¹ Lat mǝn Yesu laa ɓǝlǝp gǝ gurum wukǝrgǝi gǝ jepgǝdǝr muup. ² Laa yen, "Mǝbyiyil gǝ Farisiyawa muop a gǝ pǝtong Musa. ³ A nsa kam hǝ, gu tǝt jepe wu mǝ laa gǝgun hǝ. Gu nyit jepe wu muop fu chan hǝ, nsa bii mǝ laa dat shi fu mǝn mǝ chan mou. ⁴ A kam, bii mǝ ɗyan lee wutǝgǝn, wu gǝ ɓǝs mang mou, mǝn mǝ lǝng gǝ bab gurum muop. Ɗe muop bii mǝ tǝpdǝr wa shi laa sar muop. ⁵ Bii mǝ chan jepe a dǝr gurum naa dat. Bii mǝ myap byigya gǝmuop a wunan, mǝn mǝ taan fu tǝgoo gǝmuop a wukǝkaam. ⁶ Mǝ tangkop pǝtugat wuret gǝpe byisǝ gǝ lǝwap. ⁷ Mǝ tangkop gurum nang muop gǝ lǝtuk, mǝn mǝ yong muop shi mǝsheepee. ⁸ Ɗe gun, gǝ mǝ yong gun shi 'Miskagam' mou, nsa gun gǝ miskagam a gǝme, mǝn gun nau a mǝjepnǝgǝn suk. ⁹ Gu yong mǝgwuo shi ndaa gǝyil mou, nsa gun gǝ ndaa gǝme dat wu nyi gǝbǝtǝng hǝ. ¹⁰ Gǝ mǝ yong gun shi 'wusheepee' mou, nsa gun gǝ wusheepee a gǝme dat, nyi a Kristi. ¹¹ Mǝgwuo wu a wuyoon dip gǝnaar gu gǝ kwǝt a frang gǝgu. ¹² Mǝgwuo wu pǝn yoon nshik ɓǝ gǝ mǝ sam gǝ nyi, mǝgwuo wu sam gǝkaa shik ɓǝ gǝ mǝ pǝn yoon nnyi. ¹³ Lat nkaa gu mǝbyiyil gǝ Farisiyawa, gun mweng! Gu ogot fulǝ yil-long gǝbǝtǝng kaa gurum muop. Nsa gu ruo gǝkaa suk mou, mǝn gu dǝn shi muop wu npe ruo hǝ. ¹⁴ . ¹⁵ Lat nkaa gu, mǝbyiyil gǝ Farisiyawa, gun mwǝng! Bii gu zar chip gǝ gǝyil dip npe gu kat mǝgwuo gǝme bat yi, mǝn ɗǝ nwaa nji dǝrgu, ɓǝ gu yaa nyi gu waa laa lǝwus gǝnyi maa wudok hǝ. ¹⁶ Lat nkaa gu, gun wuvagam wunyin war. Gu wu gu yen, 'Mǝgwuo nsǝgǝrfu shi lǝwap wuyoon ɓǝ a mǝbi mou. Ɗe mǝgwuo nsǝgǝrfu shi zinariya wu nɗǝgǝn lǝwap wuyoon nanyi ɓǝ gǝ yaa nyi.' ¹⁷ Gun wuvagam yogor muop! A me wuɗa a wu ma nde yi, a zinariya ha, a lǝwap wuyoon wu gǝ saar zinariya hǝ yi? ¹⁸ Gu chin gu yen, 'Mǝgwuo nsǝgǝrfu shi rǝk-tok ɓǝ a mǝbi mou. Ɗe mǝgwuo nsǝgǝrfu shi byipǝn wu gǝkaa rǝk-tok nanyi ɓǝ gǝ yaa nyi.' ¹⁹ Gun wuvagam! A me wuɗa a wu ma nde yi, a byipǝn a, a rǝk-tok wu gǝ saar byipǝn nanyi yi? ²⁰ A waa nnyi mǝgwuo wu sǝgǝrfu gǝ rǝk-tok ɓǝ sǝgǝrfu gǝnyi dau gǝ bii wu gǝkaa muup hǝ. ²¹ Mǝgwuo wu sǝgǝrfu gǝ lǝwap wuyoon ɓǝ sǝgǝrfu gǝnyi nau gǝ gwuo tongɗok