¹ Cho njamwene chikashama watuhukile mu mema akalunga. Wakele na bimbinga likumi na mitwe itanu na ibali.Kuje kuma mbinga endi kwakele bilongo likumi,cho ha mutwe umo na umo hakele lithzina lya ku shaula. ² Cho uje chikashama inja mwene wafwile ngwe ingwe. Cho uje chanza- ngombe wanene ndthzili yendi,na litanda lyendi,hamo na bukama bwa mooko yendi kuyula. ³ Mutwe umo wa uje chikashama wakele na mbandu yakama,oloni ije mbandu yakama ya kangukile. Kaye koshe bakomokele omu bakele na kukabangeya uje chikashama. ⁴ Nabakebo lalo balemethele uje chanza- ngombe,mwafwa wanene mooko yendi kuli uje chikashama. Balemethele uje chikashama,lalo,nakwendeka ngwabo, "Iyajo wa lifwa na chikashama?" indi "Iyajo atha ku mulwitha?" ⁵ Cho uje chikashama ba mwanene kanwa ka kwendeka majwi akulithziba na kushaula. Cho bamwanene mooko ya bingonde makumi awana na bingonde bibali. ⁶ Cho uje chikashama wa fukwile mukanwa kendi na ku shaula Njambi, - na kushaula lithzina lyendi na tabanakele yendi,na boshe baje bakala mwilu. ⁷ Cho uje chikashama ba mutabethele kulwa ndthzita na banu ba Njambi ba kuthzila na kuba fungula.Cho lalo,ba mwanene mooko na miyati yoshe,banu,bindaka,na mafuti. ⁸ Boshe bayoyela hano hathi bakamulemetha,baje boshe mathzina abo kuba wathonekele mulibulu lya mwonyo,lya Muna Manga uje ibathsiile thimbu kanda btange kaye. ⁹ Uje ali na litwi, athe kuthziba. ¹⁰ Ngwe woshe uje bakatwala kubundthzinda,mwabuthunga bene akaya kubundthzinda. Woshe uje bakathsiya na moko ya mulanja,mwa buthunga bene akathsa na moko ya mulanja. Aha hakeho nana pande lukakateya na kukulahela kuli banu ba Njambi na moko ya mulanja. ¹¹ Cho njamwene chikashama mukwabo alinakutunda mu libu.Wakele na bimbinga bibali ngwe bimbinga bya muna manga,cho wendekele ngwe chanza-ngombe. ¹² Ikeye wa pangethele mooko yoshe yauje chikashama wa kulibanga ku mesho endi,wa lingithile nathsi na boshe baje ba kalaho kulemetha uje chikashama wa kulibanga - uje mbandu yendi ya kangukile. ¹³ Walingile bikomwetha byakama.Wathele kutuma tuhya kutunda mwilu kwija hano hathi ku mesho a banu. ¹⁴ Mukulinga bithzibukitho ba mwanene ndthzili ku mesho auje chikashama,cho wa kwithile baje bayoyela hano hathi,wa balekele kumunga chifwa cha kamponya - uje ba bulumwine na moko ya mulanja,oloni wa yoyele lalo. ¹⁵ Bamutabethele kuhwimina mwonyo muchifwa cha kamponya wa chikashama mangana kaje kamponya kathe kwendeka na kuthsiya baje boshe kubashaka kukalemetha. ¹⁶ Cho lalo wathndiyiye banu boshe,bakujeneka kulema,na aba bakama,baka kufuka na bihutu,wakupatuka na ndungo,kutambula chithzibukitho ha maboko abo achilyo nambe haluholo lwabo. ¹⁷ Naumo wahi atha kulanda nambe kulandulula kwa kujeneka echi chithzibukitho cha chikashama,chikecho,nambala ya ije inemanena lithzina lyendi. ¹⁸ Echi bachitumbula mana.Woshe uje ali na chimwetho mutabetheni kulumbununa nambala ya uje chikashama. Mwafwa nambala eyi inemanena lithzina lya munu. Nambala yendi 666.