¹ Yesu bǝn laa nde ɓǝlǝp-kwoom gǝ muop yong, ² Yil-long gǝbǝtǝng a kabi me long wu myap pee npe ɓugatɗyik laa muup. ³ Lep frang afe mwaan mǝ yong gurum wudok dwam ɓugatɗyik nanyi gǝ muop hǝ, mǝn mǝ wul mou. ⁴ Long nanyi ɓǝn lep nde frang afe muop, yen, 'Gu laa dǝr muop wudok a dwam gǝ muop hǝ gu yen, "Gu naa, a myappe sǝ gwe. Mǝ kwap nǝng gǝ jep nǝng wunǝnan, jepe lat gwe nau. Gu jya dat."' ⁵ Mǝn mǝ lǝ endu me, mǝ yigil mwaan-mwaan gǝdu, nde mwaan nmar gǝfe, nde mwaan lǝtuk. ⁶ Pangkop gurum mǝ yak frang long mǝ nogol muop mǝn mǝ tuo muop. ⁷ Dǝfil mang long, mǝn lep gǝ sojya gǝfe mwaan mǝ tuo muop mǝn nuang gǝfǝr gǝmuop. ⁸ Lat mǝn laa gǝ frang gǝfe yong, 'Ɓugatɗyik nanyi yigit, mǝn gurum wu a dwam muop hǝ mǝ nyang wul. ⁹ A waa nnyi, gu mwaan gǝwar yoon mwaan gu dwam gurum gwet wu gu kat muop npe byisǝ nanyi. ¹⁰ Frang muop nanyi mǝ fat mwaan gǝwar yoon, mwaan mǝ wagar muop wu mǝ kat hǝ, wubyas gǝ wuret dip. Mǝn mǝzep mǝ gam gǝpe ɓugatɗyik nanyi. ¹¹ Long rǝ npe naa mǝzep muop, mǝn kat me mǝgwuo wu nyi gǝ byaat byisǝ nanyi mou. ¹² Long nang fu muop yong, 'Shaarnǝ, gǝ chin a nah gǝ rǝ npeen nǝ gǝ kwǝt gǝ byaat byisǝ yi?' Mǝn dagwuo nanyi lap ɓǝlǝp mou. ¹³ Lat mǝn long laa gǝ frang muop yong, 'Gu ɓugat sar dagwuo nhǝ gǝ kwak muop mǝn gu tak nyi nɗǝgǝn kwoo wu rip, a nnǝgǝn ɓǝ gǝ wal ba n-arap fu.' ¹⁴ Nsa mǝ yong gurum gwet, mǝn mǝ kok a til dat. ¹⁵ Farisiyawa mǝ mwaan lǝng gwak npe ɗǝ mǝ yaa nyi yi nɗǝgǝn gǝfe. ¹⁶ Mǝn mǝ lep jepgǝdǝr muop, gǝpe gǝme gǝ nung Hiridus. Mwaan mǝ laa gǝ Yesu mǝ yong "Wusheepee, mǝ man gǝ a wu laa naduk, mǝn gǝ fu sheepee gǝ war Naan nɗǝgǝn naduk. Bii gǝ weel lǝfu gurum, mǝn gǝ penyit gurum mou. ¹⁷ Ɗe gǝ kat a nah? Ɗong ɗyin mǝ kwat gǝndung mǝ pǝn Kaisar a?" ¹⁸ Yesu man ɓǝtbis gǝ muop, mǝn yong, "Mweng muoo, a nah gun fu katshi nǝ yi? ¹⁹ Gu nyin shagal gǝndung nanyi n-an." Mǝ pǝn dinari gǝme nnyi. ²⁰ Yesu laa gǝ muop yong, "A riin gǝ sǝm wuɗa shi nhǝ eh?" Mǝ laa gǝnyi mǝ yong, "A nung Kaisar." ²¹ Mǝn laa gǝ muop yong "Bii wu a nung Kaisar ɓǝ gu pǝn Kaisar, bii wu a nung Naan ɓǝ gu pǝn Naan." ²² Mǝ kǝlǝng kam mǝn rǝng muop. Mǝ yigil nyit