¹ Ako' koo,aku nanang sege' pintu tabuko' di Sarugo, lalu suaro tai nang aku nangar angayo suaro sarompet bakato ba aku, bakato, "naiklah kasio lalu Aku magari'atno' ka kau dameo nang mao' tajadi ako' nyian." ² Di koo ugo',aku dikuasai' Roh* lalu tananglah, sabuoh takhta ado ka Sarugo lalu seko' urokng duduk ka atastakhra koo. ³ Lalu, Io nang dudukka atas takhta koo, gari' angayo batu permata yaspis ba sardis; lalu ado sabuoh pelangi ka sakaliling takhta koo, nang gari'e angayo zamrud. ⁴ Ka sakaliling akhta koo ado duapuluh ampat ege' takhta lalu di atas takhta-takhta koo aku nanang duapuluh ampat antuo-tuho duduk, make juboh putih lalu ba mahkota- mahkota amas ado di kapalo ne'ido'. ⁵ Lalu, ampat ka takhta koo kauar kilatan ate' ba gamuruh suaro guntur. Lalu, ado tujuh sensan nang nyalo ka adapotn takhta koo, nang koo ratie tujuh Roh Allah. ⁶ Lalu, ka adapotn takhta koo ugo' ado sasuatu angayo lautan kaco, angayo kristal. Di tangoh ba sakaliling takhta koo ado ampat barang nang baisi' mato di bagian muho ba baikaknge. ⁷ Barang nang pamulo angayo singo, lalu barang nang kaduo angayo sapi aki', lalu barang nang katalu, muhae angayo muho manusio, lalu barang nang ka ampat angayo burukng binau gi' tarabokng. ⁸ Ka ampat barang koo masing - masing ado anam seape nang baisi' mato, baik sisi uase maopun daapme; siokng ba maam, ka ampat barang koo ino' suoh baranti ba kato, Kudus, kudus, kuduslah Tuhan, Allah Nang Maha Kuaso, nang dah ado, nang ado, lalu nang pasti atokng." ⁹ Lalu, satiap kai barang-barang koo mare' kamuliootn, tabe' lalu ba syukur ka Io duduk ka atas takhta, nang idup salama-lamae, ¹⁰ kaduapuluh ampat antuho-tuho koo nyamboh ka adapotn Io nang duduk di atas takhta koo, lalu nyamboh Io nang idup sampe salama-lamae koo, lalu nabakotn mahkota ne'ido' ka adapotn takhta koo sambil bakato, "Oh Tuhan ba ¹¹ Allah kami, Kau pantas narimo' kamuliootn, tabe' ba kuaso karamo Kau dah ngamuat sagalae lalu karamo kahandak-Ngu samuo koo ado Kau ngamuat."