¹ Dah ada banyak urangk barusaha manyunsut'n habuah catatan tentangk peristiwa-peristiwa yankg dah tajadi di tongah-tongah kitu, ² upa halnya catatan yankg dah di carita ka kitu oleh urankg-urankg yankg sejak hamula dah njadi saksi mata wat'n pamborek brita Firman. ³ Karena aku dah mampalajar hamuanya lawat'n taliti niti awal, baiklah aku jup'm nulisnya hacara tarator untok ikau,hai Teofilus yankg mulia, ⁴ Nyaman ikau dapat ntaok kabonar'e tentankg hal-hal yankg dah diajar'ek ka ikau. ⁵ Pada masa pamaretah Herodes,ada haurankg yankg badama Elisabet. ⁶ Zakharia lawat'n Elisabet adalah urankg-urankg yankg bonar di mata Allah. hidak idup ndak bacela sasuai lawat'n hamua ukup'm wat'n parintah Tuhat'n. ⁷ Tatapi hidak ndak ada ona'k karena Elisabet mandol karena dak dua'k dah hangat tua. ⁸ Katika tiba giler rombonkg inya untok batugas, Zakharia ndapat tugas untok njadi imam di adap Allah. ⁹ Manurut kabiasa kaimaman,Zakharia tapileh karena diundi untok mansok ka rumah Allah. ¹⁰ Pada saat ukupat'n dipasembah'ek haluroh, umat badoa di luar. ¹¹ Tiba-tiba,malekat Tuhat'n mayok diriknya ka Zakharia lalu badiri di tiba kanan altar ukupat'n. ¹² Katika maliat malekat yat'n, Zakharia njadi bagogar lawat'n hangat golak. ¹³ Tapi, malekat yat'n ngomong ka'inya "ndak am golak, Zakharia, sebab doa pamohonkau dah nak dinga. Binikau, Elisabet, nak marana'k haurankg ona'k lalaki untok ikau lalu ikau mborek dama ka inya Yohanes. ¹⁴ Ikau nak baandal-andal wat'n barindang-rindang,lawat'n banyak urangk jup'm nak niru ikau andal atas kalahernya. ¹⁵ Inya sisok manjadi bosar di adab Tuhatn tapi horut nya minum anggur lawat'n minum-minum yankg koras lainkgnya. Bahkat'n,sejak niti dalap'm kandongk indongknya inya hararat diponoh'ek oleh Roh Kudus. ¹⁶ Inya nak mbulah banyak urankg Israel babalik kapada Tuhan, Allah hidak. ¹⁷ Inya bajalat'n dolok niti Tuhan wat'n roh lawat'n kuasa Elia Inya jum nak mbulah urankg-urankg yankg ndak taat untok babalik kapada hikmat urankg-urankg bonar.Lalu mian, inya manyiap umat yang dah disadia untok Tuhat'n." ¹⁸ Zakharia ngomong ka malekat yat'n, "Kamonikah aku nak ntaok tentankg hal tok? Sebab,aku tok dah tua wat'n biniku jum dah malawa." ¹⁹ Malekat yat'n njawab, "Aku adalah Gabriel,malekat yankg badiri di adab Allah.Aku di huroh untok ngomong lawat'n ikau wat'n nyarita kabar baik tok kaikau. ²⁰ Namun,tika tok dinga'eklah! karena Ikau ndak pacayak Ikau jadi bisu'k lalu ndak dapat ngamong hampai pada ari katika hal-hal tok tajadi karena ikau ndak pacayak ka paromong ku, yankg nak digenap'ek pada waktunya." ²¹ Hamantara yat'n,umat nuggu Zakharia Hidak batanyak-tanyak ngopai Zakhria diap'm talalu lamak di dalap'm rumah Allah. ²² Katika kaluar,Zakharia ndak taok ngomong ka hidak.Hidak pai taok bahawa Zakharia dah nomu paintai di dalap'm Rumah Allah sebab inya terusmanerus mbulah kode ka hidak, tapi ndak taok ngomong. ²³ Hatelah jangka waktu tugas kaimamnya abis,pulankg am Zakharia ka rumahnya. ²⁴ Haudah peristiwa yat'n Elisabet ngandonkg lalu morap'm dirik'e halamak lima'k bulat'n. Inya ngomong, ²⁵ "Toklah yankg dah Tuhat'n laku'ek