¹ Cho nachimwetho cha sholikele muje mwilu: cho munakathzi nathzala ngwe litangwa, na ngonde mwithi yamwanja wendi na chilongo cha likumi na babali bya bingongonothi ha mutwe wendi. ² Wakele na chikute, cho walilile manene omwo mushongo, na kayando kakuthulumuna mwana. ³ Cho nachimwetho chikwabo chasholokele muje mwilu: Kenga! Kwakele chathzangombe wakama wakubenga wakele namitwe yitanu nayibali na mambinga likumi, cho nachilonga a mutwe na mutwe yayije yitanu na yibali. ⁴ Cho wakokele mutambela wa muchitatu wa bungongonothi kutunditha kwilu na kubinena hano hathi. Chathzangombe wemanene kulutwe lya uje munakathzi yashakele kuthulumuna, ngechi uje mwana nga na themuka, cho alye uje mwana. ⁵ Cho ou munakathzi wa thulumwine mwana, wa munalume, owo aka yula lifuti lyoshe namulamu wa chikubo. Namunendi ba munyekeleyo na ku mwaka kuli Njambi na kuli tanda lyendi, ⁶ na uje munakathzi wa tewelele muje mumambo, omwo Njambi wa mubwahethele mwela, manganoni bamulamenenemo hamatangwa a kweta ku likukathi limo na bita bibali na makumi atanu nalimo. ⁷ Cho kwakele thzita muje mwilu, Uje kangelo Mayikulu wa lwile thzita na uje chathzangombe, na chathzangombe na kangelo ba lwile nawa hanima. ⁸ Olojo uje chathzangombe kakele na binthzili bya kulwa. Namuchifwa echi kakele na mwela muje mwilu hamo lika na tungelo twendi. ⁹ Ou chathzangombe wakama--na uje linyika wakulaja owo bakele na kuthana ngwabo liyabolo nambe satana, ou wakwithile lifuti lyoshe--bamumbilile hathi, natungelo twendi nabakebo babombilile hathi hamo lika nendi. ¹⁰ Cho njathzibile lijwi lya kama mwilu: "Kwoboloka na binthzili binehza na bumwene bwa Njambi, na moko ya uje Kilisitu. Mwafwa omu na bandolome betu bakukwitha bana bombila hathi hamo nendi, ou wakwithile nakubakwitha a lutwe lya Njambi mutanya na buthsiki. ¹¹ Bamuhyunene na maninga a munamanga na buthunga bwa kwambulula, mwafwa kuba thzemene myono yabo na kukuthsa. ¹² Na muchifwa echi bwaheleleni, yenu baka melu na boshe bakalamo! Olojo lubinda kuli yeni hano hathiu nakumema a kalunga, mwafwa liyabolo neja hathi kuli yeni! Na shulu na butenu bwalyoba na kuthubuka ngwendi matangwa endi oni anapu amandondo! ¹³ Omwoni uje chathzangombe wemukile na kumona ngwendi bamumbilile hathi, watwalelele kukabangeya uje munakathzi wathulumwine munendi wa munalume. ¹⁴ Olojo nou munakathzi bamwanene mambaba abli angonga wakama mangana amukwathe kupulula kumu twala kuje kulyala kumambo ku bamubwahethelele. Kuje bene kukeko ba mulamenenene, hathimbu, bithimbu, na mukati ka bithimbu--kutunda kuli uje linyoka. ¹⁵ Cho naije linyoka wa pambele mema mukanwa kendi nge ndonga, nakupwa nge libathi mangana lika mukupule uje munakathzi. ¹⁶ Olojo lifuti lyamu kwathele kanwa na kulehula ije ndonga ya shajele uje chathzangombe mukanwa kendi. ¹⁷ Cho uje chathzangombe wa lubalele na uje munakathi cho wa yile na kulwa thzita na yije nanga yendi yoshe, baje bononokele ku mashiko a Njambi naku kwatelela kubuthunga bwa Yesu. ¹⁸ Cho uje chathzangombe wamanene hamushekesheke wakumukulo wa mema a kalunga.