¹ Bitrus gǝ Yahaya nmwaan yaa nləwab wuyoon shii ɗangnaan, shi wu fuus neeb gwe. ² Dog bii mə mang me dagwuo wu mǝ laa nyi a wukut hǝ, shiɓid-shiɓid, jya ɗen Fukərang Wudǝɗong nung lǝwab wuyoon, ɗewar nyi ɗang shagal yi fu muop wu gə mwaan nlǝwab wuyoon hǝ. ³ Naa Bitrus muop gǝ Yahaya npe ruo nləwab wuyoon, mən ɗang shagal fu muop. ⁴ Bitrus gǝ Yahaya mǝ lǝng yid muob kər kaamuub, mən mǝ yen, "Gǝ naa mən." ⁵ Wukud nanyi naa muob, mǝn ɗen en kad ya ji lab mǝbi fu muop. ⁶ Mən Bitrus yen, "Azurfa gǝ zinariya an gə muob mou, ɗe gǝ a pǝn a bi wu an gǝnyi hǝ ngə. Nɗəgən səm Yesu Kristi nung Nazared, mwaan mwaan." ⁷ Bitrus yaa sar muub wumis, mǝn ep nyi gətəng; gǝ laa mou mǝn kwag dagwuo nanyi gə kǝgǝs kwag muub mǝ ɓal. ⁸ Wukud nanyi ep shig gətəng, mən ɗar mən taa fu mwaan; mən rə gǝpe gəme gə Bitrus muop gǝ Yahaya nləwab wuyoon, nyi fu mwaan gə vuang. ⁹ Gurum dip mə naa nyi fu mwaan, nyi fu pyab Naan. ¹⁰ Mə kat kan a dagwuo wu jet fu ɗang shagal fu gurum nFukǝrang Wudǝɗong nung lǝwab wuyoon hǝ; mǝn mǝ kad ɗyeer mǝ rǝng nsa bii wutaa gənyi hə. ¹¹ Shi wu kutnyi langɗog shi Bitrus muob gǝ Yahaya, mǝn gurum dib mə suo jya dər muob fugǝdo wu gǝ mǝ yong shi Fugǝdo Sulemanu hə, bii nanyi rəng muob. ¹² Bitrus naa kam mən lap fu gurum muop yen, "Gun gurum Izraila, a nah rəng gun kam eh? A nah gu lǝng yit gu shimu, gə yong mə saa nyi mwaan-mwaan a shi kamɓələp gǝ chin ɗem Naan amu eh? ¹³ A Naan Ibrahim gə Ishaka gə Yakubu, a Naan mə ndaamu muop, pǝn yoon frang gǝfe Yesu. Dog gu pən a nyi mǝn nyang ntagam Bilatus shi wu tangkob tag nyi hǝ. ¹⁴ Gu nyang Wusəsaar gə Wukǝr mǝn gu sat nnyi shang wu gǝ tuo gurum tag ngu. ¹⁵ Gu tə Tugus tooklang ndung Naan ep nyi gənaar mədiɗəm—a mən a mətwamshig gəkaa. ¹⁶ A waa nsa pən-naduk nɗǝgǝn səm muub—dagwuo wu gun fu naa nyi mǝn gu man nyi nhǝ, kat kagam yi. Pən-naduk nɗǝgǝn səm Yesu shen kagam kweet nnyi wu ɗarɗog gənaar gu dip nhə. ¹⁷ Məjepnaa, a man dog gu chin a nsa gu man mou, kabi wu mənan gəgu mǝ chin hǝ. ¹⁸ A jepe wudok Naan laa gwe nfu mǝlaa-ɓǝlǝbnaan dib, nkwət Kristi gə sua tǝgǝrchiin, waarə nogot. ¹⁹ Waa nsa kam, gu nyit wubis, mən gu bat ɗepin mə vang wubis agu npe ɗǝ pee ɓwab yi shigu ntagam Miskagam; ²⁰ man ɓǝ lep gǝ Kristi wudog mə kam nyi a npe gu, wu a nyi a Yesu hǝ. ²¹ Gəbətəng gə lab a nyi a lengwaar, ɗe shii wu mǝ myap jepe dip, ndung Naan dog laa gwe nfu məlaa-ɓǝlǝbnaan muob wusǝsaar. ²² Musa dog laa yen, 'Miskagam Naan yong gə ep me wulaa-ɓǝlǝbnaan gǝnaar gu kabi an hə. Gu ləngkom gu gu kəlǝng bii wu nyi gə laa gəgun yi. ²³ Mǝgwuo wu par lang kom kǝlǝng wulaa-ɓǝlǝbnaan nanyi mou, ɓǝ gə mə dam nyi gənaar gurum. ²⁴ A kam mən mǝlaa-ɓǝlǝbnaan muob, she shi Samaila gǝ muob wu mǝ wul gǝdǝr muub, dip mǝ laa ləfu gəkaa ɓit muop nhǝ. ²⁵ A gun a wu turǝpkom mǝlaa-ɓǝlǝbnaan gǝ byilaaɗen wu dog Naan chin gǝ mǝkǝǝ gu, shi uw laa dər Ibrahim yen, 'Gurum gəyil dip gǝ mǝ kat wuret a nsa seen gǝ.' ²⁶ Ndangkong wu Naan ep frang gəfe hə mən lep nyi dər gu shikyeen, ɗəwar nyi lang wuret yi kaagu mən bat gun gəwar ɓǝtbis ba gənyi."