¹ Allah Dah Bakato' Ngalalui Anak-Ke Dah ako' di maso nang de'e, Allah baulang kali bakato' ka nene' moyang diri ngalalui paro nabi, ² pado ari-ari taahir nyian, Allah bakato' ka diri ngalalui anak-Ke nang dah Iyo milih onto jadi pawaris atas sagalo sasuatu, nang ngalalui Iyo ugo Allah nyipto'ot alam samesta. ³ Iyo kowo cahayo kamulian Allah ba gambar nang sampurna dari sifat-Te, Iyo ugo nang nahan sagalo sasuatu ba firman kuaso-E. Dah ako nyasoh doso-doso, Iyo dodok ka sabaloh kanan Nang Sidiayo' di tampat tinggi, ⁴ sahiggo Iyo jadi jauh labih tinggi daripado malaekat-malaekat samo angayo' namo nang di mare'ot ka Iyo jauh labih gagas daripado namo ne'ido'. ⁵ Karano ka apelah di antaro malaekat-malaekat kowo suoh Iyo ngato'ot "Anak-Ku Kau! Kau dah Kunyuruhot pado ari nyian?" "Aku akan jadi Bapo-E, dan Iyo akan jadi Anak-Ku?" ⁶ Pas Iyo nabanan anak-Ke nang sulong ka dunio, Iyo bakato' "Samuo malaekat Allah harus nyamboh Iyo." ⁷ Ba kisoh malaekat-malaekat Iyo bakato, "Nang ngamuat malaekat-malaekat-Te jadi badai ba pelayan-pelayan-Ne jadi nyalo api." ⁸ Tatapi kisoh Anak Iyo bakato', "Tahta-Ngu, ya Allah, tatap onto sataruse ba salamae, tungkat karajaan-Ngu adolah tungkat kabanarot. ⁹ Kau nyintai kaadilan dan teget kajahatan. karano kowo Allah, Allah-Ngu dah ngurapi kau ba minyak sabagai tando kasukaan ngalabihi ayuk-ayuk-Ngu." ¹⁰ Dan pado mulae, ya Tuhan, Kau dah muangan dasar bumi ba angit kowolah buatan kokot-Ngu. ¹¹ samuhe'e kowo mao binaso, tatapi Kau tatap ado, samuhe'e kowo mao jadi rusak angayo pakean. ¹² angayo juboh mao Kau golongkan ne'ido', angayo pasalinan ne'ido' mao diuboh, tatapi Kau tatap samo, ba tahut-tahut-Ngu ano' bakasudohot. ¹³ Kasiapelah di antaro malaekat kowo suoh Iyo bakato' "Dodoklah di sabaloh kanan-Ku, sampe Kuamuat musuh-nusuh-Ngu jadi paninyakot poho-Ngu"? V 14Buke ge ne'ido' samuo adolah roh-roh nang malayani, nang dingotos onto malayani ne'ido' nang harus namu kaselamatot?