nyi mǝn mǝ mwaan-mwaan gǝdu. ²³ Par ɓit nanyi mǝn pak Sadukiyawa, muop wu mǝ nyang ɓǝlǝp yagal-ntungn, mǝ jya dǝr muop. Mǝ nang fumuup, ²⁴ mǝ yen, "Wusheepee, Musa dok yen, 'Mǝgwuo nmuut nǝ njep, ɓǝ emnǝgǝn muup gǝ lap mat kop muup a lǝngwaar ɗewar ɓee jep yi n-emnǝgǝn muup. ²⁵ Dok daas pogovǝl a mǝjepnǝgǝn shak. Wupel lap mat mǝn muut, nook jep mou, mǝn nyit mat n-emnǝgǝn muup. ²⁶ Wu vǝl chin a kam, mǝn wukùn, dau mwaan gǝ rǝ shi wupogovǝl. ²⁷ Ndangkong wu muop dau mǝ ɗwam, mǝn namat nanyi zak muut. ²⁸ Ɗe par ɓit yigil-ntugun ɓǝ namat nanyi gǝ kwǝt a mat wuɗa gǝkang muop pogovǝl nanyi yi? Nsa muop dau dok mǝ lap nyi." ²⁹ Mǝn Yesu lap fu muop yen, "Gu takwar, nsa gu man bang-byiran gǝ maa nung Naan mou. ³⁰ Nsa shi yigil-ntugun bii gǝ lap mat ɗǝ mǝ pǝn mǝgwuo yi gǝɗyik mou. Muop a kabi mǝwong wu gǝbǝtǝng hǝ. ³¹ Nung yigil-ntugun mǝdiɗǝm, jet man gu bil ɓǝlǝp wudok Naan laa gǝgun yen, ³² 'An Naan Ibrahim, gǝ Naan Ishaku, gǝ Naan Yakubu' mou a? Nyi a Naan mǝdiɗǝm mou, nyi a Naan wu nkagam muop." ³³ Gurum wukǝrgǝi mǝ kǝlǝng sheepee afe nanyi mǝn rǝng muop. ³⁴ Farisiyawa mǝ kǝlǝng nkwǝt Yesu ogot fu Sadukiyawa muop mǝn mǝ tǝl kaa shak. ³⁵ Me muop wu a wuman byitǝt hǝ nang ɓǝlǝp npe katshi muup yi, yong, ³⁶ "Wusheepee, a me wuɗa a wuyoon dip gǝnaar byitǝt yi?" ³⁷ Yesu laa gǝnyi yen, "'Ɗem Miskagam gǝgǝ Naan gǝ bǝzung gǝ nau, gǝ chelem gǝ nau, gǝ enɗye gǝgǝ nau.' ³⁸ A nyi a wuyoon dip mǝn a wupel gǝnaar byitǝt. ³⁹ Byitǝt wuvǝl a kabi nyi hǝ—'Ɗem tǝnglǝnglǝ gǝgǝ kabi kaasak hǝ.' ⁴⁰ Byitǝt dip gǝ byiyil mǝlaa-ɓǝlǝpnaan lǝngɗok a shi muop wu vǝl nhǝ." ⁴¹ Farisiyawa mǝ kutnyi gǝpe gǝme mǝn Yesu nang fu moup. ⁴² Yen, "A me a enɗye gǝgu gǝkaa Kristi yi? Nyi a laa wuɗa?" Mǝ laa gǝnyi mǝ yen "A laa Dauda." ⁴³ Yesu laa gǝ muop yen, "A nah Dauda yong nyi shi Miskagam shi wu laa yen, ⁴⁴ 'Miskagam laa gǝ Miskagam gǝnǝ, yen, "Tong gǝsar dasǝ gǝnǝ, ɗe par wu gǝ a ɗǝk wukas gǝ nɗapkwak gǝ yi'"? ⁴⁵ Ɗǝ Dauda nyong Kristi shi 'Miskagam,' ɓǝ lǝ gǝdǝr me nkwǝt a laa muup yi? ⁴⁶ Mǝgwuo dok ɓoot npe lap ɓǝlǝp fumuup mou, parde mǝn mǝgwuo ba duantugur dǝr nang nde mǝbi zak fumuup mou.