¹ Wawul par ɓit Pentikos mǝn dok mǝ tǝl gǝshak gwe dip npee gəme. ² Gǝ laa mou mən mə piip kabi kogom fan tong gǝbǝtǝng sam gəɓal mən haan ɗəgən lə wudok mə tugatɗok nɗəgən hə. ³ Mən mǝ naa liis kabi nung wu hǝ kwap ɗǝgǝn shak mǝ lǝng nkaa muop. ⁴ Mǝ lap Mərip Wuret mə ɓəm laa ləfu gǝ ɗǝgǝl dǝɗyak-dǝɗyak, wudung Mərip pən muop hə. ⁵ Dok Yahudawa məwap Naan muop nUrishalima, mǝ tugatɗok gǝyil dǝɗyak-dǝɗyak wul yi. ⁶ Mə kələng ɗəgəl nanyi mən gurum wukǝrgǝi mǝ tǝlkaa shak mǝn ɓǝlǝb rǝng muop nsa mə kələng jeplep Yesu fu laa ɓəlǝp gǝ ɗǝgǝl lǝdu. ⁷ Rəng muop badǝn mən mə yen, "Muop wu fu laa lǝfu nhǝ nau a gurum Galili moo? ⁸ A waa nme mən fu kələng muop fu laa ɗəgəl pee wu mə ɓee mən nnǝgǝn yi? ⁹ Mǝn a gurum Partiya gə Madayana gə Elam, gə muop wu mə tugatɗog nMesopotamiya, muop wu nɗəgən Yahudiya gə Kapadokiya, gə Fantas gə Asiya, ¹⁰ Frigiya gə Pamfiliya, gə Masar gə gan Libiya wu waa naa Kurane, gə mǝzeb wu tugat nRom, ¹¹ Yahudawa gə muop wu mǝ wap Naan gǝme gǝ Yahudawa muop, gǝ Kret gǝ Arabia, mə kələng muop fu laa ɓəlǝb nɗəgəl mu gəkaa ɓəlang wunan wu Naan chan hǝ." ¹² Rəng muop nau badǝn mǝn mə laa dər shak mǝ yen, "Ɗe a me shi nhǝ yi?" ¹³ Mən pak gurum mǝ zhal muop mǝ yen, "Mə agal a shi am-laatǝng wufuo." ¹⁴ Mən Bitrus yagalɗar nau gə muob wu sarkaagəme hǝ, mǝn ep dəgəl mən laa gə muop yen, "Gurum Yahudiya nau gəgun wu gu tugatdog nUrishalima, ɗagad gu man yi; gu ləngkom gu gu ɓəlǝb anə yi. ¹⁵ Gurum muob nhə mə agal a shi am-laatəng kabi wu gun fu ɗye hə məu, nsa pee kutnyi a gəɓit gogol. ¹⁶ A bii wudok Joel wulaa-bǝlǝbnaan laa hǝ ¹⁷ "Naan yen, 'par ɓit wutəs; ɓǝ 'gǝ a ɗək Mərib nə ka gurum dip. Jep gu, daas gə jiraap mə laa-bǝlǝbnaan, Jepsual gǝ mə naakaa, daas gǝgu dəduan gǝ mə sugan. ¹⁸ A kam zak gǝshi nanyi, gǝ a sam gə Mərib nə kaa frang gǝnǝ muob, daas gə surəp, mən mə laa-ɓǝlǝbnaan. ¹⁹ Gǝ a nyin ɗyeer gəbətəng gə byinyin gəyil, təgəm, wus gə ǝgǝn ɗyel. ²⁰ Gǝ mǝ bat fuus nwaa kwoo mǝn tar nwaa təgəm ɗǝng she ɓit wuyoon nung Miskagam wul. ²¹ Nlat ɓǝ mǝgwuo wu yong sǝm Miskagam ɓǝ gə kat angkaa.' ²² Gurum Izraila, gu kələng ɓəlǝb nhə: Yesu gurum Nazaret, a gurum wu Naan nyin ngun nkwǝt nyi a wukǝr shi ɓǝlang wunan chan gǝ ɗyeer, gǝ byinyin wu Naan chan gǝsar muup gǝnaar gu kabi wu gu man hǝ. ²³ Mǝn pǝn dagwuo ngun gǝ man Naan gə ɗem afe, mǝn gun gu tǝ nyi gǝsar gurum wu mǝ man byitǝd mou hǝ, gu kwak nyi gǝkaa shepɓeel. ²⁴ Mən Naan ep nyi gətəng, shang