¹ Choni na uje kangelo wa muchitanu wembile luneta lwendi. Cho njamwene ngongonothi ya kutunda mwilu ije ya wililile hathi.Chona ije ngongonothi ba yanene thapo ya ku chifwiko cha ku bumbu buje bwa kujeneka mathima. ² Cho wafukwile chije chifwiko cha buje bumbu bwa kujeneka mathima,cho mwa tuhukile bwithi muje mu chifwiko ngwe ngwabo bwithi bwa kutunda mu lutengolwa kama. Cho litangwa na lihunthzi byoshe bya thzibalele a mulonga wa buje bwithi bwa tundile muli chije chifwiko. ³ Cho bimbimba makumbi bethzile ano ha kaye kutundilila muli buje bwithi,chojo ba banene ndthzili ya ku lifwa ngwe ije ya manyewe hano a Kaye. ⁴ Ba bashikile ngwe kethi ba biithe mwila wa hano ha kaye indi nambe chimena cha maputa a matamba indi nambe chiti,olojo kubanga lika banu baje kubakele na kathatetho ka Njambi a maholo abo. ⁵ Cho kubaba tabethele kuthsiya baje banu embwe,olonini ba pandele ku ba mwetha shaangu a bingonde bitanu. Chojo na muthnga bwabo bwakele ngwe buje bwa linyewe muje mwa kashumu munu. ⁶ Cho mu mutangwa aje banu bakatonda tonda buthsiki olojo ku baka buwana. Baka tondethetha manene ngwabo bathse,olojo kuthsa chikatewa kuli bakebo. ^{7 9} Cho na baje bimbamba mukumbi ba sholokele ngwe tubalo baje ban bwahethele kuya ku ndthzita. A mitwe yabo akele byuma bya kulifwa ngwe bilongo bya ngolinde,chojo na bihanga byabo bya pwile ngwe bihanga bya banu. ⁸ Cho bakele na bung'ambu bya kulifwa ngwe bing'ambu bya banakathzi,chojo na mayo abo a pwile ngwe mayo a bindumba. ¹⁰ Cho bakele na mikila ije yakele na mambimbo ngwe ya manyewe; cho na mu mikila yabo bakele na ndthzili ya ku bulumuna banu mu bingonde bitanu. ¹¹ Uje kangelo wa buje bumba bwa kujeneka mathima ikeyoni ya pwile mwene yabo. Muchi Hebelu lithzina lyendi lya pwile Ambandoni,cho na mu chi Ngiliki wakele na lithzina lya Apoliyoni. ¹² Chojo kayando ka kulibanga kaneti. Kengeni! Na hanima yaka ku chili lalo tuyando tukwabo tubali tutu chili na kwija. ¹³ Cho kangelo wa muchitanu na umo nendi wembile luneta lwendi,chojo nja thzibile lijwi lije lyakele na kutunda mu mambinga a uje mutula wa ngolinde uje wakele ku mesho a Njambi, ¹⁴ lije lyakele na kwendeka kuli uje kangelo wamuchitanu naumo uje ya kele na luneta ngwalyo, "Thzitula baje tungelo ba wana baje ba kutile kuje ku Ndonga." ¹⁵ Chojo baje tungelo bawana baje ba bwahethelele mu hola ije,ha litangwa lije,mu ngonde ije,na mu mwaka uje baba thzitwile mangana bathsiye litambela lya muchitatu lya banu boshe. ¹⁶ Chojo na mbwingi bwabo abje maswalale ba londele a tubalo bwetele ha 200,000,000. Banjilekele obu bwingi bwabo. ¹⁷ Cho echi chikecho chifwa chinja mwenenenemo baje tubalo mu chimona change na baje balondele hali bakebo: Bintelo byabo bya kele nya kubenga ngwe tuhya,bya salufa. Cho na mitwe ya baje tubalo yalifwile na mitwe ya bindumba,chojo namu tunwa twabo mwakele na kutunda tuhya,bwithi na salufa. ¹⁸ Cho litambela lya muchitatu ly banu ba thsiile kuli owo mushongo itatu: tuhya,bwithi,na salufa bije bya kele na kutunda mutunwa twabo. ¹⁹ Mwafwa nthdzili ya tubalo ya kele mutunwa twabo na mu mikila yabo - mwafwa mikila yabo ya lifwile na manyoka,ijoni ya kele na mitwe ije bakele na kulikwathetha na kutwa bimbandu bya banu. ²⁰ Chojo banu boshe baje balitulileho,baje kubathsile kuli ou mushongo,kubatengulukile ku bilinga bya bibi bya maboko abo,cholalo ku bethele kulemetha maamba na tumponya tuje twa ngolinde,twa siliba,twa biti - byuma bije byakujeka kumona,kuthziba,nameme kwenda. ²¹ Cholalo kuba tengukile ku bubi bwabo bwa kuthsiya,bwa matheno,bwa kulinga bupangala indi nambe bilinga bya bwithzi.