² Telah odatn-odatn kudu bolas rasul hant: dik putama, Simon dik ninyonok Petrus, ngant Andreas posiknya, ngant Yakobus nak Zebedeus, ngant Yohanes posiknya, ³ Filipus, ngant Bartolomeus, Tomas, ngant Matius si pungumpul pajak, Yakobus nak Alfeus, ngant Tadeus, ⁴ Simon nyo Zelot, ngant Yudas Iskariot dik hianati Yesus. ⁵ Yesus ngutus kudu bolas rasul hant ngant mihitah datn, ''Yiak obu koni johatn bangsa-bangsa lain atau namok koni wah kota nyo Samaria, ⁶ melainkan obulah nganu domba-domba dik tusesat sok antara Umat Israel. ⁷ Ngant, selama muk obu, buhitolah samah nyonok, 'Kuhajaan Surga jeh somak.' ⁸ Sembuhkanlah dik monap, midiapmlah dik kobek, tahirkanlah dik kusta, ngant ngosarlah minu-minu bek. Muk himo samah cuma-cuma. ⁹ Yiak muk matn mas, atau perak, atau tembaga wah tohih kopuamuk, ¹⁰ atau tas ngadok punyalatn, atau du helai bojuh, atau silup, atau tongkat sebab nyo pukihija pantas ngadok duaknya. ¹¹ Ngant, nok kota atau desa nokiah pun dik muk namok, sulidikilah osiah dik layak nok wahnya ngant togatnlah nok nyih sapai muk berangkat. ¹² Tika muk namok homing hant, pinyuklah salam. ¹³ Ngant, jika homing hant layak, adunglah damai sejahteramuk monok somunya, tapi jika kai, adunglah damai sejahteramuk boliak nganumuk. ¹⁴ Ngant, osiah saja dik kai himo muk atau kai mau ngopink kusanokmuk, tika muk kuluar sok homing atau kota hant, kebaskanlah dobu kojokmuk. ¹⁵ Kuk ngonok dik subonarnya nganumuk bahwa pada onu penghakiman, dok lobiah bisa nanggungnya daripada kota hant.'' ¹⁶ ''Hanong, Kuk ngutus muk mah domba koni tudok-tudok serigala. ¹⁷ Dok tapi, buhati-hatilah tuhadap nyo-nyo karna dok nyerahkanmuk nganu sanhenrin ngant dok cambukmuk nok sinagoge-sinagoge datn. ¹⁸ Ngant, muk dok nimatn koni hadapan para punguasa ngant para haja demi Kuk, subagai kesaksian ngadok datn ngant ngadok bangsa-bangsa laink. ¹⁹ Namun,tika datn nyerahkan muk, yiak khawatir tentang bagaimana atau oniah dik muk nyonok karna saat hant gik dok niminyuk konimuk oniah dik harus muk nyonok. ²⁰ Seabab, bukan muk dik ngomong, tapi hant adalah minu Mamuk dik ngomong nok wah muk. ²¹ Posik dok nyerahkan posiknya nganu kumatian, ngant ma tuhadap naknya. Ngant, nak-nak dok lawant para nyo mutuh ngant komek datn. ²² Muk dok nibenci oleh sumuanya karna odatnkuk, tapi nyo dik butahatn sapai akhir dok niselamatkan. ²³ Tika datn nganiaya muk wah nyik kota, obulah koni kota dik laink. Kuk nyonok dik subonarnya konimuk bahwa muk kai dok selesai nosok kota-kota Israel sapai Nak Nasio monik. ²⁴ Nabuah kai lobiah gurunya, demikian gik hamba kai lobiah mutuhnya. ²⁵ Cukuplah jika nabuah jodi mah gurunya, ngant hamba jodi mah mutuhnya. Jika datn nyebut tuan rumah hant Beelzebul, lobiah buruk gik nganu anggota kuluarganya.'' ²⁶ ''Karna hant, yiak muk golak tuhadap datn sebab kai biatn oniah pun dik tutup dik kai dok niungkap, atau dik tusukatn dik kai dok nikutau. ²⁷ Oniah dik Kuk nyonok nganu wah kegelapan, sanoklah hant wah terang. Ngant, oniah dik muk ngopink nibisikkan nok kopinkmuk, beritakanlah nok somu atap homing. ²⁸ Yiak golak nganu datn dik komek opuk, tapi kai depit komek jiwa, laink tulobiah golaklah nganu Diapm dikn depit musnahkan jiwa maupun opuk nok datn. ²⁹ Bukankah du golok monuak piat nijual ngadok nyik duet? Ngant, kai biatn seekor pun sok datn dok hobuk koni poyok nok luar kuhendak Mamuk. ³⁰ Bahkan , buhupak bakmuk sumuanya tuhitong. ³¹ Karna hant, yiak golak, muk lobiah bunilai daripada obeh monuak piat.'' ³² ''Jodi,sutiap nyo dik ngaku KUk nok jowi nasio, Kuk gik dok ngakunya nok jowi Ma-Kuk dik biatn nok surga. ³³ Dok tapi, osiah dik nyangkal Kuk nok jowi nasio, Kuk gik dok nyangkalnya nok jowi Ma-Kuk dik biatn nok surga.'' ³⁴ ''Yiak bupiker bahwa Kuk monik ngadok matn budamai nok bumi. Kuk monik bukan ngadok matn budamai, laink podang. ³⁵ Sebab, Kuk monik ngadok misah dahi-dahi sok manya, nak dayua sok noknya, naibatn dayua sok nok mertuanya, ³⁶ ngant musuh nyo adalah sok anggota kuluarganya. ngant musuh nyo adalah sok anggota kuluarganya. ³⁷ Osiah dik lobiah ngasihi ma atau noknya daripada Kuk, kai layak bagi-Ku. Ngant, osiah dik lobiah ngasihi nak dahi-dahi atau naknya dayua daripada Kuk, kai bagi-Kuk. ³⁸ Ngant, osiah dik kai mikul salibnya ngant ngajah Kuk, kai layak bagi-Kuk. ³⁹ Osiah dik putahankan nyawanya dok kumoyapm nyawanya, ngant osiah dik kumoyapm nyawanya demi Kuk dok depitnya.'' ⁴⁰ ''Osiah dik himo muk, himo Kuk. Ngant, osiah dik himo Kuk,himo Diapm dik ngutus Kuk. ⁴¹ osiah dik himo nabi wah odatn nabi dok himo upah nabi. Ngant, osiah dik himo nyo odunk wah odatn nyo odunk dok himo upah nyo odunk.