9 ¹ Sumakay si Jesus sa bangka, tumawid sa kabilang dako, at nakarating sa kaniyang lungsod. ² Masdan, dinala nila sa kaniya ang isang lalaking paralisado na nakaratay sa higaan. Nang nakita niya ang kanilang pananampalataya, sinabi ni Jesus sa paralisado, "Anak, magalak ka. Pinatawad na ang iyong mga kasalanan." ³ Masdan, ang ilan sa mga eskriba ay nagsabi sa kanilang mga sarili, "Ang taong ito ay lumalapastangan sa Diyos," ⁴ Batid ni Jesus ang kanilang iniisip at sinabi, "Bakit kayo nag-iisip ng masama sa inyong mga puso? ⁵ Sapagkat alin ba ang mas madaling sabihin, 'Napatawad na ang iyong mga kasalanan' o ang sabihin, 'Tumayo ka at lumakad'? ⁶ Ngunit para malaman ninyo na ang Anak ng Tao ay may kapangyarihan na magpatawad ng kasalanan dito sa lupa,..." sinabi niya sa paralisado, "Tumayo ka, buhatin mo ang iyong higaan, at umuwi ka sa iyong bahay." ⁷ Pagkatapos ay tumayo ang lalaki at umuwi sa kaniyang bahay. ⁸ Nang makita ito ng napakaraming tao, namangha sila at nagpuri sa Diyos, na siyang nagbigay ng ganoong kapangyarihan sa mga tao. ⁹ Nang si Jesus ay umalis mula doon, nakita niya ang lalake na nagngangalang Mateo na nakaupo sa lugar ng paningilan ng buwis. Sinabi niya sa kaniya, "Sumunod ka sa akin." Tumayo siya at sumunod sa kaniya. ¹⁰ Habang nakaupo si Jesus upang kumain sa bahay, masdan, dumating ang maraming mga maniningil ng buwis at mga makasalanang tao at nakisalo sila kay Jesus at sa kaniyang mga alagad. ¹¹ Nang makita ito ng mga Pariseo, sinabi nila sa kaniyang mga alagad, "Bakit ang inyong guro ay kumakain kasama ng mga maniningil ng buwis at mga taong makasalanan?" ¹² Nang marinig ito ni Jesus, sinabi niya," Hindi nangangailangan ng manggagamot ang mga taong may malalakas na pangangatawan, iyon lamang may mga sakit. ¹³ Dapat kayong humayo at unawain ang ibig sabihin nito, 'Nais ko ay habag at hindi alay.' Sapagkat ako ay pumarito, hindi upang tawagin ang matuwid na magsisi, kundi ang mga makasalanan." ¹⁴ Pagkatapos ay pumunta ang mga alagad ni Juan sa kaniya at sinabi, "Bakit kami at ang mga Pariseo ay madalas na nag-aayuno, ngunit ang iyong mga alagad ay hindi nag-aayuno? ¹⁵ Sinabi ni Jesus sa kanila, "Puwede bang maging malungkot ang mga panauhin habang kasama pa nila ang lalaking ikakasal? Ngunit darating ang mga araw na kukunin sa kanila ang lalaking ikakasal at saka sila mag-aayuno. ¹⁶ Walang taong naglalagay ng bagong tela sa lumang damit, sapagkat matatastas ng tagpi ang tela, at mas magiging malala lang ang punit. ¹⁷ Ni walang taong naglalagay ng bagong alak sa lumang sisidlang balat. Kung gagawin nila ito, puputok ang sisidlang balat, matatapon ang alak, at ang sisidlang balat ay masisira. Sa halip, naglalagay sila ng bagong alak sa bagong sisidlang balat, at parehas na magtatagal." ¹⁸ Habang sinasabi ni Jesus ang mga bagay na ito sa kanila, masdan, dumating ang isang opisyal at lumuhod sa kaniya. Sinabi niya, "Kamamatay pa lamang ng aking anak na babae, ngunit sumama ka at ipatong mo ang iyong kamay sa kaniya, at siya ay mabubuhay." ¹⁹ Pagkatapos ay tumayo si Jesus at sumunod sa kaniya, at ganoon din ang ginawa ng kaniyang mga alagad. ²⁰ Masdan, may isang babae na dinudugo ng malala sa loob ng labindalawang taon ang lumapit sa likuran ni Jesus at hinawakan ang laylayan ng kaniyang damit. ²¹ Sapagkat sinabi niya sa kanyang sarili, "Kung mahawakan ko lamang ang kaniyang damit, ako ay gagaling." ²² Ngunit lumingon si Jesus at nakita siya at sinabi, "Anak, magpakatatag ka; pinagaling ka ng iyong pananampalataya." At gumaling ang babae noong oras na iyon. ²³ Nang dumating si Jesus sa bahay ng opisyal, nakita niya ang mga tumutugtog ng plauta at ang mga tao na gumagawa ng matinding ingay. ²⁴ Sinabi niya, "Umalis kayo, sapagkat hindi patay ang babae kundi natutulog lamang." Ngunit pinagtawanan nila siya nang may pangungutya. ²⁵ Noong napalabas na ang mga tao, pumasok siya sa silid at hinawakan siya sa kamay at ang babae ay bumangon. ²⁶ Ang balita tungkol dito ay kumalat sa buong rehiyon na iyon. ²⁷ Habang papalayo si Jesus mula roon, dalawang bulag na lalaki ang sumunod sa kaniya. Patuloy silang sumisigaw at nagsasabing, "Maawa ka sa amin, Anak ni David!" ²⁸ Nang dumating si Jesus sa bahay, lumapit ang mga bulag sa kaniya. Sinabi ni Jesus sa kanila, "Naniniwala ba kayo na magagawa ko ito?" Sinabi nila sa kanya, "Opo, Panginoon." ²⁹ At hinawakan ni Jesus ang kanilang mga mata at sinabi, "Mangyari ito sa inyo ayon sa inyong pananampalataya," ³⁰ A nabuksan ang kanilang mga mata. Pagkatapos ay mahigpit silang pinagbilinan ni Jesus, "Tiyakin ninyong walang makakaalam tungkol dito." ³¹ Ngunit lumabas ang dalawang lalake at ikinalat ang balitang ito sa buong rehiyon. ³² Habang papalayo ang dalawang lalaki, masdan, isang lalaking pipi na sinapian ng demonyo ang dinala kay Jesus. ³³ Nang napalayas na ang demonyo, ang lalaking pipi ay nakapagsalita. Ang mga tao ay namangha at nagsabi, "Kailan man ay hindi pa ito nakita sa Israel!" Ngunit sinabi ng mga Pariseo, ³⁴ "Sa pamamagitan ng pinuno ng mga demonyo, siya ay nakapagpapalayas ng mga demonyo." ³⁵ Pumunta si Jesus sa lahat ng mga lungsod at mga nayon. Nagpatuloy siyang nagtuturo sa kanilang mga sinagoga, ipinangangaral ang mabuting balita ng kaharian, at pinapagaling ang lahat ng mga uri ng karamdaman at ang lahat ng uri ng sakit. ³⁶ Nang makita niya ang napakaraming tao, nahabag siya sa kanila, dahil sila ay naguguluhan at pinanghihinaan ng loob. Para silang tupang walang pastol. ³⁷ Sinabi niya sa kaniyang mga alagad, "Marami ang aanihin ngunit kakaunti ang manggagawa. ³⁸ Kaya madaliin ninyong idalangin sa Panginoon ng pag-aani, upang makapagpadala siya ng mga manggagawa sa kaniyang anihan."