ka aku Inya maratiku wat'n mapus aibku niti ntara urankg banyak." ²⁶ Pada waktu umor kandonkg Elisabet baumor nam bulat'n,Allah nyuroh malekat Gabriel ka habuah kota di wilayah Galilea, yankg badama Nazaret. ²⁷ Inya diutus untok nomu haurankg parawat'n yankg dah batunang.Dama parawat'n yat'n adalah Maria. ²⁸ Lalu, malekat yat'n datankg kapada Maria lawat'n ngomong, "salap'm, hai ikau yankg di barekat! Tuhat'n baharota ikau." ²⁹ Ninga omong yat'n,Maria njadi herat'n. Inya batanyak-tanyak dalap'm ati'nya tentankg reti salap'm yat'n. ³⁰ Malekat yat'n ngomong kainya, "ndak'am gola'k,Maria, karena Allah dah mborek kaseh karunianya ka'ikau. ³¹ Dinga'eklah, ikau na'k ngandonkg lalu marana'k haurankg ona'k lalaki ikau mborek dama ka'Inya Yesus. ³² Inya njadi bosar lalu dihobut ona'k Allah yankg Mahatiggik. Tuhat'n Allah nak mborek nya tahta Daud,inek muyang-nya. ³³ Inya nak mamarentah atas katurut'n Yakub untok halamak-lamaknya lalu karajaan-Inya ndak huah bamparadok." ³⁴ Lalu,Maria ngomong ka malekat yat'n,"Kamoni hal tok nak tajadi padahal aku olup'm balaki?" ³⁵ Malekat yat'n njawab harota ngomong ka'inya, "Roh Kudus nak datankg ka atas ikau wat'n kuasa Allah Yankg Mahatiggi'k malindongikau. Yat'n lah sebabnya,Ona'k yankg nak kau parana'k'ek yat'n adalah kudus yankg nak hobut Onak Allah. ³⁶ Lalu,kataok'eklah bahawa Elisabet,sodarakau yat'n,hodankg ngandonkg jup'm di masa tuanya. Inya yankg bare'k di hobut mandol,tika tok dah ngandonkg halama'k nam bulat'n. ³⁷ Sebab,ndak ada hal yankg mustahel untok Allah." ³⁸ Lalu,Maria ngomong,"sabonarnya'sih, aku'tok hamba Tuhat'n .tajadilah padaku upa yankg ikau kata'ek yat'n."Ha'udahnya malekat yat'n barangkat ninggal inya. ³⁹ pada ari-ari yat'n,Maria basiap-siap untok hagera barangkat ka daerah babukit,ka salah satu kota di Yehuda. ⁴⁰ Inya tama'k ka rumah Zakharia wat'n mborek salap'm ka Elisabet. ⁴¹ Katika Elisabet ninga salap'm niti Maria,ona'k di dalap'm kandonkg nya malumpat lalu Elisabet di ponoh Roh Kudus. ⁴² Haudahyat'n Elisabet baseru lawat'n suara kojankg, "Dibarekat'eklah ikau di ntara hamua batinak, wat'n di barekat'eklah buah kandonkg kau. ⁴³ Hopaikah aku tok hampai indonkg Tuhat'n ku datankg ka aku? ⁴⁴ Unggoh,katika ninga suara salap'm kau mansok katalingaku ,ona'k di dalap'm kandonkg ku malumpat karena andal. ⁴⁵ Babahagialah inya yankg pacayak bahawa opai yankg di omong Tuhat'n ka inya pasti di genap'ek." ⁴⁶ Lalu,kata Maria,"jiwaku mamulia tuhat'n Allah, ⁴⁷ lawat'n rohku pai andal di dalap'm tuhat'n Allah, jurus halamatku. ⁴⁸ Sebab,Allah dah mparitonkg hamba-nya yankg ja'at tok. Dinga'eklah, mulai tikatok lawat'n haterusnya, haluroh katurut'n nak nyobut aku sangat bahagia. ⁴⁹ Karena inya yankg maha kuasa dah malaku hal-hal yankg bosar ka'aku, lawat'n dama Nya yankg kudus. ⁵⁰ rahmat-nya dibore'k niti katurut'n ka katurut'n kapada urankg-urankg yankg gola'ak ka Inya. ⁵¹ Inya dah nunjok kuasa-nya lawat'n jari-nya, Inya mancorai-borai urankg-urankg yankg hombonkg dalap'm pamiker atinya. ⁵² Inya nurut'n bala panguasa niti takhta hidak,lalu ninggik urankg-urankg yankg bewah ati. ⁵³ Inya