nnǝgǝn hǝ. ²² Mǝgwuo wu sǝgǝrfu gǝ gǝ gǝbǝtǝng, ɓǝ sǝgǝrfu gǝ pǝtong Naan gǝ nyi wu tongɗok gǝkaa. ²³ Lat nkaa gu mǝyiyil gǝ Farisiyawa, gun mweng! Bii gu waapkaa ɓugatshagal wufo, gǝ nyeges gǝ ǝk jeptǝng, ɗe nyang chan jepe wu byitǝt laa hǝ—naduk, gǝ naachigir gǝ pǝn-naduk. Ɗong ɗyin gu chan a muop nau gǝ wudung gun fu chan gwe hǝ. ²⁴ Gu a wuvagam mǝnyin war, bii gu seng nalip gu vak gǝnyi ɗe gu ɗyilang kulmi! ²⁵ Lat nkaa gu mǝbyiyil gǝ Farisiyawa, mweng muop! Bii gu vang gǝnook foon gǝ klang, ɗe gu nyit ɗǝgǝn gǝ tǝlǝk gǝ ɗǝm kaashik. ²⁶ Farisiyawa wuvagam! Gu vang a ɗǝgǝn foon gǝ klang nanyi ɗewar gǝnook muup ɓang yi zak. ²⁷ Lat nkaa gu mǝbyiyil gǝ Farisiyawa, mweng muop! Gun a kabi gǝcher wu mǝ mǝm shi amvir wupya, mǝn ɗong lang yi shi gǝtal ɗe ɗǝgǝn a nagǝt ǝgǝs kum gurum, gǝ jepe wurap muo dat. ²⁸ A kam shi gǝtal ɓǝ gun a wukǝr dat ntagam gurum, ɗe nɗǝgǝn ɓǝ gun a mweng gǝ mǝ chan ɓǝtbis. ²⁹ Lat nkaa gu mǝbyiyil gǝ Farisiyawa, mweng moup! Gun ɗyak gǝcher mǝlaa-ɓǝlǝpnaan mǝn gu daa gǝcher gurum wukǝr muop. ³⁰ Gu yen, 'Ɗyin dok mǝn gǝshi yigil ndaamu muop, ɓǝ dok mǝ tuo mǝlaa-ɓǝlǝpnaan mou.' ³¹ Nsa kam sǝ mǝn gu twamshik nkwǝt gun a jep mup wu dok mǝ tuo mǝlaa-ɓǝlǝpnaan. ³² Gu kǝgǝt fu bii wudok ndaagu mǝ ɓwǝt kugur hǝ. ³³ Gun wuo, jep zem, chin a shime gu fat nfu nogolpe lǝwus yi? ³⁴ Waa nsa nyi, gǝ a lep gǝ mǝlaa-ɓǝlǝpnaan gǝ daas wusǝsoon gǝ mǝbyiyil. Ya gu tuo pak muop mǝn gu kwak gǝ shepɓeel; guu nas pak moup nlǝwap gǝgu, mǝn gu chen muop shi gǝfǝr gǝfǝr. ³⁵ A waa nnyi, tǝgǝm gurum wukǝr wudok gu tuo hǝ par lang nkaa gu; she shi tǝgǝm Habila mwaan gǝ rǝ shi tǝgǝm Zakariya laa Barakiya, wudok gu tǝ gǝkang pee-wuwaar gǝ rǝk-tok hǝ. ³⁶ A laa naduk gǝgun, jepe nhe nau gǝ ɗǝk kaa seen nhǝ. ³⁷ Urishalima, Urishalima, yi wu yi tuo mǝlaa-ɓǝlǝpnaan mǝn yi zuam muop wu mǝ lep dǝr yi hǝ shi pang! Dok a tangkop a tǝl jep yi kabi wu nǝgǝn koo bii tǝl jep muop lǝ ngagap muup mǝn yi nyang! ³⁸ Lǝ yi gǝ ɗe a kop. ³⁹ An fu laa gǝgun she gu naa an shizak mou, ɗe a par wu gu yen 'Wuret lang-nkaa nyi wu gǝ wul nɗǝgǝn sǝm Miskagam hǝ.'"