nyi nəgən nsar muut, nsa muut dok ɓoot npe yaa nyi mou. ²⁵ Nsa Dauda laa ɓəlǝb kaa muup yen, 'A naa Miskagam veed nfanyit nə, nsa nyi n-eskogob nə ngan sarnə wumis yong a dər. ²⁶ A waa nnyi tooknǝ dog pya mən a laa wuret. Yi gə a tong gǝ tugurkagam. ²⁷ Nsa ya gə tag chelem nə nɗǝgǝn Hades mou, ɗak yi gə nyit Wusəsaar gǝgǝ n-wam mou. ²⁸ Gə nyin war tooklang n-an; ya gə pən tookpya gəret n-an gə ntagam gə.' ²⁹ Məjepna, gǝ a ɓood npe laa gǝgun gǝ tugurkagam gǝkaa Ndaamu Dauda: dog muud ba mə wum nyi, mən gəcheer afe kutnyi shi ɓətmu nɓid wu chinyi. ³⁰ Nyi dog a wulaa-ɓǝlǝbnaan mǝn man nkwəd Naan dog səgər gə gǝnyi nkwǝd gǝ ji pǝs me laa muup gə pətong-long afe. ³¹ Nyi dog naa gwe mən gapdər laa ləfu gǝkaa yagal Kristi ntugun yen, 'Mə tag nyi wa nHades, ɗe shishig muup wam yi mou.' ³² Yesu nhə—Naan ep nyi gətəng, mən dip a mǝtwamshig gǝkaa. ³³ A waa nnyi, kabi wu mə ep nyi gwe lang gəsar wumis nung Naan, mən kabi wu lap byilaaɗen wudung a Mǝrib Wured hǝ dǝr Ndaa, a nyi wur bii wu gun fu naa mǝn gun fu kələng nhə. ³⁴ Nsa Dauda dog kaa gəbətəng mou, ɗe a nyi laa yen, 'Miskagam laa dər Miskagam anǝ yen, "Tong gəsarnə wumis, ³⁵ ɗagad a bad wukas gə mə wag a pǝtǝpkwag gǝ yi."' ³⁶ A nsa kam hə, ɗagat lə Izraila dip man yi wagab nkwət Naan dog ɗen nyi a Miskagam gə Kristi, nyi Yesu wudog mǝ kwag gǝ shepɓel hǝ." ³⁷ Mə kələng kam mǝn ɓyang ɓǝd muop mən mə laa gə Bitrus gə gogot jeplep mǝ yen, "Məjepnǝgǝnmu, ɗe mə chin a nang eh?" ³⁸ Bitus laa dər muop yen, "Gu bad ɗə mə kən gun yi nɗǝgǝn sǝm Yesu Kristi ɗewar mǝ kon wubis agu yi, man ɓǝ gu lap chinɗong Mərib Wured. ³⁹ Nsa byilaaɗen nanyi a nəmug gǝ jepgu nau gǝ muob wu njong, gurum gwet wu Miskagam amu Naan gə yong hə?" ⁴⁰ Twamshig shi ɓəlǝp gǝ gogod lǝfu wu laa gwed, nyi fu ɗwag muop yen, "Gu fat gǝ kaasug nɗǝgǝn seen ɓǝtbis nhǝ." ⁴¹ Mə lap ɓəlǝb nanyi mən mə kən muop; mə kad gurum parde waarə kamkún. ⁴² Mə lǝgǝdǝr byishee jepleb gǝ kangkəshag, nɗegən tərap nawe gə ɗangnaan. ⁴³ Lugud tə gurum dib, Naan chan ɗyeer gə byinyin gwet gǝsar jepleb. ⁴⁴ Muop wu mə pən nadug mǝ tugad gǝshag, jepe gǝmuop nau a gǝshag, ⁴⁵ mǝn mə sarap gə byilong gǝdu mən mə shab gurum dip, shi weel wu muop gənyi hə. ⁴⁶ Bii mǝ mwaan nlǝwab wuyoon shiɓit-shiɓit gə took muob gəme, bii mə tərap nawe shilə, mə shab sə gə tookpya, gə kaaleen; ⁴⁷ mə pyab Naan mən mə kat chinɗong ntagam gurum. Miskagam shen ɓǝl nmuob shiɓit-shiɓit, muop wu mǝ kad angkaa hǝ.