dah mangonyang urankg yankg kalapar lawat'n kabaik'e,tatapi nguser urankg kaya rari lawat'n jari kosonkg. ⁵⁴ Allah dah nulonkg Israel,hamba-nya karena mingat janji-nya. ⁵⁵ Poni yankg dah inya omong-ek ka inek muyang kitu,ka Abraham lawat'n katurut'n-nya halamak-lamaknya." ⁵⁶ Lalu,Maria magga'k Elisabet kira-kira tiga bulat'n lama'k-nya,orok inya pulankg ka rumah-nya. ⁵⁷ Tikatok datankglah paringkah Elisabet nak barana'k lalu inya marana'k ha urankg ona'k lalaki. ⁵⁸ Bala tatanggak lawat'n kaluarganya ninga bahawa Tuhat'n dah nunjok janji-nya yankg bosar ka Elisabet,lalu hida'k nurut jupm andal bahamah wat'n-inya. ⁵⁹ Pada ari yankg kalapat'n, hidak datankg untok manyunat onak biak yat'n.hidak nak mborek dama nak biak yat'n Zakharia,upa dama opankgnya. ⁶⁰ Tatapi,indonkgnya ngomong,"ndak-am,karena inya ku dama-ek Yohanes." ⁶¹ Urankg-urankg yat'n ngomong ka Elisabet,"Ndak ada haurankg pai di ntara adek-baradekkau yankg konak pulah dama wat'n dama yat'n." ⁶² Haudahyat'n,hidak mborek sarat ka Zakharia untok hidak batanyak ka'inya,dama opai yankg nak kau barek ka nak biak yat'n. ⁶³ Zakharia minta'k hutek papat'n tulis, lalu nulis upa to'k: "Damanya Yohanes." lalu hamua urankg njadi herat'n. ⁶⁴ Katika yat'n jup'm, mulut Zakharia tabuka'k lawat'n lidahnya talopas. inya pai mulai taok ngomong lalu mamuji Allah. ⁶⁵ Hamua tatanggak hidak njadi gola'k lawat'n kajadinya mintok lalu njadi paromong di haluroh desa idar bukit yudea. ⁶⁶ Lalu hamua urankg yankg ninga hal tok batanya'k-tanya'k dalap'm ati hida'k, "Na'k njadi opaikah onak biak tok sisok ?"sebab,jari tuhat'n nyarotainya. ⁶⁷ Zakharia,opankg Yohanes,jup'm diponoh lawat'n Roh Kudus lalu banubuat,katanya, ⁶⁸ "Tapujilah tuhatn, Allah Israel sebab inya dah malawat wat'n manobus umatnya. ⁶⁹ Inya dah mangkit tandok kahalamat untok kitu angkit niti katurut'n Daud,hamba-nya, ⁷⁰ upa yankg inya firman'ek malalu mulut nabi-nabi Nya yankg kudus tinja barek arit'n ⁷¹ agar kitu dihalamat'ek niti munsoh-munsoh kitu,lawat'n niti jari hamua urankg yankg boce'k kakitu. ⁷² Inya malakunya untok nunjokrahmat'e ka inek muyang kitu,lalu karena inya ingat ka pajanji-nya yankg kudus, ⁷³ yat'n am humpah yankg inya ucap'ek ka inek muyangkitu, Abraham, ⁷⁴ bahawa kitu nak di bebas'ek niti jari munsoh-munsoh kitu sumpaya kitu taok malayan-inya ndak ada parasa gola'k, ⁷⁵ dalap'm kakudus lawat'n kabonar di adap inya,saumor idup kitu. ⁷⁶ Lalu ikau, ona'kku, yankg nak dihobut nabi Allah yankg mahatinggi'k,sebab ikau nak bajalat'n ndolok niti tuhan,untok manyiap jalat'n untok inya. ⁷⁷ Untok mborek pangareti tentankg kahalamat ka umat-nya malalu pangamput'n atas hagala dosa-dosa hidak. ⁷⁸ Karena rahmat wat'n balas kaseh Allah kitu, pancar Mata'ari nak mancar kitu niti utat'n tinggi'k ⁷⁹ untok mancar hidak yankg tinggal dalap'm utat'n potangk lawat'n yang ada dalap'm bayankg-bayankg maut,untok nuntut'n kaki kitu manuju ka jalat'n damai sejahtera." ⁸⁰ mangkak,onak biak yat'n batumboh hamangkin bosar, wat'n hamangkin kuat di dalap'm roh. inya diam di padang paser hampai tiba waktunya untok mayok dirik'e ka bangsa Israel.