¹ Cho hanima yebi byuma njatalele,cho nja mwene chokolo chakushokoloka mwilu. Cho lijwi lya kulibanga nja thzibile lya kele na kwendeka kuli yange ngwe luneta,nakwendeka ngwalyo, "Ija kuno kwilu,cho nja kukulehetha obyo bya pande kuka lingiwa hanima yebi byuma. ² Cho hajebene njakele mu munthzinzthime,cho hajebene njamwene litanda bana lyaka mwilu,na uje watumbameneho. ³ Uje watumbameneho chihanga chendi chalifwile ngwe mamanya a njasipa na kanalya.Kwakele nkongolo ya thzengelekele litanda lyoshe ije nkongolo ya lifwile ngwe limanya lya emalonde. ⁴ Cho kulitanda lije kwa thzengelekele matanda a makumi abali na matanda awana,cho hatumbamene bakulunu makumi abalai na bawana,bathzengelele buthzalo bwa kutoka,na bilongo bya ngolinde ku mitwe yabo. ⁵ Kutundilila ku litanda kwethile byeke bya mihyato,kuluma,na kuluma kwa kushukuma, Cho cheke cha bindeeya bitanu na bibali byakel na kushukuma kulutwe lwa litanda,bindeeya bikebyo bya pwile munthzinzthime itanu naibali ya Njambi. ⁶ Kulutwe lwa litanda lije kwakele ngwe mema a kalunga aku lifwa ngwe kalibanjelo kakutungukwa ngwe kilisitete.Hakati ka litanda na kuthzengeleka lije liatanda kwa kele bikashama bawana bakuyoya,bakele na mesho amengi,kulutwe na kunima. ⁷ Uje chikasham wakuyoya walifwile ngwe ndumba, cho uje chikashama wa kuyoya wa muchibali walifwele ngwe muna ngombe,wamuchitatu chiakashama wakuyoya wakele na chihanga ngwe munu, cho uje chikashama wakuyoya wamuchiwana walifwile ngwe ngonga wakupulula. ⁸ Baje bikashama bawana umo na umo wakele na mambaba atanu na limo,cho bakebo boshe ba shulile na mesho helu na mwithi. Buthsiki na mutanya ku bethi kwecha na kwendeka ngwabo, "Wakujela,wakujela,wakujela ikeye shukulu Njambiwandthzili,ou wakeleko,ou aliko, uje lalo akaija." ⁹ Cho thimbu yoshe aba ba bikashama ba kuyoya bakele na kwana bumpahu,kathingimiko,naku mukandelela uje wa tumbama halitanda,ou wayoya myaka na myaka yoshe, ¹⁰ baje bakulunu makumi awana bawilile kutwe lwendi ou natumbama ha litanda na kulemetha ikeye wayoya myaka na myaka. Cho bakebo ba tumbika bilongo byabo kulutwe lwa litanda,nakwendeka ngwabo, ¹¹ "Yobe wafwila,shukulu yetu na Njambi yetu,kutambula bumpahu na kathingimiko na ndthzili, omwo yobe wa tangele byuma byoshe,cho lalo kuya na chithzango chobe bakaleko cho nawa babatangele."