¹ Ndangkong mǝ laa Yesu nBaitalami gǝyil Yahudiya gǝshii long Hirudus, mǝn mǝbyiman mǝ tugat nggan-fuuskaa mǝ jya nUrushalima mǝ yen, ² ''Ɗe lalaa wu mǝ laa nyi a long Yahudawa hǝ a ne? Mǝ naa ɗagar afe nggan-fuuskaa mǝn mǝ jya dǝr mǝ wap nyi." ³ Long Hirudus kǝlǝng kam mǝn weel nyi, gǝ gurum Urishalima dip. ⁴ Hirudus tǝl ndaawang wunan gǝ mǝbyiran dip, mǝn nang fu muop yen, "Dok gǝtap gǝ mǝ laa Kristo nanyi a ne?" ⁵ Mǝ laa gǝnyi mǝ yen "A nBaitalami gǝyil Yahudiya nsa dok wukaafung nanyi ran ɗen yen, ⁶ 'Wa yi zak Baitalami, gǝyil Yahudiya, a yi a wukǝkat dau gǝnaar mǝlǝngtagam gǝyil Yahudiya mou, nsa me wukangkaa gǝ tong mpǝt nɗǝgǝn yi, a nyi gǝ kwǝt a wutap Izraila muop wu a gurum anǝ hǝ.'" ⁷ Lat mǝn Hirudus yong mǝbyiman gǝsok mǝn nang shii wu ɗagar nanyi nyin kaashik. ⁸ Mǝn lep muop mǝ mwaan nBaitalami, yen, "Mwaan gu tang lalaa nanyi ɗagat n-yit, gu kat nyi ɓǝ gu laa gǝ an ɗewar an zak mwaan a wap nyi yi." ⁹ Mǝ kǝlǝng ɓǝlǝp long lat mǝn mǝ yigil mwaan-mwaan adu, mǝn ɗagar wudok mǝ naa nggan-fuuskaa hǝ langtagam muop mǝn mwaan gǝ lang gǝpe wu lalaa nanyi nnǝgǝn hǝ. ¹⁰ Mǝ naa ɗagar nanyi mǝn took muop pya badǝn. ¹¹ Mǝ ruo nlǝ mǝn mǝ naa lalaa nanyi shiɓǝt nǝgǝnmuup Mariya. Mǝn mǝ zǝn mǝn mǝ wap nyi. Mǝ ap dǝbap gǝmuop mǝn mǝ pǝn zinariya, gǝ ɗyeltuut, gǝ mur. ¹² Naan delkom muop nkwǝt nua gǝ wak dǝr Hirudus shizak mou, lat mǝn mǝ bat war wuɗyik wakdǝr gǝyil amuop. ¹³ Mǝ wak lat mǝn mǝwong Naan laa dǝr Yusufu nɗǝgǝn sugun yen, "Yagal gǝ mang lalaa gǝ nǝgǝn muop gǝ yak gǝ mwaan mMasar. Tong nnǝgǝn ɗe a an par gǝ a la dǝrgǝ nsa Hirudus yong gǝ tang lalaa nanyi dǝr tǝ." ¹⁴ Nlǝpar nanyi mǝn Yusufu mang lalaa nanyi gǝ nǝgǝn muup mǝn waalap mMasar. ¹⁵ Mǝn tong nnǝgǝn ba Hirudus gǝ muut. Dok taa kam a dǝr kǝgǝt bii wudok Miskagam laa nfu wukaafung yen, "Gǝ a yong laa nǝ mpǝt nɗǝgǝn Masar". ¹⁶ Hirudus naa kat mǝbyiman nanyi mǝ fǝn jin mǝn tuup muup lee. Mǝn lang lep mǝ tuo jep daas dip wu yii muop maa vǝl mou hǝ mBaitalami gǝ gogot pee wu nggan nanyi, kun wagap zagat shi yii wudok kǝlǝng fu mǝbyiman hǝ. ¹⁷ Lat mǝn lǝfu wudok Irimiya, wulaa-ɓǝlǝpnaan laa hǝ kǝgǝt, ¹⁸ "Mǝ kǝlǝng wal gǝ tong ciin nRama, Rahila fu wal kop jep dǝ, nyang zwaan nsa mǝ won." ¹⁹ Hirudus muut mǝn me mǝwong Naan nyin kaashik NYusufu nsugun nMasar, yen, ²⁰ "Yagal gǝ mang lalaa nanyi gǝ nǝgǝn muup gǝ waadǝr gǝyil Izraila nsa muop wudok fu tang nooklang lalaa nanyi mǝ ɗem gwe." ²¹ Yusufu yagal, mang lalaa gǝ nǝgǝn muup mǝn waadǝr Izraila. ²² Bǝn kǝlǝng nkwǝt Arkelayus lap long Yahudiya nkop ndaa muup Hirudus mǝn lugut dǝn waa yaa nnǝgǝn shimuup. Ndangkong Naan dǝlkom muup nɗǝgǝn sugun mǝn yagal waalap ngan gǝyil Galili. ²³ Mǝn mwaan gǝ tong nme gǝfǝr wu gǝ mǝ yong shi Nazaret. A nyi kǝgǝt fu lǝfu wudok wulaa-ɓǝlǝpnaan laa nkwǝt yong mǝ yong nyi shi gurum Nazaret.