah demikian, tugenapilah oniah dik nisampaikan lalui nabi, '' Kuk dok muka tukuakkuk wah perumpamaan-perupamaan, Kuk dok ngucap hal-hal dik tusukat sejak dunia nijodi.''' ³⁶ Kumudian, Yesus togatn nyo obeh hant lalu Naomi koni homing. Ngant, nabuah-nabuah-Nya monik nganu-Nya ngant nyonok, ''Jelaslah nganu mik perumpamaan tentang mih-mih nok mih.'' ³⁷ Ngant, jawab-Nya, ''Nyo dik nabur binik dik baik adalah Nak Nasio, ³⁸ ngant mih hant adalah dunia te. Binik dik baik adalah nak-nak Kuhajaan, ngant mih adalah nak-nak si bek, ³⁹ ngant musuh dik naburnya adalah Iblis, ngant musim panen adalah akhir zaman, ngant para punuai hant adalah para malaikat. ⁴⁰ Jodi, sama mah mih dik nimulua ngant ninicual wah opi, demikianlah dik dok tujodi pada akhir zaman. ⁴¹ Nak Nasio dok ngutus para malaikat-Nya, ngant datn dok pupulua sumua botuh sandungan serta nyo-nyo dik lakukan kujahat sok kuhajaan-Nya, ⁴² ngant dok motatnya koni wah tukuk opi. Nok ahok hant dok biatn nongis ngant kertak jipit. ⁴³ Kumudian, nyo-nyo bonar dk businar mah metihonu wah Kuhajaan Ma datn. Osiah dik bukopink,adunklah diapm ngopink.'' ⁴⁴ ''Kuhajaan Surga adalah mah harta dik tupendam nok mih, dik nidepit nyo, lalu ninyukatnnya gik. Ngant, karna sukacitanya, diapm obu, jual sumua dik nipuknya, ngant mihih mih hant. ⁴⁵ Sukali gik, Kuhajaan Surga adalah mah nyo pedagangdik ngogau mutiara dik indah. ⁴⁶ Tika diapm depit subuah mutiara dik bunilai tinggi, diapm obu ngant jual sumua dik nipuknya, lalu mihih mutiara hant.'' ⁴⁷ ''Demikian gik, Kuhajaan Surga adalah mah jala dik ninibar koni wah laut, ngant mulua bubagai jenis katn. ⁴⁸ Tika jala hant punuk, datn nyeretnya koni pantai ngant guhuk, lalu mulua katn-katndik baik koni wah keranjang-keranjang doeh, tapi motat dik kai baik. ⁴⁹ jodi, hantlah dik dok tujodi pada akhir zaman. para malaikatdok kuluar ngant misahkan dik bek ⁵⁰ sok nyo-nyo bonar, ngant motat no-nyo bek hant koni wah tukuk opi. Nok ahok hant biatn ratapan ngant kertak jipit. ⁵¹ Jeh muk tuhiti dok sumua te?'' Datn nyonok nganu-Nya, ''Ya.'' ⁵² Ngant, Yesus nyonok nganu datn, ''Karna hant, sutiap ahli Taurat dik jeh jodi nabuah Kuhajaan Surga, diapm mah tuan rumah dik nguluar harta dik bauh ngant dik oteh sok kukayaannya.'' ⁵³ Tika Yesus jeh nyelesai perumpamaan-perumpamaan hant, Diapm obu sok nyih. ⁵⁴ Ngant, tika Diapm tiba nok kota asal-Nya, Diapm ngajar nok sinagoge-sinagoge datn hingga datn takjub ngant nyonok, ''Sok kiah Nyo te depit kubijaksanaan ngant mukjizat-mukjizat te? ⁵⁵ Bukankoh Diapm te nak nyo tukang koyuh? Bukankoh nok-Nya adalah Yakobus, Yusuf, Simon, ngant Yudas? ⁵⁶ Bukankoh posik-posik-Nya dik dayua biatn nok antara yah? Lalu, sok kiah Nyo te depit sumua hal te?'' ⁵⁷ Ngant, datn tusinggung oleh-Nya. Namun, Yesus nyonok nganu datn, ''Nyo nabi bukannya kai nihormati, kucuali nok ahok asalnya ngant nok homingnya sendiri.'' ⁵⁸ Ngant, Diapm kai lakukan obeh mukjizat nok nyih karna kaipucayaan datn.